2 Piér 1 - Kebu go dore go herua 1978

Waigi do Piér toi

¹ Na ’enung Simon Piér. ’Enunga guiang go Jésu Krist koi dang paja goi go gié bu’. ’Enung pasu maktub la ca kalang ga ba wai bo cindi go ddo wal, main ni ba waii a gusu geddang do Kumu guana, dang do Bagulondena Jésu Krist toi kain bu’.

² Dda waiang jalua juam wura gusugeng tumu tumu, ca solé go keng ba sol Kumu dang Bagulondena Jésu Krist.

Togé dang paré go Kumu koi

³ Ca dono do Kumu toi ma, ddi bena henga mam bbal ca jomé guana goang cindena ca koboi, a gusu solé go ddi ba sena ca na selai na, ddi go ba tana ca na waia hormo dang olum doi.

⁴ Na ca dono doi ma, ddi bena kebu goi go doré go ddari go gumu go ddo wal. Ca kebu go doré go keng ba yei lé na, keng daia penang Kumu duro ’eremé goi bua, keng minyé a duro tabelang do toinyegeng do a duro delinya lé kua ka’ bu’.

⁵ Na ca ma, ga bia gusugeng duro oré gogeng go bo cindi, ga arna bo cindi gogeng dang oré go ddari bua, duro oré gogeng go ddari na, ga arna solé cainé bua.

⁶ Duro solé na, ga bia gusugeng ga arna ’yomé go gusugeng gag cainé bua, duro ’yomé go gusugeng gag na, na arna ’yomé go ddaindegeng cainé bua, duro ’yomé go ddaindegeng gag na, ga arna kobé Kumu ddar cainé bua.

⁷ Duro kobé go Kumu ddar na, ga arna kederé ’yo ca karmegeng nain cainé bua, duro kederé ’yo ca karmegeng na, ga arna kederé ’yo cainé bu’.

⁸ Keng nia lé henga lé kua cainé nain na, keng go lo dabu ’eno bua, keng go bogé gusu basé solé Bagulondena Jésu Krist ’eno bu’.

⁹ Ama kema go la henga lé kua ’eno na, ddia go bibé, ddi sela kiddin suguddong ’eno. Belé go Kumu belei carara a duro isinwa doi do tumu na, ddi guiobi.

¹⁰ Karmeng, na ca ma ga bia gusugeng ca dda keng sela togé gogeng, dang paré gogeng ddara carara. Keng nia lé main kain na, keng go aserong duro isinwa ’eno bering.

¹¹ Main kain na, ké da hangegeng giyong wol ca andong duro Leu do Bagulondena Jésu Krist go minyana toi do bera kuddum.

¹² Na ca ma, ’enung wa henogeng ca henga lé waindo waindo, ama keng sol kual lé ’enda bua, keng ’eré gag ca kual go cindi go keng ba jei bu’.

¹³ Ama kiddin ga ’enungang cindung dé na, ’enung ’erem ca na ddar ’enung solgeng dang hené ca keng ’erem ca kual lé.

¹⁴ Cawa ’enung sol carara ca kiddin jia ’yoab ca ’enunga ddé gusung lé kua, main Bagulondena Jésu Krist ba gelengang kain.

¹⁵ ’Enunga boi gusung ca henogeng, ca kiddin ga ’enung ma na, kenga ’erem caigé.

Kalang ga solé hormo do Krist toi

¹⁶ Kiddin ga ni ba gelgeng ca orang go Bagulondena Jésu Krist koi goang dono na, ni kobua lingé do narua do kalang togé ’eno, cawa ni sol hormo doi danga cindini carara.

¹⁷ Kiddin ga Ba Kumu ba bi hormo na, ni wo kené, ni jé nô do hormo nain do ba yé wa: Kua, na Kurandang go kedereng ba yei go gusung ba mowung cai combu.

¹⁸ Kiddin ga ni ba jomang nai ca kubung go carara na, ni jé nô do ba yaga a dang lé.

¹⁹ Na ca ma, ni si ddaindeni ca kual go ga cogelé kebu go Kumu koi kogé. Na ddar keng si ddaindegeng cai bu’, cawa kual lé mainya tua do arinyé kiddin a duro delem kain, bera kiddin gaiyong ca wolé bua, bera bajar go keddebor arin a duro ddaindegeng bu’.

²⁰ Tumu jua na, ga solé to ddar ca kema pena bbal ca poré kual go ga cogelé kebu go Kumu koi kogé, go ké ba pasi waldong wang dang macai ’eno.

²¹ Cawa kual pena go ga cogelé kebu go Kumu koi kogé go ké ba cogeli na, sa a gusu ’eremé go kema koi ’eno bering, cawa Habé ga Kumu kaia gelé kalang ca kandia cugula kual go Kumu koi go ba saga a gusi.