GIÉ GO PAJERONG GA GIÉ KOGÉ 13 - Kebu go dore go herua 1978

Ké dor Barnabas kang Saul, ké gigé duro gié go Kumu koi

¹ A duro yaué go Kumu koi go a Antiog na, ga cogelé kebu go Kumu koi dang kalang ga gelé wo kené. No Barnabas dang Siméon (na ddi go ké ba tei ’Endua bu’), dang Lukas go Serén, dang Manan go ké ba abi kang Hérod go ddo ca, dang Saul.

² Kiddin ga ké wa melaué Bagulong dang asiam bu’ na, Habé ga Kumu kai yégé wa: Ga durang Barnabas kang Saul ca gié go ’enung ba tégé cai.

³ Kardené ké ai asiam, ké ol, ké si kebegé caigé, ké ddégé ’yé.

Barnabas kang Saul wo Sipré

⁴ Habé ga Kumu kai gi Barnabas kang Saul, ké ’yé Selosi. Ké nai kuburo a kené ca oré ca kema go Sipré.

⁵ Kiddin ga ké wo Salamin na, ké osum doré kual go Kumu koi duro kulu go yaué go Juib kogé. Jâ Mark wo kené dang nagé ca jégenégé.

⁶ Ké dal ca kema lé bera ’yé Papos, ké wai kema go pena go lo kema go béli. Ddia go Juib, ké teia Bar‐Jésu, ddia go cogelé kebu go poi.

⁷ Ddi joma gusu go ddo ca Serjis Paulus go a ca kema lé, ddia kema go nari. Go ddo ca lé té Barnabas kang Saul, ddi dar ca jo kual go Kumu koi.

⁸ Ama Elimas go lo kema go béli (kua na gusondi dang kebu go Grék) ddi main kual dang nagé, ddi dar ca naré go ddo ca lé kondia bo cindi ’eno.

⁹ Ama Saul go ké ba tei Paul go ba wonang Habé ga Kumu kai soli ddér.

¹⁰ Ddi yei wa: Ji kema go babé nain go isini, ji Sidan kiei, ji go tebena dang henga ga ddari mam, ji dar ca belé kual go Bagulong koi poi waindo waindo, na mini ma jia delé ga?

¹¹ Sela cakcak kua Bagulong ca somboin, jia bibé, ji go solé arinwa go teba kua ’eno. Kobipadda Elimas cindi bé beram main ddia danga soindo kain, ddi osum sasemdé kiddin ca daré kema go ’yomoi kobi.

¹² Kiddin ga go ddo ca ba sol henga lé kain na, ddi bu cindi, ddi sol kagelokemo ca gelé go Bagulong koi.

Paul dang Barnabas wo Antiog a Pisidi

¹³ Paul kang kalang gai ga wa orang nai, ké nai kuburo a Papos, ké ’yé Pergé do ca gesong ga Pampili. Jâ Mark ddégé, ddi boi cai jogu Jorsalem.

¹⁴ Ké sai a Pergé, ké ’yé Antiog a ca gesong ga Pisidi. Wolé go jurgum na, ké andong duro kulu go yaué go Juib kogé, ké jom kené.

¹⁵ Kiddin ga ké ba ddogin so go Mois koi dang cidab do ga cogelé kebu go Kumu koi togé, gemdong ga magé kulu go yaué go Juib kogé gi gusugé yégé wa: Karmeni, cakcak kua kenga dang kual go doré ca jégené kalang ga yaué lé na, ga durageng kual lé.

¹⁶ Paul sai ’eré dang, ddi légé kobi, ddi yé wa: Keng ga Israél dang kalang kané ga melaué Kumu, ga ja kual guang.

¹⁷ Kumu go ga Israél kogé, ddi par moinderana, kiddin ga ké ba jom main kerga kain a ca gesong ga Ejibté na, ddi wéregé combu, kardené ddi durgé a ca gesong ga Ejibté dang dono doi do nain.

¹⁸ Ddi ’yom ddaindi dang nagé duro gada bbal main ddegelé to poddin kain.

¹⁹ Ddi basu kalang ga toigé ddang cong jurgum a ca gesong ga Kana. Ddi bégé gesong lé deba dogé.

²⁰ Ca kandia jima kené main ddegelé aru poddin dang to bai kain. Kardené ddi bégé moinderana kalang ga kaidé kual, bera ’erga saman do go cogelé kebu go Kumu koi Samuél toi.

²¹ Kardené ké ol Kumu ca kelma, Kumu bigé Saul go Kis kurondi, ddia to moin go Bénjamin koi. Ddi di termala ddegelé to poddin.

²² Kiddin ga Kumu dori cong, Kumu bigé kelma Dabid. Ddi yé kual goi waldong wang: Dabid go Jésé kurondi, ddia kema go mowang gusung. Ddia lé henga ga kedereng ba dargé.

²³ Kumu bigé ga Israél Jésu a to moin go Dabid koi ca minyégé, main ddi ba dorgang kebu kain.

²⁴ Tumu Jésu na, Jâ dorgé kalang ga Israél kual ca kandia bega kebegé ca kandia desegé to kang.

²⁵ Kiddin ga Jâ ba ji ’yoab ca karé gié goi na, ddi yé wa: Keng ’erem ca ’enunga wang ga? ’Enunga ddi go keng wa amei lé ’eno, ama selageng, kema go pena wa orang kardung, ama ’enung bbala poré giabé go gondi ’eno.

