1 Timoté 4 - Kebu go dore go herua 1978

Kalang ga gelé kual go poi

¹ Habé ga Kumu kai yana waldong wang, saman toa do karé na, kalang ga pena da ddé bo cindi cong, ké da kobu habé ga kaié kalang, dang gelé go habé ga isini kagé.

² Gelé lé saga a gusu babé go kalang ga poi kogé, kual go duro ddaindigé ma maré main kema uli danga helma do yilé kain.

³ Kalang lé gel waldong wang ca ’yo go gusu na henga ga isini, ké nar do go pena, ama Kumu debu do la ca kalang ga bo cindi ga solé kual go cindi na, kandia ula ma, kandia dagang désé do lo bu’.

⁴ Henga mam ga Kumu ba debegé na, ka ddar, henga ga kainya pena wo ’eno, ama na ’yagé mam dang désé do loi Kumu.

⁵ Cawa kual go Kumu koi dang oli na, belegé arin carara tumu Kumu.

Go gié go ddari go Jésu Krist koi

⁶ Ji nia gel karmein gelé lé kua na, jia go gié go ddari go Jésu Krist koi, main kain na, ji gel waldong wang ca dang kual go Kumu koi bua, dang kual go bo cindi bua, dang gelé go cindi go ji wa koboi bu’.

⁷ Ama lingé do mader do tebena dang bo cindi na, ji kainya cong, ji gaua gusin ca lo henga ga Kumu kai.

⁸ Gelé go gusu na, jégené goia bbani, ama henga ga lo ga Kumu kai danga jégené duro henga mam, cawa ddianga kebu go doré go ca jomé goang cindin go cakcak lé kua bua, dang go da ’erga bu’.

⁹ Kua na kual go geddang go bbal ca ’yo mam dang bo cindi.

¹⁰ Na ca ma, na wa lo gié dang gaué go gusuna, cawa ni si tugoié guana ca Kumu go jomang cindi, na ddi go minyé kalang mam ga ba bu cindi cai.

¹¹ Ji sigé ca gelé lé kua mam.

¹² Ddo kema pena dorein kel ca jia marna ’eno, ama ji jima henga ga ’yogelé ca kalang ga bo cindi, dang kual goin go yo bua, dang oré goin bua, dang kederé ’yo gain bua, dang bo cindi goin bua, dang jomé goin go arin carara bu’.

¹³ Ji guma cidab do Kumu toi dduginya tumu kalang bua, ji duragé kual bua, ji gelgé bera orang guang bu’.

¹⁴ Kalin do Habé ga Kumu kai togé do jiang na, do ga cogelé kebu go Kumu koi ba yé kual gua kiddin ga kalang ga gemdong ba si kalndigé cain na, ji sola semgin ’eno.

¹⁵ Ji ’erem ca henga lé bua, ji lagang dono doin mam bu’, ca kalang mam sela ca ji wa ora tumu tumu.

¹⁶ Maga gusin ddar, la angalang gelé goin, ji ’er usa gag duro henga lé mam, ji nia lé main kain na, jia minyé gusin, dang kalang ga jo kual goin mam bu’.