GIÉ GO PAJERONG GA GIÉ KOGÉ 16 - Kebu go dore go herua 1978

Timoté ’yang Paul kang Silas

¹ Paul ’yé Derbé dang Listra, a kiddin lé na, kema go bo cindi wo kené go ké ba tei Timoté. ’Yoia do Juib do Krist toi, Baia go Grék.

² Karmei ga a Listra dang Ikonum pedei bbani ’eno.

³ Paul dar ca ddia golei kang nai oré, ama ddi wala mandeli ca Juib ga a ca gesong lé, cawa ké mam sol ca baia go Grék.

⁴ Kiddin ga ka gesin duro gulong go gumu goni goni na, ké yégé kual go pajerong ga gié dang kalang ga gemdong ga a Jorsalem ba nyani ca kandia magai.

⁵ Yaué go Kumu koi wai dono ca bo cindi gogé. Ké bé cainé waindo waindo.

Soné go beram beram lé Paul a Troas

⁶ Habé ga arin carara nargé doré kual go Kumu koi ca gesong ga Asi, na ca ma ké col ’yé ca gesong ga Prigi dang Galat.

⁷ Kiddin ga ké ba ’yé ’yoabang Misi na, ké dar ca ka oré Britini, ama Habé ga Jésu kai nargé.

⁸ Kardené ké jogu a Misi ’yé Troas.

⁹ Soné go beram beram lé Paul dang soindo, ddi sol kema go pena go Masadon dang ’eré wa olei, ddi yei wa: ’Erang gusuni a Masadon jégenani.

¹⁰ Kiddin ga ddi ba sol soné go beram beram lé na, ni sai kobeni padda ca oré Masadon, ni sol Kumu na togeni ca nia ’era dura Nô do Ddari gusu kalang ga a ca gesong lé.

Lidi bu cindi ca Bagulong a Pilip

¹¹ Ni nai duro kuburo a Troas, ni oju kema go Samoras tab, waindo ni gesin Niopolis.

¹² Ni sai a kené, ni ’yé Pilip, na gulong go gumu go a ca gesong ga Masadon. Na kiddin ga ga Rom ba jom kené, Ni lé wolé kené combu.

¹³ Wolé go jurgum na, ni andong kebu berem dong. Ni ’yé kebu kurai. Ni ’erem ca nia da wai kiddin ga Juib kagé ga olé. Ni jom dugo, ni yé kual dang kandu ga ba yau a kené.

¹⁴ Tama do pena wo kené do Tiatir, do ké ba ta Lidi, toa tama do lo cénegé dang badigé ga wuraju dogé yilé, toa do meré Kumu. To jé kual goni bua, Bagulong hangu ddaindo ca to ja kual to Paul yoi bu’.

¹⁵ Ni desa to kang dang kalang ga ga gulong bu’. Kardené to yeni wa: Kenga nia sol ca ’enunga tama do bo cindi ca Bagulong na, ga ’eragengang jima tang, to olni nain, ni ’ya kual goa jom ta.

Duro gerngang a Pilip

¹⁶ Wolé go pena kiddin ga ni wa oré ca olé na, turmo do pena do gié waini, toanga habé ga isini kedera ga boa dono ca yo kual ca henga ga ddain da lé, kagulonda wai laré nain guso combu ca kual goa lé.

¹⁷ To osum kobeni, nianga ga Paul to soi noa, to yé wa: Kalang lé kua na Kumu go dang go ddo wal kai ga gié. Ké wa doregenga kual ca giyong go minyé.

¹⁸ To lang main kain wolé nain, kardené Paul kederei homi, ddi belé cindi guso, ddi yégé habé lé wa: ’Enung yegeng dang Jésu Krist gusondi, keng andang dong. Kobipadda habé ga isini lé andong dong.

¹⁹ Ama kiddin ga kagulonda ba sol ca ké bbal ca waié laré a guso ddang ’eno na, ké ’yom Paul kang Silas seregé ’yang nagé to gasgo tumu kalang ga osurdong.

