1 Timoté 6 - Kebu go dore go herua 1978

¹ Dda goiyong mam ga a duro gianduai na, ké la kagulondigé hormo, ca ddo kema pena ddi yo kual go isini ca Kumu gusondi, dang gelé guana ’eno.

² Goiyong gang kagulondigé ga bu cindi na, ké lagé hormo cawa ka karmé, ama golgo ké lagé gié dang duro, cawa ké ga waié cageda a gusu gié gogé na, na ké ga bo cindi gang kederé ’yo gusugé. Sela kua, na henga ga jia gelgé dang doré go kual bu’.

Gelé go poi dang lainyong go cindi

³ Kema go pena nia gel gelé go ddang, ddi nia koba kual go cindi go Bagulondena Jésu Krist koi dang henga gana ga lo ga Kumu kai ’eno na,

⁴ ddi sodu danga pedé go gusi go kalin, ddi sela henga pena ’eno. Ddianga ’eremé goang hoamya do mainyé kual bua, dang bojé bua, dang ddéngi bua, dang kagejé go kual bua, dang nyangdé bu’. ’Eremé go isini go so kual ca kema saga a gusu henga lé bua.

⁵ Dang kual go mainyé go basé karé go kalang ga ’eremé gogé ba tunyong bu’. Ké sela kual go cindi ’eno. Ké ’erem ca ka da lainyong ca henga ga lo ga Kumu kai.

⁶ Cindi, kema ddaindi nia jali ca henga ga lo ga Kumu kai na, na cageda do nain.

⁷ Cawa na aiang henga pena kuabena duro delinya ’eno, na go bbalé aié henga pena a dura jogang ’eno bu’.

⁸ Ama na nia dang do bua, dang badigé bu’ na, henga lé bbalna.

⁹ Ama kalang ga daré henga ga lainyong na, ké aserong duro lamé, dang gelé go cin ca tabelang dogé do isini do combi, do so kalang toinyang ca ké basong cong.

¹⁰ Cawa tabelang do ca laré na, na isinwa doni doni gasara mam, kalang ga pena lé tabelang nain ca ka belé ga lainyong, ama ké kaiyong cong has a gusu bo cindi gogé bua, ké dosu ddaindigé budac dang gelé go cin combu bu’.

Kual go géjé

¹¹ Ama ji, kema go Kumu koi, ji kainya henga lé kua cong mam, ji kuba geddang toa bua, dang henga ga lo ga Kumu kai bua, dang bo cindi bua, dang kederé ’yo bua, dang ’yomé go ddainya bua, dang jalua juam bu’.

¹² Wurinya worinyé go ddari ca bo cindi bua, ji ’ya cin ga bera kuddum bu’, cawa Kumu teinya ca ji jimang cindin lé, kiddin ga ji ba yé kual go bo cindi go ddari tumu kalang ga hendé combu.

¹³ ’Enung sin tumu Kumu, ddi go bo henga mam jomé goang cindegé bua, dang tumu Jésu Krist, ddi go yo hendé do ddari do bo cindi tumu Pons Pilat bu’.

¹⁴ Ji kuba so lé, ji magai carara basé hurobé, bera wolé go Bagulondena Jésu Krist koi go da jiga.

¹⁵ Jogang goi na, na a duro wolé go Kumu ba si kurab, ddia kelma go busu go pena kiddi kiddi bua, kelma go kermeleng kogé dang Bagulong ga Kagulong kogé bu’.

¹⁶ Na ddi pena go jomé bera kuddum go basé maré bua, ddi go jomé duro arinwa do kema pena ’erga guso ’yoab ’eno bu’. Kema pena selaiang cindi ’eno, cawa kema pena bbal ca soloiang cindi ’eno. Hormo dang dono na toi bera kuddum. Amin.

¹⁷ Kalang gang henga ga lainyong ga delinya ka lé kua na, ji yagé ca ddo ké pedé gusugé ’eno bua, ji yagé ca ddo ké so tugoié gogé ca lainyong go halé cong ’eno bu’, ama dda ké si tugoié gogé ca Kumu go buana henga mam cainé cainé ca dda gusuna mouana.

¹⁸ Ji yagé ca ké la ddarua ca dda ké lainyang dang gié go ddari bua, dang wai do gosinyé henga gagé duro gusugé, dang kalang bu’.

¹⁹ Main kain na, ka bbal ddogé lainyong go ddari ca gusugé, ca wolé go wa orang ca ka ’yé jomé goang cindegé go cindi.

²⁰ Ai Timoté, ji maga henga ga Kumu ba binyang nagé ddara, kual go kalin go tebenang bo cindi na, ji kainyai cong, dang mainyé go ca solé go nain go poi bu’.

²¹ Kalang ga pena ’erem ca ka dang solé go nain lé, ama ké kaiyong hasang bo cindi. Dda wai do Kumu toi jimang nageng mam.