GIÉ GO PAJERONG GA GIÉ KOGÉ 10 - Kebu go dore go herua 1978

Piér kang Kornél

¹ Kema go pena wo kené a Sésaré go ké ba tei Kornél, ddia gumu go asengeriyong ga Rom aru kogé a ca gesong ga Itali.

² Ddia kema go meré Kumu, ddi melawu Kumu dang kalang ga tai gulong mam. Ddi jégen Juib ga pena ga nyagé combu bua, ddi ol Kumu waindo waindo bu’.

³ Teba ca do borndo na, ddi sol kangito go Kumu koi duro soné beram beram, kangito lé andong tai, ddi yei wa Kornél.

⁴ Kiddin ga ddi ba sol kangito lé na, ddi lé muro, ddi ’engeri wa: Bagulong, na wa ga? Kangito lé jogu yei wa: Kumu jé olé goin dang jégené goin go ji wa jégené kalang ga nyagé bu’, ddi wa ’erem cain.

⁵ Ji gi kalang cakcak kua ’era Jopé, dda ké tegang Simon go ké ba di tembaldi Piér.

⁶ Ddi gesin wo ta Simon go hongé sumu do dalba, gulong goi wo kebu kurai go gumu go ddoaga.

⁷ Kiddin ga kangito go yo kual dang nai ba ’yé na, Kornél tega kai ga gié sua, dang asengar goi go pena go meré Kumu.

⁸ Ddi yégé kual go ba waii mam, kardené ddi sai gigé ’yé Jopé.

⁹ Waindo kiddin ga ké wo duro giyong to gulong go Jopé ’yoab na, Piér nai ca kulu dang, dang teba duro gulong.

¹⁰ Kurang lei, ddi dar henga ga do, ama kiddin ga ké wa loi do dé na, soné lei beram beram.

¹¹ Ddi sol dang hangong, henga wol main badigé ga gumu kain wa gesinyang dugo ca gesong dang temdigé poddin.

¹² Kemané cindegé kaindigé kaindigé ga gondigé poddin poddin bua, dang henga ga nyarang ddaindigé bua, dang ceddong cindegé kaindigé kaindigé wo duro badigé lé.

¹³ Ddi jé nô yei wa: Piér, sa dang, deddu da,

¹⁴ Ama Piér jogu yei wa: Bagulong, ’enung da henga ga mudagi dang ga ddisin ca pena ’eno.

¹⁵ Nô lé jogu yei com: Henga ga Kumu yé waldong wang kandia arin carara na, ddo ji togégé henga ga ddisin ’eno.

¹⁶ Ké lé henga lé main kain caigé subu. Kobegépadda ké ai henga lé dang ni.

¹⁷ Piér wa ’eremé ca soné go beram beram go ba lei lé toia mena ga? Ama a duro kiddin lé kerab na, kalang ga Kornél ba gigigé wa ’engeré Simon gulong goi, kang ’eré wo tumu gulong.

¹⁸ Ké tégé, ké ’engergé wa: Simon go ké ba di tembaldi Piér gesin wo ba kua ga?

¹⁹ Kiddin ga Piér wa ’eremé ca soné go beram beram go ba lei lé dé na, Habé ga Kumu kai yei wa: Sela, kalang subu wa darein.

²⁰ Ji sa gesin dugo ’erang nagé, ji lo liling ’eno, cawa na ’enunga giegang.

²¹ Kardené Piér gesin dugo ’yé gusu kalang lé, ddi yégé wa: Na ’enung go keng wa darang lé kua, keng darunga cawa ga?

²² Ké jogu yei wa: Ni saga a ta Kornél gumu go asengeriyong aru kogé, ddia kema go ddari go melaué Kumu go ga Juib mam ba pedei. Kangito go Kumu koia yoi wa: Kondia tegain, jia ’era wai ca kandi ja kual go jia da yei.

²³ Piér golgé ’yang nagé gulong, ddi légé do, ké wol gusi. Waindo ddi sai kang ga nagé ’yé, karmei ga pena ga a Jopé bei ’yé kang ga nagé.

²⁴ Waindo ké gesin Sésaré, Kornél wa amegé, ddi té kalndi dang kajanderndei gusi.

²⁵ Kiddin ga Piér caga na, Kornél sai yali, ddi aserang tumoi dugo.

²⁶ Ama Piér ’yomi dang yei wa: Sa dang, ’enung kaua kema bu’.

