1 Tasalonisié 3 - Kebu go dore go herua 1978

¹ Na ca ma kiddin ga ni bbala ca ’yomé ddaindini ’eno na, ni sai nyan kual ca ni joma kaindini a Atén.

² Ama ni gigeng kermana Timoté go lo gié go Kumu koi dang nani bua, ddia go doré Nô do Ddari do Krist toi bu’. Ni gii gusugenga ca ddi begeng dono do ’eré gag ca keng ’era tumu tumu ca bo cindi gogeng.

³ Ca ddo kema pena a duroigeng lo muro a duro gelé go cin lé kua ’eno, keng sol ca Kumu senagenga ca gelé go cin lé kua.

⁴ Kiddin ga ni kené ba jomang nageng tumu na, ni yegeng wa: Ka gelna cindena mam. Keng sol ca gelé go cin la caga waiena ’enda.

⁵ Na ca ma, ’enung bbala ca ’yomé ddaindung ’eno, ’enung gi Timoté gusugenga ca ’enung solé oré gogeng go bo cindi. ’Enung la muro ca amalaiga Sidan lamgeng kaigeng bua, gié goni go ni ba lei duroigeng mam bé gusu kalin bu’.

⁶ Ama cakcak kua na, Timoté jiga caga gusuni, yéni nô dogeng do ddari do bo cindi gogeng bua, dang kederé ’yo gageng bu’. Ddi yéni wa: Kenga wa ’eremé caini waindo waindo bua, kederegenga ’yéni bua, kenga wa daré ca kenga soléni main nia wa daré ca solegengang kain bu’.

⁷ Karmeng, a duro homé goni dang delé go cin goni mam kau na, nô dogeng do bo cindi jal ddaindeni.

⁸ Cakcak kua na, gusuni mouni ca keng ba ’eré gag ca Bagulong.

⁹ Na ca ma, ni lei Kumu désé nain caigeng, cawa keng mouni gusuni mam tumoi.

¹⁰ Ni wa oleiang meregdé tebang soindo, ca ni jogé oré solegeng ca gelegeng henga ga ba wiegeng ca bo cindi gogeng.

¹¹ Dda Baina Kumu bang, kang Bagulondena Jésu, ké ddani giyong ca oré solegeng.

¹² Dda Bagulong jégenageng ca kederegeng ’ya gusugeng tumu tumu dang kalang mam, main kedereni ba ’yegengang kain bu’.

¹³ Main kain na, ddi bel ddaindegeng carara ca keng ’er bedang tumu Baina Kumu, kiddin ga Bagulondena Jésu da ’ergang kalang gai mam.