2 Korintié 8 - Kebu go dore go herua 1978

Bo henga kalin nain

¹ Karmeni, ni dar ca yegeng kual go wai do Kumu toi, do ba lang yaué go Kumu koi a ca gesong ga Masadon.

² Kalang ga geddang ga a kené na, ké ’eré gag a duro gelé go cin go ba légé, ama gusugé mougé bbani ’eno, ka ga nyagé ama ké bu kalin nain.

³ ’Enung yegenga ca ké bu kalin bbal ca dono dogé, ama kardené ké bu cainé com ca kederé daré gagé.

⁴ Ké olniang meregdé ca ka jégené kalang ga Kumu kai a ca gesong ga Judé.

⁵ Ké lé henga lé ddi ’eremé goni, ké bua gusugé ca Bagulong tumu jua, kardené ca kederé daré ga Kumu kai na, ké bu gusugé caini bu’.

⁶ Na ca ma ni ol Tit ca ddi ’era gusugeng, ca ddi jégenageng ca lo gié go wai lé kua main ddi ba lang tumu kain.

⁷ Kenga kalang ga lainyong dang henga mam, dang bo cindi bua, dang doré go kual bua, dang solé kual toi bua, dang hembalua bua, dang kederé ’yo ga keng dang nagé caini bu’. Na ca ma ni dar ca keng jégena kalang nain dang gié go wai lé.

⁸ ’Enung begenga so ’eno, ama ’enung yegenga kual hembalua go kalang ga ddang kogé bu’, main kain na, nia sol gié gogeng go wai alang na go cindi.

⁹ Cawa keng sol wai do Bagulondena Jésu Krist toi, ddia go lainyong, ama ddi belé nyagé caigeng, ca keng belu ga lainyong ca nyagé doi.

¹⁰ Cakcak kua ’enung wa yogenga ’eremé guang, na golgo keng la gié go keng ba si toi lei kalndi, na a gusu gié go lo mera ’eno, ama na a gusu kederé ’yo bu’.

¹¹ Ga lageng gié lé tumu tumu karai dang ’eremé go ddari, main keng ba siang to ca loang kain, ga lageng gié lang henga ga a kobegeng bu’.

¹² Cawa keng nia dang ddainya do ca bo henga gageng na, Kumu ’ya henga ga keng dang nagé kobegeng, henga ga keng dang nagé kobegeng ’eno na, ddi go ddoginyé ’eno.

¹³ Ca jégené go keng wa jégené kalang ga ddang na, ’enung dar ca keng jo nyagé ’eno, ama na ddar ca keng jégena ga nyagé ca keng mam bbala pena.

¹⁴ Cakcak kua keng dang henga combu, keng bbal ca jégené ga nyagé. Kiddin ga keng nia belé nyagé na, ké gang lainyong, ka jégenegeng bu’. Main kain na, keng mam da bbal pena.

¹⁵ Ga lageng main Kumu ba yang duro cidab doi waldong wang kain: Kema goa nyim henga combu na, Ddiang henga nain ’eno, Kema go nyimé henga bbani kau, Ddi wiang henga ’eno bu’.

Tit kang kalang ga bogoi

¹⁶ Ni lei Kumu désé nain ca ddi ba bi Tit tabelang duro ddaindi ca jégenegeng main ni ba lang kain.

¹⁷ Ddi jé olé goni bua, ddi bang danga tabelang nain ca oré gusugeng bu’.

¹⁸ Ni gigeng kermana go pena kang nai, na ddi go yaué go Kumu koi mam ba pedei ca gié goi go doré Nô do Ddari.

¹⁹ Na ddi go yaué go Kumu koi ba pari, ca ddi ’erang nani ca lo gié go wai lé kua ca hormo do Bagulong toi bua, ca keng sela ca ni dar jégené kalang ga pena bu’.

²⁰ Ni lé angalang laré lé kua, cawa ni dar ca kema pena so kual caini ca gié go ni ba lang nai ’eno.

²¹ Ni dar ca lo henga ga geddang tumu Bagulong bua, tumu kalang bu’.

²² Ni gigeng kermana dang nagé, ni gesaué ca combu, ama ni sol ca ddiang tabelang do ca jégenegeng waindo waindo. Kiddin ga ’enung ba yei kual gogeng mam na, ddianga ’eremé go ddari ca jégenegeng ddang com.

²³ Ama Tit na, ddi jomang nang, ddi lé giang nang ca jégenegeng, ama ca kermana ga orang nai na, na ké ga yaué go Kumu koi ba pargé gigé ca hormo do Krist toi.

²⁴ Ga gelgé yaué go Kumu koi mam ca kederegeng ’yégé, main kain na ka sol carara ca ni wa pedegeng.