1 Timoté 1 - Kebu go dore go herua 1978

Waigi do Paul toi

¹ Na ’enung Paul paja go Jésu Krist koi ca so go Kumu go minyena koi, dang Jésu Krist go na ba si tugoié guana cai.

² ’Enung pasu maktub lé kua ca Timoté, kurandang go cindi ca ddi ba bu cindi. Dda Ba Kumu dang Bagulondena Jésu Krist, ké lain wai, dang burogé, dang jalua juam.

La angalang gelé go poi

³ Ji jima Epés main ’enung ba olinyang kain, kiddin ga ’enung ca oré Masadon, cawa ga pena wo kené a kuani ga gelé kual go poi. Na gad ji sigang dono ca ké sugoia.

⁴ Ji yagé ca ké kainya lingé dogé do doré cong, dang ddoginyé go to moinderégé go orangang mainyé, go basé jégené gelé go Kumu koi go na ba soli a gusu bo cindi.

⁵ So lé toi na ca kederé ’yo ’era tumu tumu dang ddainya do carara, dang kual go duro ddainya do ddari, dang bo cindi go basé babé.

⁶ Kalang ga pena ddé kual go ddari lé kua cong, ké kaiyong ca kual go mainyé go mader.

⁷ Ké dar ca ka joma kalang ga gelé so go Kumu koi, ama gelé go ké wa geleiang dono lé kau, na ké gang sela toi ’eno.

⁸ Na sol ca so go Kumu koi na, na ddara ca kema go ba kobiang duro.

⁹ Na sol ké si so la ca kalang ga ddaderong ’eno, ama na ca kalang ga kainyé so bua, na ca kalang ga gaué bua, na ca kalang ga lo wané bua, na ca kalang ga isindong bua, na ca kalang ga basé boi Kumu hormo bua, na ca kalang ga deddé bainderégé kang ’yoinderégé bua, na ca kalang ga deddé temai bu’.

¹⁰ Na ca kalang ga lo béli, dang kalang ga lo béliang kamdigé bainyong bua, na ca kalang ga lo cénegé dang goiyong bua, na ca kalang ga yo kual go poi bua, na ca kalang ga yo hendé do poi bua, na ca henga mam ga tebenang kual go gelé go cindi bu’.

¹¹ Gelé lé wa duro Nô do Ddari do ké ba bungang na, na Nô do Ddari do Kumu go hormo dang busu toi.

Désé ca olum do Kumu toi

¹² ’Enung lei Bagulondena Jésu Krist désé ca ddi ba bung dono do lo gié guang. ’Enung lei désé com cawa ddi ’erem ca ’enung bbal ca lo gié goi.

¹³ Tumu na, ’enunga go yo kual go melauwi gad gad cai bua, ’enung geli cindi bua, ’enung nyangdi bu’, ama Kumu leng olum cawa ’enung la duro solé ’eno. A kiddin lé na ’enunga basé bo cindi dé.

¹⁴ Bagulondena lé wai cang bbani ’eno, ddi bung bo go cindi, dang kederé ’yo ga na ba waigé ca na ba daiang Jésu Krist.

¹⁵ Kua, na kual go geddang go bbal ca ’yo mam dang bo cindi. Jésu Krist ’erga duro delinya ca minyé kalang ga isindong, a duroigé na, ’enung ddigé mam dang isinwa.

¹⁶ Ama Kumu leng olum, ddi ddar ca Jésu Krist gel ’yomé go ddainya mam gusung, ’enung go ba ddi kalang mam dang isinwa, ca ’enung ja henga ga ’yogelé, ca kalang ga da bu cindi cai ca waié jomé goang cindegé go bera kuddum.

¹⁷ Dda na debainyé kelma go bera kuddum, go basé maré, go basé solang cindin, na Kumu go pena kiddi kiddi goang hormo bera kuddum. Amin.

¹⁸ Kurandang Timoté, ’enung bin so lé kua ca sera to kual go ga cogelé kebu go Kumu koi go ba yei cain, ji ’erem ca kual lé ca worinyé kembel go ddari.

¹⁹ Maga bo cindi, dang kual go ddari duro ddaindin. Ga pena kain jo kual go duro ddaindigé cong, na ca ma bo cindi gogé tunyong cong.

²⁰ Haimén kang Alésandré wo duroigé, ’enung bigé Sidan ca ddi gelgé homé, ca ddo ké yo kual go melaui gad gad ca Kumu ’eno.