2 Tasalonisié 2 - Kebu go dore go herua 1978

Kema go isini

¹ Karmeni, ni olgeng ca kual go jogang go Bagulondena Jésu Krist koi, dang yaué guana gusi.

² Ddo kema pena lamegeng kala kala dang solé go kegero duro ’eremé gogeng ’eno, ama kalanga lamegeng dang kebu go cogelé, kau dang kual go yo laiga, ké yegeng wa: Nia pasang kual lé duro maktub ca wolé go Bagulong koi, na caga ka’ laiga.

³ Ddo kema pena lamegeng kaiegeng ca kual pena ’eno, cawa wolé lé go orang go tumu jua ’eno, kembel go to do karé dang kema go isini go da basong cong lé na, ka go lo tumu jua.

⁴ Ddia tebenang henga ga kalang wa melauégé mam bua, ddia tebenang henga mam ga kalang ba solgé main ga Kumu kai kain bua, ddia jom ca henga lé mam bua, ddia andong duro kulu go yaué go Kumu koi bu’, ddia yé wa: Ddi banga Kumu.

⁵ Kiddin ga ’enung kené ba jomang nageng tumu na, ’enung yegeng kual lé kua, keng ’erem cai ’eno ga?

⁶ Keng sol kual go ba nar henga lé ca andong waldong wang cakcak kua, na ca kiddin gagé bbala ’eno dé.

⁷ Dono do mendem do kema go isini lé toi wa lo gié ’enda, ama ddi bbal ca lo gié lé karé ’eno, bera ddi dor henga ga narei lé cong jua.

⁸ Kiddin ga kema go isini lé da andong waldong wang na, Bagulong Jésu da deddi dang pié go kebi, ddia toinyi cong dang arinwa doi do ddia ’ergang na bu’.

⁹ Kema go isini lé da ’eranganga dono do Sidan toi, ca lo gié go dono go kagelokemo goni goni mam, dang henga ga gelé ga poi bu’.

¹⁰ Ddia ’ergang babé go isini goni goni mam ca kalang ga ba kaiyong. Ka kaiyong ca ké ’ya kederé ’yo ga cindi ga ca minyégé ’eno.

¹¹ Na ca ma, Kumu gi dono do kaiégé ca kandia bu cindia ca kual go poi.

¹² Main kain na, kalang mam ga ba ’ya kual go cindi ’eno, dang kalang ga gusugé ba mowégé dang isinwa na, Kumu da kaidé kual caigé.

Ké pargenga ca minyegeng

¹³ Karmeni, keng ga Bagulong kederei ba ’yegeng na, na ddar ni lei Kumu désé caigeng waindo waindo basé wadé, cawa Kumu pargenga keng tumu jua ca minyegeng a gusu Habé gai, ca belegeng kalang ga Kumu kai, ca keng ba bu cindi ca kual go cindi.

¹⁴ Kumu tegageng ca henga lé kua a gusu Nô do Ddari do ni ba dorgeng dang na, ddi tegagenga ca keng waia boié gogeng a duro hormo do Bagulondena Jésu Krist toi.

¹⁵ Karmeni, na ca ma ga ’ergeng gag, keng ’yom gelé goni go ni ba gelgeng dang nai dang dang, kau go ni ba gelgeng dang kebni, kau go ni ba pasegeng dang nai duro maktub.

¹⁶ Dda Bagulondena Jésu Krist bang gusi, dang Baina Kumu go kederei ba ’yana, ddi bena dono do oré tumu tumu waindo waindo bua, dang tugoié go ddari ca wai doi bu’.

¹⁷ Dda ddi jala ddaindegeng, ca keng ’er gag dang dono do ca lo gié go ddari goni goni mam, dang kual go yo bu’.