²⁶ Karmeng ga to moin go Abraham koi, dang ga kané ga melaué Kumu, Kumu gigu kual go minyé lé kua gusuna.

²⁷ Ké ga jomé Jorsalem dang gemdong gagé selai ca na Jésu ’eno bua, ké sela kual go ga cogelé kebu go Kumu koi go ké wa ddoginyei dang wolé go jurgum waindo waindo ’eno bu’. Ama kiddin ga ké kaidé kual ca Jésu na, sera to kual gogé lé.

²⁸ Ké wa kual go bbalé deddei ’eno kau, ké ol Pilat kondia deddi.

²⁹ Kiddin ga ké ba lei henga mam ga seré kual go ké ba pasu cai duro cidab na, ké dori a ca sia go adegelé dugo, ké ’embei duro umbung.

³⁰ Ama Kumu beliang cindi a duro ga maré.

³¹ Ké ga ba sagang nai a Galali ’erga Jorsalem na, ddi gel gusi cindegé wolé combu. Cakcak kua ké kalang ga yo hendé doi gusu ga Israél.

³² Ni gang kau, ni ’erga gusugeng danga Nô do Ddari do Kumu ba dorgé moinderana kebu ca.

³³ Kiddin ga Kumu ba belé Jésu dang cindi a duro ga maré na, kual lé ser toiné caina, cawa na ga moinderegé, main ké ba pasuang duro cidab do kera go sua kain: Jia Kurandang, ’Enunga belé Bain labegé,

³⁴ Kumu yé wa: Ddia da beleiang cindi a duro ga maré, kondia go jogé osinyé ’eno. Ddi jogu yei com: ’Enung da segeng busu do arin carara do cindi, Do ’enung ba dori Dabid kebu ca.

³⁵ Na ca ma ddi yé duro kera go ddang waldong wang: Ji go ddo koin go arin carara solé osinyé ’eno.

³⁶ Dabid lé gié go Kumu ba dar ca kondia lai. Kardené ddi ma, ké ’embei duro moinderei, ddi osin.

³⁷ Ama ddi go Kumu ba beliang cindi a duro ga maré na, ddi usinya ’eno.

³⁸ Karmeng, na ddar keng sol na ca Jésu lé ma, ké dorogeng kual go burogé isinwa dogeng.

³⁹ Kema goni goni goa bu cindi cai na, isinwa do so go Mois koi bbala dora ’eno na, ka dora cai cong mam.

⁴⁰ Ga lageng angal, ddo kual go ga cogelé kebu go Kumu koi kogé go ba yei na, ddi bo caigeng ’eno.

⁴¹ Ga selageng, keng ga lo bbojo, Ga sela kagelokemo keng ga basong cong, Cawa ’enung wa lo gié go pena duro wolé gageng, Kema nia yageng kau, keng bbal bo cindi ca gié lé ’eno.

⁴² Kiddin ga Paul kang Barnabas wa andong a duro kulu go yaué go Juib kogé na, ké olgé kandia jigang wolé go jurgum go wa orang ca yagé kual lé ddang com:

⁴³ Kiddin ga kalang ga yaué lé ba posin ’yé na, ga Juib combu dang kalang kané ga ba belé gusugé Juib na, ké kobu Paul kang Barnabas. Ké dorgé kual ca kandia ’eru gak duro wai do Kumu toi.

⁴⁴ Kiddin ga wolé go jurgum go ddang ba bbal na, kalang ga gulong andong dong ’yoab ca mam, ké yau ca jo kual go Bagulong koi.

⁴⁵ Kiddin ga ga Juib ba sol kalang yau combu kain na, ké lé ddéngi bbani ’eno. Kual go Paul ba dorgang nai waldong wang na, ké mainyi bua, ké nyangdiei bu’.

⁴⁶ Ama Paul kang Barnabas yégé kual basé muro. Ké yégé wa: Na gad ni yogenga keng kual go Kumu koi tumu jua, ama keng kainyi cong, kenga gelé waldong wang ca kenga bbala waié jomé goang cindegeng bera kuddum ’eno. Na ddar, cakcak kua ni ddegeng ’enda, ni ’ya gusu kalang ga toigé ddang kua, na so go Bagulong ba seni.

⁴⁷ Cawa kua, na so go Bagulong ba seni: ’Enung parin sinya arinwa ca kalang ga toigé ddang, Ca ji ’era dura kual go minyé bera delinya toa do karé gula.

⁴⁸ Kiddin ga kalang ga toigé ddang ba jé kual lé na, gusugé mowegé bbani ’eno, ké bu kual go Bagulong koi hormo. Kalang ga ké ba pargé ca kandia waia jomé goang cindegé bera kuddum na, ké sai bu cindi.

⁴⁹ Kual go Bagulong koi aju ca gesong lé mam.

⁵⁰ Ama ga Juib si kandu ga gemdong ga meré Kumu ségeldé, dang bainyong ga gemdong ga a duro gulong go gumu lé. Ké gel Paul kang Barnabas cindegé, ké taigé a ca gesong gagé cong.

⁵¹ Ama ké ddagedé ususu do gondigé caigé, kardené ké ’yé Ikonum.

⁵² Anjama ga a Antiog gusugé mowegé bbani ’eno. Ké wonang Habé ga Kumu kai.