²⁷ Kardené ddi yé kualang Kornél, ddi andong gulong, ddi wai kalang combu dang yaué tumoi.

²⁸ Ddi yégé wa: Keng sol ca hada do ga Juib togé, ké go oré gusu kema go toi ddang ’eno bua, ddi go andong tai gulong ’eno bu’, ama Kumu gelung ca ’enunga togé kema goni goni medagi, kau ddisin ’eno bu’.

²⁹ Na ca ma kiddin ga keng ba gi teng ca ’enunga ’erang na, ’enung kainya ’eno. ’Enung dar ca jo dé, keng teng ’enunga ’eranga cawa ga?

³⁰ Kornél jogu yei wa: Labega wolé subu dang teba ca borndo main kain lé kua kerab, ’enung wa olé, kuabang padda kema go pena dang ’eré tumang dang badigé ga piong biddid biddid.

³¹ Ddi yeng wa: Kornél, Kumu jé olé goin bua, ddi ’erem ca jégené goin go ji wa jégené kalang ga nyagé bu’.

³² Ji gi kalang ’era Jopé ca ké tegang Simon go ké ba di tembaldi Piér, ddi gesin wo ta Simon go hongé sumu do dalba, gulong goi wa kebu kurai go gumu go ddoaga.

³³ Kobipadda ’enung gi kalang ca darein, ji lé ddar, ji caga. Cakcak kua ni mam wa tumu Kumu ca ni jo kual mam go Bagulong ba yein ca jia yani.

Piér dor kual ta Kornél gulong

³⁴ Piér osum ’yo kual, ddi yégé wa: Cakcak kua na, ’enung sol cindi Kumu para kema ’eno.

³⁵ A to kalang gani gani mam, kema goa meré Kumu, ddi lé henga ga geddang na, Kumu gusi ca mowoi cai.

³⁶ Keng sol kual go Kumu ba gii gusu kalang ga Israél, ddi dorgé Nô do Ddari do jali juam do Jésu Krist toi, ddia kalang ga Bagulondigé mam.

³⁷ Keng sol kual go ba aju ca gesong ga Judé mam, go ba osum lé a Galali kiddin ga Jâ ba dor kual go desé kalang to kang.

³⁸ Keng sol ca Kumu bé dono do Habé gai ca Jésu go Nasarat bua, keng sol ca Jésu dal kiddin mam bu’. Ddi lé gié go ddari, kalang ga Sidan dang dono caigé na, ddi bigé labia mam, cawa Kumu wo kenang nai.

³⁹ Nia ga yo hendé ca henga lé mam ga ddi ba légé ca gesong ga Juib kagé, dang a Jorsalem bu’. Ké bbobeli ca sia go adegelé, ké deddi.

⁴⁰ Ama wolé subu Kumu beliang cindi a duro ga maré, ddi bi dono ca kondia gel gusi cin kalang.

⁴¹ Na cin kalang mam ’eno, ama na cindini ni ga Kumu ba parni ga yo hendé doi, kiddin ga Kumu ba beleiang cindi a duro ga maré na, niang ga nagé di bua, ni si bu’.

⁴² Ddi sini ca nia duragé kalang kual bua, nia yagé ca na kondi go Kumu ba pari ca kondia kaida kual ca kalang gang cindegé bua, ca kalang ga maré bu’.

⁴³ Ga cogelé kebu go Kumu koi mam yé hendé doi, ké yé wa: Kema goni goni goa bu cindi cai na, ddia wai burogé ca isinwa doi dang Gusondi dono doi.

Habé ga Kumu kai gesin ca kalang ga toigé ddang

⁴⁴ Kiddin ga Piér wa doré kual dé na, Habé ga Kumu kai gesin ca kalang ga ba jé kual lé mam.

⁴⁵ Juib ga Krist kai ga ba ’yang Piér na, ké sol kagelokemo ca Kumu ba bigé kalang ga toigé ddang Habé gai ga arin carara bu’.

⁴⁶ Cawa ké jé ké wa yo kual dang kebu go ddang bua, ké wa debainyé Kumu bu’, kardené Piér yé wa:

⁴⁷ Cakcak kua kalang lé ’yé Habé ga Kumu kai main nana kain. Na wanga bbalé ca naregé desé to kang ga?

⁴⁸ Ddi yégé kandia desegé to kang dang Jésu Krist gusondi. Ké oli kondia wula gusugé sam dé.