GIÉ GO PAJERONG GA GIÉ KOGÉ 11 - Kebu go dore go herua 1978

Piér yégé yaué go Kumu koi go a Jorsalem kual lé

¹ Pajerong ga gié, dang karmégé ga a ca gesong ga Judé jé ca kalang ga toigé ddang na ’ya kual go Kumu koi.

² Kiddin ga Piér ba ’yé Jorsalem na, Juib ga Krist kai boju dang nai.

³ Ké yei wa: Ji ’yé gusu kalang ga basé walé mandeli, ji diang nagé bu’.

⁴ Kardené Piér sai yégé kual go ba lé, ddi yégé wa:

⁵ Kiddin ga ’enung wo a Jopé na, ’enung wa olé. Soné go beram beram leng. ’Enung sol henga wol main badigé ga gumu kain wa gesin ’yang dugo tumang dang temdigé poddin.

⁶ ’Enung solgé ddér, ’enung sol kemané cindigé kaindigé kaindigé ga gondigé poddin poddin bua, dang gajong ga karang bua, dang henga ga nyarang ddaindigé dugo bua, dang ceddong cindegé kaindigé kaindigé bu’.

⁷ ’Enung jé nô yeng wa: Piér, sa ddang, deddu da.

⁸ Ama ’enung jogu yei wa: Bagulong na kain ’eno, cawa henga ga mudagi dang ga ddisin andang kebung ca pena ’eno.

⁹ Nô lé yaga a dang ddang com: Henga ga Kumu yé waldong wang kandia arin carara na, ji togegé henga ga ddisin ’eno.

¹⁰ Ké lé henga lé mam main kain caigé subu. Kardené ké aigé dang ni mam.

¹¹ A kiddin lé kerab na, kalang subu ga ké ba gigigé a Sésaré, dang ’eré tumu gulong go ’enung ba gesin kené wa darang.

¹² Habé ga Kumu kai yeng wa, ’enunga ’erang nagé, ’enunga lo liling ’eno. Karmeng ga jis lé kua sai ’yang nang a Sésaré. Niang nagé mam andong ta Kornél gulong.

¹³ Ddi yéni wa: Ddia sol kangito go Kumu koi dang ’eré tai gulong, kondia yei wa: Ddia gi a Jopé tega Simon go ké ba di tembaldi Piér kondia ’erang.

¹⁴ Ddi da yein kual go ji dang kalang ga tain gulong da minyé mam.

¹⁵ Kiddin ga ’enung ba osum yo kual na, Habé ga Kumu kai gesin caigé main ké ba gesinyang caina kené tumu mam kain.

¹⁶ Kardené ’enung ’eremang kual go Bagulong koi go ba yei wa: Jâ desé kalang to kang, ama keng na, ka desegeng danga Habé ga Kumu kai.

¹⁷ Kumu bigé kalin main ddi ba benang kiddin ga na ba bu cindi ca Bagulong Jésu Krist kain, ’enunga wang go mainyang Kumu ga?

¹⁸ Kiddin ga ké ba jé kual kain na, ddaindigé jalgé juam, ké debain Kumu, ké yé wa: Kumu ddé kalang ga toigé ddang ca kandia bega kebegé, ca kandia waia jomé goang cindegé bera kuddum.

Yaué go Kumu koi a Antiog

¹⁹ Ca gelé go cin go ba sai kiddin ga ké ba deddu Etién na, kalang ga bo cindi ddasindé ddein ddein. Ga pena a duroigé ’yé Pénisi, dang Sipré, dang Antiog. Ké dor kual go Kumu koia gusu ga Juib mera.

²⁰ Ama kalang ga bo cindi ga pena a Sipré dang Serén ’yé Antiog. Ké dorgé kalang ga toigé ddang Nô do Ddari do Bagulong Jésu toi.

²¹ Dono do Bagulong toi jomang nagé. Kalang combu bu cindi, ké biga caigé gusu Bagulong.

²² Yaué go Kumu koi a Jorsalem jé nô do henga lé togé, kardené ké gi Barnabas ’yé Antiog.

²³ Kiddin ga ddi ba waigé na, ddi sol ca Kumu si busu ca kalang ga bo cindi lé, gusi mowi combu. Ddi bigé dono ca kandi mam na jima geddang ca Bagulong dang ddainya pena.

²⁴ Barnabas na kema go ddari, ddi wonang Habé ga Kumu kai dang bo cindi nai, kalang combu ’yé gusu Bagulong.

²⁵ Kardené Barnabas sai ’yé Tarsé ca daré Saul.

²⁶ Kiddin ga ddi ba waii na, ddi goli ’yang nai Antiog, ké ca’ jom kené ddegelé pena dang yaué go Kumu koi. Ké gel kalang combu. Ké osum té anjama, ga Krist kai a Antiog.

²⁷ Duro wolé lé na, ga cogelé kebu go Kumu koi a Jorsalem ’yé Antiog.

²⁸ Go pena a duroigé go ké ba tei Agabus sai ’eré dang. Ddi yé kual dang dono do Habé ga Kumu kai togé, ddi yé wa: Bagedara do tungu da ba duro delinya mam. (Bagedara lé ba duro saman do go ddo ca Kulod toi.)

²⁹ Anjama nyan kual dang gusugé ca kema goni goni kau, na bu henga bbala ca dono doi, ca ka giang jégené karmegé ga a Judé.

³⁰ Ké lé main kain, ké gi Barnabas kang Saul dang henga lé gusu gemdong ga a Judé.