²⁰ Ké golgé ’yang nagé tumu gemdong ga Rom, ké yégé wa: Kalang lé kua, ka ga Juib, ké belé gulong guana dang gendei.

²¹ Ké wa gela hada do so guana nari, hada do na ga Rom bbal ca ’yoa ca kuaba ’eno.

²² Kalang ga yaué mam sai tebenang nagé. Kalang ga gemdong tor Paul kang Silas badigé gagé ga gusugé cong. Ké sigé ca kandia tegagé dang belau.

²³ Kiddin ga ké ba tégé na, ké bégé duro gerngang, kema go magé gerngang na, ké si kondia magagé ddar dang duro.

²⁴ Kiddin ga go magé gerngang ba jé kual lé main kain na, ddi bégé duro kulu go duroiné, ddi dégé gégér gondigé.

²⁵ Duro soindo na, Paul kang Silas wa olé, ké wa dogé kera go debainyé Kumu bu’, kalang kané ga a duro gerngang wa tugoiyégé.

²⁶ Kobegépadda gesong gigié bbani ’eno, kulu go gerngang toi gigié bu’. Kobegépadda kulu kebi mam hangdong bua, ga gerngang mam kunja gogé pederong bu’.

²⁷ Kema go magé gerngang lebu to kung. Kiddin ga ddi sol kulu go gerngang kebi hangdong na, ddi dor gesengar doi ca ddia deddé gusi, cawa ddi ’erem ca kalang ga gerngang mam geré.

²⁸ Ama Paul soi noi osu, ddi yei wa: Ji deddé gusin ’eno, ni wo kené mam.

²⁹ Kardené ddi ’enger kandia biang tua. Ddi geré andong kulu, ddi aserong tumu Paul kang Silas dang yoré.

³⁰ Kardené ddi golgé ’yang nagé dong, ddi ’engergé wa: Gemdong, ’enunga la mena ma, ’enunga waiang minyé ga?

³¹ Ké jogu yei wa: Bu cindi ca Bagulong Jésu Krist na, jia wai minyé dang kalang ga tain gulong mam bu’.

³² Ké dori kual go Bagulong koi dang kalang ga tai gulong mam.

³³ Kema go magé gerngang lé sai golgang soindo lé, ddi pel yainyong gagé. Kobegépadda ké desei to kang dang kalang ga tai gulong mam.

³⁴ Ddi ’yang Paul kang Silas tai, ddi bigé do, kema lé gusi mowi dang kalang ga tai gulong mam, cawa ké bu cindi ca Kumu.

³⁵ Kiddin ga kiddin ba wol na, ga gemdong ga Rom gi gusu go magé kulu go gerngang, ké yei wa: Kondia bega kalang lé dang.

³⁶ Go magé gerngang lé yei Paul wa: Gemdong lé gigu yeng wa: ’Enunga begageng dang, ga andageng dong, ’erageng labia.

³⁷ Ama Paul yégé kalang lé wa: Nia go Rom, ké téni cin kalang ga combu waldong wang basé kaidé kual caini, kardené ké beni duro gerngang, ama cakcak kua ké dar ca bogeni dang dang wasuai ga? Na kain ’eno, dda ké gang gusugé ’erang begani dang.

³⁸ Kalang lé jogu yégé kalang ga gemdong kual lé. Kiddin ga ké ba jé ca Paul kang Silas na kalang ga Rom ma, ké lé muro.

³⁹ Ké ’yé gusugé, ké bédegé kalong, kiddin ga ké ba bégé dong na, ké olgé ca kandia dda gulong gogé.

⁴⁰ Kiddin ga Paul kang Silas ba andong a duro gerngang dong na, ké ’yé ta Lidi. Kiddin ga ké ba sol karmegé na, ké yégé kual go jalegé ddaindigé, kardené ké ddé gusugé ’yé.