1 Timoté 2 - Kebu go dore go herua 1978

Géjé ca olé

¹ Kual go tumu na, ’enung olgeng ca keng ula Kumu dang olé go meregdé, dang désé do lo ca kalang mam.

² Ga ulageng ca kermelong, dang ga ddo ca mam, ca na jimageng kalin jang dang jalua juam bua, dang meré go Kumu bua, dang oré go geddang go hormo bu’.

³ Kua na ddar, na henga ga mowoi Kumu go minyana.

⁴ Ddi go ba ddar ca kalang mam na minyu ca kandia ’era duro solé go kual go cindi.

⁵ Cawa Kumu wo kené pena, Bagiyong wo kené pena duro Kumu kang kalang, na Jésu Krist.

⁶ Na ddi go ba bu gusi ca toré kalang mam. Ddi yé hendé la duro kiddin ga kerab, ca Kumu ddar ca minyé kalang mam.

⁷ Na ca lé ma, ké belang paja go gié go gelé kalang ga toigé ddang kual go bo cindi go cindi. ’Enung ya poi ’eno, ’enung ya cindi.

⁸ A kiddin mam ’enung ddar ca bainyong ula, ké nyim kalndigé dang ca olé dang ddainya do carara, basé mainyé do lo, dang ’eremé go bojé bu’.

⁹ Com ’enung dar ca kandu sadda badigé ga bburogé gusugé ddara dang cindegé ga gusugé bua, base temdé kederem ga caigé dang luguinya dang moin do béré bua, dang badigé ga keleigé combu ’eno bu’.

¹⁰ Ama ké la gié go ddari, main kandu gang hendé do mera Kumu kain.

¹¹ Dda kandu ké ’ya gelé kebegé kurad, dang debé go caigé dugo.

¹² ’Enung dda kandu ca kandia gel bainyong, kau kandia la dono caigé ’eno, na ddar ké jom kebegé kurad.

¹³ Cawa Kumu la Adam tumu jua, kardené ddi sai lé Haua karu.

¹⁴ Sidan bandua Adam ’eno, ama ddi babua tama ca tondi kainya kual go Kumu koi.

¹⁵ Tama nia jom duro bo cindi, dang kederé ’yo ga carara dang cindo ga gusugé na, to da wai minya ca karang ga wo.