2 Piér 2 - Kebu go dore go herua 1978

Kalang ga cogelé kebu ga poi dang ga gelé ga poi

¹ Main kalang ga cogelé kebu ga poi ba sai a duro kalang kené tumu kain na, ga gelé ga poi da sai duroigeng main kain bu’. Ka gelgeng gelé go poi dang bandu ca toinyegeng bua, ka kain Bagulong go ba minyégé cong bu’, ka ’ergang basong caigé kala cab.

² Kalang combu da kobegé duro isinwa dogé. Ca henga gagé ga lo na. Kalang da yé kual go melaui ca giyong go cindi.

³ Ca tabelang do laré toi na, ga gelé ga poi lé da dorgeng lingé do kalang togé ca lamegeng, ama ké kaidé kual caiga tumu din ’enda bua, go basegé cong wia kung ’eno bu’.

⁴ Cawa Kumu sela kangiyong ga ba lé isinwa nyageigé ’eno, ama ddi bégé cin tua do kerbinya, a kiddin ga ddi ba saddigé dang kunja duro delem ca golé wolé go kaidé kual.

⁵ Kumu sela delinya do tumu nyaga ’eno, ama ddi poi kang nain ca kalang ga delinya ga isindong. Ddi minyé Noé go doré nô go geddang daiang kalang ga pena jurgum jurgum mera.

⁶ Kumu kaidé kual ca Sodom dang Gomora, ddi ’ulgang tua. Henga lé bega kalang ga isindong solé ca henga ga isini da waigé.

⁷ Ddi minyé Lot, cawa kederei homi ca henga ga lo ga isini ga kalang ga isindong légé.

⁸ Cawa kema go geddang lé na, ddi joma duroigé, ddi wa solé henga gagé ga lo ga isini waindo waindo bua, ddi jang semai bu’, kederei homdei ca henga gagé ga lo ga isini lé bbani ’eno.

⁹ Bagulong sol kual go ca minyé kalang ga merei a duro gesaué bua, ddi sol kual go magé kalang ga isindong to kual go kaidé ca golé Wolé go Kaidé kual bu’.

¹⁰ Ddia kaidé kual go osi ca kalang ga lo tabelang do gusugé do isini bua, dang kalang ga ba kain dono do Kumu toi bu’. Kalang ga gelé ga poi ga ’enung ba yegeng kual gogé na, ké la muro ’eno, ké pedé gusugé bua, ké bigé gemdong ga dang ni hormo ’eno bu’, ama ké nyangdegé.

¹¹ Kangiyong ga ba ddi ga gelé ga poi lang dono kau na, ké ya kual go melaui go nyangdé tumu Bagulong ca ga gemdong gang hormo ’eno.

¹² Ama kalang lé na, ké la ca ’eremé gogé mera, ké mainya gajong ga cong ga ké na wogé ca kandia ’imagé ca deddegé kain bua, ké nyangdua henga ga ké ba sela toigé ’eno bua, ka deddegé mainya ka dedduang gajong ga cong kain bu’.

¹³ Boié gogé na, na gelé go cin, cawa ké gel kalang cindegé bbani ’eno. Gusugé mougé kiddin ga ké wa lo tabelang dogé do isini dang teba ddar bua, kiddin ga ké ba jom kebu do dang nageng na, jomé gogé na dasi ca kual gogé go ba aju bua, gusugé mougé dang babé gogé lé bu’.

¹⁴ Ké ’erema ca solé kandu ga podelo ca lo beliang nagé mera, isinwa lo goa go bbalegé ’eno bering, ké dar ca ’yomé kalang ga mader dang cundu gogé bua, ké si ddaindigé ca cageda do laré toi do isini bu’. Bbesé go Kumu koi wo caigé.

¹⁵ Ké ddé giyong go geddang cong. Ké kaiyong, ké kobu giyong go Balam go Bosor kurondi koi, ddi go kederei ba ’yé cageda do waié laré ca gié go lo go isini.

¹⁶ Ama Kumu beraji ca ddi ba kain jo kual cong. Kura kua yé kual dang nô do kema toi ca naré go cogelé kebu go Kumu koi lé ca lo gié goi go mader.

¹⁷ Kalang lé na, ké mainya tî do basé kang kain bua, main meddaliyong ga kal wa salegé kain bu’. Kumu magu kiddin ga delem do serleg wo kené caigé.

¹⁸ Kiddin ga ké wa yo kual go pedé gusugé waldong wang dang tabelang do gusugé toi lé na, ké lama kalang ga carara ga daré minyé gusugé a duro kalang ga jomé duro wané dang cundu gogé.

¹⁹ Ké dor kebu ca kandia bigé talagai, ama ka goiyong ga isindong ga toanyang, cawa kema goni goni go henga ba ddi cai na, ddi bela guiang go henga lé kogé.

²⁰ Cawa kalang nia minyé gusugé a duro isinwa do delinya toa, ca ké ba sol Bagulong Jésu Krist go minyana, ama ké jogu ’yomgé toingé ddang com na, oré gogé go karu na isin, ddi go tumu.

²¹ Ké nia sela giyong go geddang ’eno kau na, na golgo, cawa kiddin ga ké ba sol giyong go geddang, ama ké jogu terinyang mengaigé a gusu so go ddari go ké ba bigé kobegé na, na isin nain, ddi go tumu.

²² Henga lé na gela kual go kera go cindi go ba yé waldong wang: Gia jogu boi cai di henga ga ddi ba bedeligé. Com, kosiyong do ké ba pelo na, to jogu boi ca ’yé hurobé guso cin kurbo.