2 Timoté 2 - Kebu go dore go herua 1978

Asengar go geddang go Jésu Krist koi

¹ Kurandang, ji ’er usa gag ca wai do nang na daiang Jésu Krist.

² Henga ga ji ba jégé ga ’enung ba dorgé tumu kalang ga hendé combu na, ji bigé kuaba kalang ga geddang ga bbal ca gelé kamdigé bu’.

³ Ji ’ya gelé goin go cin main asengar go geddang go Jésu Krist koi kain.

⁴ Asengar go worinyé kembel na, ddi nia dar ca wowé go ddo ca gusi na, ddi go ’eremé ca henga ga ddi da ddégé kardi ’eno.

⁵ Kema go bogé wurajé a duro kiddin ga geré, ama ddi nia kuba so go geré koi tem ’eno na, ddi go waié boié goi ’eno.

⁶ Kema go yagé dang gelalé, ama a kiddin ga walé gasa ddia go do gasa caigé ga tumu jua.

⁷ Ji ’erem ddara ca henga ga ’enung wa yoin, cawa Bagulong da bin narua do solé henga toigé mam.

⁸ Ji ’eremang Jésu Krist ga Dabid moindi, na ddi go ba belang cindi a duro ga maré, main Nô do Ddari do ’enung wa doara ba yanang kain.

⁹ Na ca ma, ’enungang gelé go cin kua ca Nô do Ddari do ’enung wa doara, ké saddung dang kunja main kema go isini kain, ama kual go Kumu koi saddu dang kunja ’eno.

¹⁰ Na ca ma, ’enung ’yom gusung ddar duro henga mam, ca kalang ga Kumu ba pargé da waia minyé go Jésu Krist koi, dang hormo do bera kuddum bu’.

¹¹ Kua, na kual go geddang: Na nia ma dang nai na, na da jomang cindena dang nai bu’.

¹² Na nia ’yom gusuna duro gelé go cin na, Na da di termala daiang nai bu’, Na nia kainyi cong na, ddia kain na cong bu’.

¹³ Na nia jima ga geddang ’eno kau, ddia go geddang, Cawa ddi bang go kainyé gusi ’eno.

Go gié go geddang

¹⁴ Ji henu kalang mam ca kual lé, ji yagé tumu Kumu, ddo ké lo bojé ca kual goni goni ’eno, cawa bojé na, hamba doi wo ’eno, ama bojé kaia kalang ga jo kual.

¹⁵ Ji ’ima gusin pijag duro gesaué tumu Kumu, ca ddi ’yain main kema go geddang go basé dasi ca gié goi kain bua, go doré nô do cindi kerab kain bu’.

¹⁶ Kual go mainyé go kalin go tebena dang bo cindi na, ji kainyai cong, cawa ddi kai kalang hasang Kumu.

¹⁷ Gelé gogé mainya ’ya do banjil do do kema tebai kain, Haimén kang Pititus wo kené duro kalang lé.

¹⁸ Ké nyirain cong a duro kual go gelé go cindi. Ké kai kalang combu duro bo cindi cawa ké yé wa: Belé guana goang cindena a duro ga maré hal ’enda.

¹⁹ Ama to do debé do Kumu toi na, go toinyang ’eno, to ’era gag. Kual go pasang genjer cai yé wa: Bagulong sol kalang gai, kema goni goni nia go Bagulong koi na, ddai ddi kainya isinwa cong.

²⁰ A duro kulu go gumu na, na baserong ga luguinya, dang doarna, ka jomé kené mera ’eno, ama bugur go sia, dang dalin go gunyung kau wo kené bu’. Kané ga pena ca wolé go soré go gumu, kané ga pena ca gié go kalin.

²¹ Kema nia belé gusi arin carara a duro isinwa doni doni na, ka lé gié go gumu dang nai, cawa ddi bu gusi mam kuaba Bagulong, ca boié gusi kala ca lo gié go ddari goni goni mam.

²² Ji kainya tabelang do marnai do muriu cong, ji dara geddang, dang bo cindi, dang kederé ’yo, dang jalua juam, dang kalang ga olé Bagulong dang ddainya do arin carara.

²³ Kual go mainyé go kalin go mader na, ji kainyai cong, cawa ji sol karé go kual lé koi na, tega bojé.

²⁴ Ddo kema go lo gié go Bagulong koi na, ddi lo bojé ’eno, ama golgo ddi jima kema go jali loag loag gusu kalang mam, go bbala gelé kalang dang angal.

²⁵ Go géjé kalang ga lo tebena dang naiang tumo do jali juam. Kumu da bigé bogé go kebegé ca kandia sela kual go cindi toi carara laiga.

²⁶ Main kain na, ka minyé gusugé a duro cendu go Sidan koi go ddi ba ’yomgé, ca kandia la kederé daré gai.