1 Timoté 5 - Kebu go dore go herua 1978

Gié go jégené ca kalang ga geddang

¹ Ddo ji bberajé kema go hali ’eno, ama yai kual main kondia bain kain bua, karang ga marné na, ji yagé kual main kandia karmein kain bu’.

² Kandu ga hadelong na, ji yagé kual main kandia ’yoinderein kain bua, kandu ga karang na, ji yagé kual main kandia karmein ga kandu kain dang ’eremé go ddari bu’.

³ Kandu ga wamburong ga nyagé na, ji lagé hormo.

⁴ Ama wambu do pena nia dang karang dang angerda na, dda to gelgé henga ga lo ga Kumu kai ga ddari ca kalndigé tumu jua, main kain na, ka jogang henga bu kalndigé dang moinderégé, kua na henga ga mouwoi Kumu gusi.

⁵ Wambu do nyagé do wa kema go ca jégena ’eno na, to si tugoié gua ca Kumu bua, to ola teba dang soindo ca koindia jigana bu’.

⁶ Wambu do waié do a gusu tabelang do guso na, to danga cindo kua na, to ma maré ’enda.

⁷ Ji sigé ca kandia la henga lé kua, ca ddo ké wo bberajé go dasi ’eno.

⁸ Kema goni goni goa maga moinderei, dang gulong goi ’eno na, ddi mainya kema go ba kain bo cindi cong kain, ddi ddi kema go delinya danga isinwa.

⁹ Wambu do ba la ddegelé to jis ’eno dé, ddo ji pasé gusonda duro maktub do wamburong togé ’eno. Ji ’erem ca wambu do ké ba sola ca to ’ya barua kara kudura ’eno bua.

¹⁰ Ca tondia lé gia ddar bua, ca tondia gel karndo ddar bua, ca tondia bé kergé ddar bua, ca tondia yal kalang ga Kumu kai yalé bua, ca tondia jégen kalang ga duro gelé go cin bua, ca tondia lé gié go ddari goni goni mam bu’.

¹¹ Ama ji pasé wamburong ga gusugé ba ji karmai gusondigé duro maktub do wamberong togé ’eno, cawa kiddin ga tabelang do gusugé nia sai na, ka dar ca ’yo bainyong, ka ddé Krist.

¹² Main kain na, ka wai kual go kaidé caigé cawa ké ddé kebu gogé go doré go tumu cong.

¹³ Ké gel gusugé gié go lo ’eno, ké ’eré ca daldié tumu kalang gulong gogé, ama henga ga isini ga ddo wal na, ké jom ca wadelé kual bua, ka kalang ga gurain ga yo kual ga bbala yo ’eno bu’.

¹⁴ Na ca ma, ’enung ddar ca wamburong ga gusugé ba ji karmai na, ké ’ya bainyong bua, ké wa karang bua, ké aba gulong gogé bu’, cawa ddo kalang ga tebenang nana na, ké yo kual go isini caina ’eno.

¹⁵ Cawa wamburong ga pena boi caigé tol ca kobé Sidan ka’.

¹⁶ Ama kema go bo cindi goni goni nia dang wambu a tai gulong na, ddai ddi jegena, ddi ddo yaué go Kumu koi ninwa cai ’eno, main kain na, yaué go Kumu koi da bbal ca jégené wamburong ga nyagé.

¹⁷ Gemdong ga gelé yaué go Kumu koi ddar na, dda ké ’ya boié cainé kené com, ’enung yé kual ca ké ga lo gié nain dang kual go doré bua, dang gelé bu’.

¹⁸ Cawa cidab do Kumu toi yé waldong wang: Ddo keng so sî go doré gasa guju go wusin kebi ’eno, ké pasu com wa: Go gié bbal ’yo boié goi.

¹⁹ Ddo ji ’yo kembé ca kema go gumu go gelé yaué go Kumu koi, basé hendé do kebu kalang sua kau subu ’eno.

²⁰ Kalang ga lo isinwa na, ji bberajagé tumu kalang mam, ca dda kané kau la muro bu’.

²¹ ’Enung sin tumu Kumu dang Jésu Krist, dang kangiyong ga arin carara, ji kuba gelé lé kerab, ji paré kema goni goni a duro henga gain ga lo ’eno.

²² Ddo ji so kaldin ca kema goni goni ca kondia la gié duro yaué go Kumu koi kala ’eno. Ddo ji daié gusinyang isinwa do kalang ga pena togé ’eno, ji maga gusin arinya carara.

²³ Ddo ji so kang kaindigé mera ’eno, ama ji sa sur kangndo henyé henyé ca hoamya do kederein, cawa jianga hoamya waindo waindo.

²⁴ Na sol isinwa do kalang ga pena toga waldong wang, to ’yega tumu tumu ca orang nagé duro kual go kaidé, ama isinwa do kalang ga pena togé na, toa bé dong kala ’eno.

²⁵ Gié go ddari gel waldong wang main kain bu’, ké ga na ba selagé ’eno kau, ké go wosé ’eno bu’.