GIÉ GO PAJERONG GA GIÉ KOGÉ 1 - Kebu go dore go herua 1978

Kebu go doré go ca Habé ga Kumu kai da ’erga

¹ Kermeng Tiopil, duro maktub duang do tumu na, ’enung pasu henga mam ga Jésu ba osum lo, dang kual go ddi ba osum gelé,

² bera wolé go Kumu ba aii ni dang. Kiddin ga ddi ba ji ’yoab ca oré dang na, pajerong gai ga gié ga ddi ba pargé na, ddi yégé kual dang dono do Habé ga Kumu kai togé.

³ Kiddin ga ddi ba ma na, kardené ddi gel gusi cindegé dang cindi, dang henga ga hendé combu wolé combu. Ddi yégé kual ca Leu do Kumu toi.

⁴ Wolé go pena kiddin ga ddi ba jomang nagé kebu do na, ddi yégé wa: Kandia ddo Jorsalem ’eno, ama kandia ama kebu go doré go Ba koi go ’enung ba yegeng dang nai tumu.

⁵ Cawa Jâ desé kalang to kang, ama wolé jia bbani, kiddin ga Kumu da desegeng danga Habé gai ga arin carara.

Jésu nai tol dang ni

⁶ Ké ga ba yau dang Jésu na, ké ’engeri wa: Bagulong, ji ca jogang Leu ca bogé ga Israél cakcak kua ga?

⁷ Ddi yégé wa: Na caigeng ca solé saman dang kiddin ga Ba ba sigé dang dono ’eno.

⁸ Ama kiddin ga Habé ga Kumu kai da gesingu caigeng na, keng da wai dono, keng da yé hendé duang a Jorsalem, dang Judé mam, dang Samari bera delinya toa do karé gula.

⁹ Kiddin ga Jésu ba yégé kual lé na, Kumu aii dang ni. Kiddin ga ké wa solé dé na, meddalin ’yei kaii a cindegé cong.

¹⁰ Kiddin ga ké wa dingé dang a kiddin ga ddi wa oré kené na, kalang sua ’erga cindegé dang badigé ga burong.

¹¹ Ké yégé wa: Keng kalang ga Galali, keng ’eré ca dingé dang kainya cawa ga? Jésu lé kua go Kumu ba aii a duroigeng toli dang kua na, ddia jiga main keng ba soliang oré goi dang kain kua rés bu’.

Ké par kema baima Judas

¹² Pajerong ga gié lé sai a ca kubung goang taber boi caigé jogu Jorsalem. Kubung lé kang Jorsalem duroiga ’yoab bbal oré main guaddang dubu pena.

¹³ Kiddin ga ké ba andong Jorsalem na, ké nai duro kulu go porio dang, na kiddin ga ké ba jomdé kené. Piér, dang Jâ, dang Jak, dang André, dang, Pilip, dang Tomas, dang Bartélemy, dang Matié, dang Jak go Alpé kurondi, dang Simon go Sélot, dang Judas go Jak kurondi.

¹⁴ Ké mam gom olé waindo waindo, kang kandu ga pena dang Maram do Jésu ’yoi, kang karmei bu’.

¹⁵ Duro wolé lé kalang ga bu cindi yau, ké main aru dang to sua kain, Piér sai ’eré duroigé, ddi yégé wa:

¹⁶ Kermeng, kual go Habé ga Kumu kai ba yei kebu Dabid a duro cidab do Kumu toi, ca kual go Judas go ba gol kalang ca ’yomé Jésu na, na gad kual lé ser toiné.

¹⁷ Tumu ké gesia duroina, ddi wai gié goi a duro gié guana lé bu’.

¹⁸ (Kema lé kel yagé dang laré go ddi ba waii ca gié goi go isini, ddi aserong dugo dang cai a duro yagé lé, ddi andong tung, kederei ga karang bé dong sein.

¹⁹ Kalang ga Jorsalem mam, ké sol henga ga ba lé, ké té yagé lé dang kebu gogé Hakeldama, to do poré, na yagé go kebar.)

²⁰ Cawa ké pasu a duro cidab do kera wa: Dda gulong goi ja bodo, Ddo kema pena jomé kené ’eno. Ké pasu com wa: Dda kema go ddang ’ya gié goi.

²¹ Na gad keng par kema a duro ké ga ba ’yang nana tumu, a duro wolé mam go Bagulong Jésu ba dal kiddin dang nana.

²² Din dang kiddin ga Jâ ba disei to kang, bera wolé go ké ba aii duroina ’yang nai dang ni, na gad kema pena a duroigé jom dang nana, ca yo hendé do belé goi goang cindi a duro ga maré.

²³ Ké par kalang sua, na Josép go ké ba tei Barsabas, ké di tembaldi Justus, kang Matias.

²⁴ Kardené ké mam ol, ké yé wa: Ai Bagulong ji go solé kalang ddaindigé mam, kalang ga sua lé kua na, ji gelni kema go ji ba pari a duroigé.

²⁵ Ca ddi belu paja go gié baima Judas, na ddi go ba ddani ca oré kiddin gai.

²⁶ Ké bé woddengeleng, to ba ca Matias, ké gesi duro pajerong ga gié ga moac ca pena.