1 Tasalonisié 2 - Kebu go dore go herua 1978

Gié go Paul ba lei a Tasalonisié

¹ Karmeng, keng sol carara ca oré goni go ni ba ’yé gusugeng na, bega gusu kalin ’eno.

² Keng sol ca tumu ké gelni cindini a Pilip, kardené ni ’erga waigeng a Tasalonisié, ama a duro gelé go cin go ba léni nain lé kua na, Kumu beni dono ca dorgeng Nô do Ddari do ba saga a gusi.

³ Ama kual goni go doré na, na go wané ’eno bua, na go ddisin ’eno bua, na go kaié kalang ’eno bu’.

⁴ Ama ni yé kuala ca kederé daré ga Kumu kai waindo waindo, cawa ddi parni, ddi beni Nô do Ddari ca nia dura bu’, ama Kumu sol ddaindini, ni dar ca mowega kalang gusugé ’eno.

⁵ Keng sol ca ni ’yé gusugenga ca mowegeng gusugeng dang kual go lamé ca ’yoang laré gogeng ’eno, ama Kumu na hendé doni.

⁶ Ni dara hormo gusu kema pena ’eno, kau gusugeng, kau a gusu kalang ga ddang ’eno bu’.

⁷ Nianga dono do ddo caigeng ca nia pajerong ga gié ga Krist kai, ni la main kain ’eno, ama kiddin ga ni ba jom duroigeng na, ni jomang jalua juam main karang ’yoigé do ’yolé karndo kain.

⁸ Cawa kederéni ’yegenga ’yo, ni dorgenga Nô do Ddari do ba saga a gusu Kumu mera ’eno, ama ni bua gusuni caigeng bu’, ca nang ga nageng jo gusu pena.

⁹ Karmeng, kiddin ga ni ba jom duroigeng ca dorgeng Nô do Ddari do ba saga a gusu Kumu na, keng sol carara ca ni gelalang gié go lo tebang soindo ca ddo ni ninwa kema pena a duroigeng ’eno.

¹⁰ Kenga hendé doni bua, Kumu kaua hendé doni bu’, ca oré goni gusu keng ga ba bu’ cindi na, na go carara, dang geddang basé wané.

¹¹ Keng sol ca kema goni goni kau, ni lang nai mainya karang baigé ba lang karndi kain.

¹² Ni jalgeng ddaindegeng ca keng ’er gag ca oré tumu tumu ca kederé daré ga Kumu kai, na ddi go ba tegageng ca kenga jima duro Leu doi, dang hormo doi bu’.

¹³ Ni lei Kumu désé waindo waindo ca gié gogeng go pena com, kiddin ga ni ba dorgeng kual go Kumu koi na, keng jei bua, keng ’yei bu’ ca na kual go Kumu koi, keng ’yei main kual go kema koi ’eno. Kual go Kumu koi go cindi lé na, wa lo gié ca keng ga bo cindi duro ddaindegeng.

¹⁴ Karmeng, ké lang nageng mainya ké ba lang kalang ga Krist kai a duro yaué go Kumu koi go a ca gesong ga Judé kain. Keng wai gelé go cin gusu kalndegeng main ga bo cindi kené ba waiang a gusu ga Juib kain bu’.

¹⁵ Ké deddu Bagulong Jésu bua, ké deddu ga cogelé kebu go Kumu koi bua, ké gelni cindini bu’. Ké muai Kumu gusi ’eno bua, ka tebenang kalang mam bu’.

¹⁶ Ké dar ca naréni nia dorgé kalang ga toigé ddang kual ca kandia waié minyé ’eno. Isinwa dogé do cakcak kua na, ddi isinwa dogé do ké ba la tumu din cong, ama cakcak kua mainyé do Kumu toi da ba caigé.

Paul dar ca jogé oré solé ga Tasalonisié

¹⁷ Karmeng, kiddin ga ni ba wo ’eno duroigeng kau na, ddaindeni wa caigeng waindo waindo, ni wa daré ca jogé oré solegeng ddang com.

¹⁸ Ni dar ca nia jogé gusugeng. ’Enung bang Paul na, ’enung gesau main cang sua kain ca ’enunga oré gusugeng, ama Sidan narni.

¹⁹ Keng na, kenga tugoié goni bua, kenga gusu mowa goni bua, kenga gundu goni go nia pedang gusuni tumu Bagulong Jésu kiddin ga ddia jiga bu’ ’eno ga?

²⁰ Na cindi, kenga hormo doni bua, keng gusu mowa goni bu’.