GIÉ GO PAJERONG GA GIÉ KOGÉ 14 - Kebu go dore go herua 1978

Paul kang Barnabas a Ikonum

¹ A Ikonum na, Paul kang Barnabas andong duro kulu go yaué go Juib kogé. Ké dorgé kual bera ga Juib dang kalang ga toigé ddang bu cindi combu.

² Ama ga Juib ga ba kain bu cindi cong na, ké si kalang ga toigé ddang ségeldé ca kandia tunyang karmégé.

³ Paul kang Barnabas jom a Ikonum wolé combu. Ké yé kual basé muro dang dono do Bagulong toi. Bagulong gel ca kual goi go kandia wa doroi ca wai doi, na kual go cindi a gusu dono do ddi ba bigé ca lo henga ga gelé bua, dang gié go dono go kagelokemo bu’.

⁴ Kalang ga a duro gulong go gumu lé gusondé sua, ga pena to ga Juib bua, ga pena to pajerong ga gié bu’.

⁵ Ga Juib dang kalang ga toigé ddang, dang gemdong gagé nyan gusugé ca gelé Paul kang Barnabas cindigé ca worinyégé dang keddang deddegé.

⁶ Kiddin ga pajerong ga gié ga sua lé ba jé kual lé na, ké geré ’yé gulong go gemdong Listra dang Derbé ca gesong ga Likoni dang gulong go ba lura.

⁷ Ké osum doré Nô do Ddari a kené.

Paul kang Barnabas a Listra

⁸ Kema go pena wo a Listra go ké ba woi gondi rorogodo, ddi ’era ’eno bering.

⁹ Ddi jé kual go Paul ba yé. Paul soli ddér, ddi sol ca kondia bu cindi bbal ca waié labia.

¹⁰ Kardené ddi yei dang noi do osi, sa dang, ’era dang gondin tebba. Kema lé sai nyinger dang ’er dang gondi, ddi osum oré.

¹¹ Kiddin ga kalang ga yaué combu ba sol henga ga Paul ba lé na, ké soi noigé dang kubu go Likoni, ké yé wa: Kumurong gesingu gusuna main kalang kain.

¹² Ké té Barnabas Séus, ké té Paul Hermé, cawa Paul na kema go doré kual.

¹³ Go tibé Kumu go ké tei Jaus lé na, kulu goi go tibé kula lé wa kebu berem go gulong go gumu koi, ddi nyimgu sinyong dang gundu go binyé ’yang nagé kebu berem, ddi kang kalang ga yaué combu dar ca walé Barnabas kang Paul tibé.

¹⁴ Ama kiddin ga pajerong ga gié ga sua lé ba jé main kain na, ké sagedé badigé gagé. Ké geré andong duro kalang ga yaué combu. Ké soi noigé, ké yé wa:

¹⁵ Kajanderndeni, keng lé main kainya cawa ga? Nia kalang main nageng kain, ni ’erga danga Nô do Ddari ca keng kainya koliyong lé cong, keng belang gusu Kumu goang cindi, ddi go lo dangang gesong dang kurai go gumu go ddoaga dang henga ga duroigé mam.

¹⁶ A duro saman do ba hal na, ddi ddé kalang mam kandia la henga ga kederégé ba dar.

¹⁷ Ama ddi gel hendé doi dong a gusu gié goi go ddari, ddi hongugeng kang a dang bua, ddi begeng kiddin ga walé gasa bu’, ddi begeng do bua, ddi begeng gusu mowa bu’.

¹⁸ Pajerong ga gié yégé kual combu main kain kau, ké ja ’eno, ama na hom jua ma, ké nargé walegé tibé dé.

¹⁹ Ama Juib ga pena ’erga a Antiog do ca gesong ga Pisidi dang Ikonum. Ké si kalang ga yaué combu ségeldé, ké worindé Paul dang keddang deddi, kardené ké serei kebu gulong go gumu dong, ké ’erem ca kondia ma ’enda.

²⁰ Ama kiddin ga kalang ga bo cindi ba yau gusi, ddi sai dang, ddi jogu ’yé gulong. Waindo ddi kang Barnabas ’yé Derbé.

Paul kang Barnabas boi caigé jogu Antiog do ca gesong ga Siri

²¹ Paul kang Barnabas dor Nô do Ddari a duro gulong go gumu go Derbé, ké wai anjama nain. Kardené ké boi caigé jogu Listra dang Ikonum dang Antiog do ca gesong ga Pisidi.

²² Ké bégé ga bo cindi dono, ké géjegé kandia ’er gag ca bo cindi gogé. Ké yégé wa: Danga gelé go cin combu ma, na da andong duro Leu do Kumu toi.

²³ Ké torgé kalang ga gemdong a duro yaué go Kumu koi goni goni mam. Kardené ké ai asiam dang olé, ké ddégé kuaba Bagulong go ké ba bu cindi cai.

²⁴ Kardené ké hal ca gesong ga Pisidi, ké ’yé Pampili.

²⁵ Kiddin ga ké ba dor kual a Pergé na, ké ’yé Atali.

²⁶ Ké sai nai kuburo a kené, ké jogu ’yé Antiog, na gulong go gumu go ké kené ba ddégé duro wai do Kumu toi ca gié go ké ba lei.

²⁷ Kiddin ga ké jiga Antiog na, ké yau yaué go Kumu koi, ké dorgé kual go Kumu ba lang nagé bua, dang kual go Kumu ba hangu giyong ca kalang ga toigé ddang bu cindi bu’.

²⁸ Ké jom kené dang kalang ga bo cindi wolé combu.