2 Timoté 4 - Kebu go dore go herua 1978

¹ ’Enung sin tumu Kumu dang Jésu Krist gusondi, na ddi go da kaidé kual ca kalang gang cindegé bua, dang kalang ga maré bu’, kiddin ga ddia ’ergang Leu doi.

² Ji dura kual go Kumu koi, kau kiddin nia ddar, kau kiddin nia isin, ji duraiang osé go gusin, ji ’imagang kual bua, ji bberajagé bua, ji gejagé bua, ji gelgé dang ’yomé go ddaindin bua, dang angal mam bu’.

³ Cawa kiddin wa orang ga kalang da dar ca ka jo kual go gelé go cindi ’eno, ama ka kobua tabelang dogé bua, ka yau ga gelé kalang toigé ca gelegé henga ga ké ba dar jo.

⁴ Ké dar ca ka jo kual go cindi ’eno bering, ka boi caigé ca kobé lingé dogé.

⁵ Ama ji, ji jima go gelé ca gusin duro henga mam, ji ’ima gusin duro gelé go cin bua, ji la gié goin go doré Nô do Ddari bua, ji kara gié goin go Kumu koi bu’.

⁶ Ama ca kuandang na, kiddin jia ’yoab ca ké walang tibé, cawa kiddin bbal ga ’enung da ma.

⁷ ’Enung worin kembel worinyé go ddari bua, ’enung geré, geré go bogé wuréjé ka toiné gula bua, ’enung magu bo cindi bu’.

⁸ Ama cakcak kua na, boié go ca gié guang wa amang wo kené, na gundu go geddang go Bagulong go kaidé kual go geddang da bung a duro wolé lé na, ddia bunga ’enung mera ’eno, ama ddia bigé ké ga wa amé jogang dang kederé ’yo.

’Yobé go Paul koi

⁹ Ji biang gusin ’erang waiang kala.

¹⁰ Cawa Demas ddeng, cawa kederei ’ya henga ga delinya ka ga cakcak lé kua. Ddi tol Tasalonika, Krésé tol Galat, Tit tol Dalmatié.

¹¹ Luka joang nang mera, ji gulang Mark, ’erangang nai, cawa ddi bbal jégénang duro gié guang.

¹² ’Enung gi Tisik tol Epés.

¹³ Kiddin ga jia ca orang na, ji nyimung dang badegé gang ga gumu ga ’enung ba ddégé a Troas ta Karpus, dang cidab duang bu’, ama henga ga ’enung ba ddarégé nain na, na cidab do bbala.

¹⁴ Alésandré go nyirdé julong na, ddi leng henga ga isini nain. Bagulong da boii bbal ca gié goi.

¹⁵ Ji la angalang nai bu’, cawa ddi main kual goni bbani ’eno.

¹⁶ Kiddin gang ga doré kual cang cong go tumu na, kema pena ’er durdung ’eno, ké mam ddeng, ’enung ol Kumu ddo ddi so isinwa do ba lé caigé ’eno.

¹⁷ Ama Bagulong ’eré durdung, ddi bung dono ca ’enunga dura kual carara ca kalang ga toigé ddang mam ja, ddi boddung a kebu gijang.

¹⁸ Bagulong da minyeng a duro isini doni doni mam, ddia mageng bera ’yang nang duro Leu doi a dang ni. Dda na boi hormo bera kuddum, Amin.

Labia do karé

¹⁹ Ji la Preskila kang Akila dang Onisipo gulong goi labia.

²⁰ Arasté jom wo Korint. ’Enung ddé Tropim wa a Milé, cawa ddia hoamya.

²¹ Ji bia gusin, ’erang tumu marasin. Abulus, dang Pudein, dang Linus, dang Kolodia, dang karmena kané mam legeng labia.

²² Dda Bagulong jimang nain. Dda wai do Kumu toi jimang nain bu’.