1 Piér 3 - Kebu go dore go herua 1978

Kandu kang konderndégé

¹ Keng kandu, ga debu caigeng to konderndegeng dugo, cawa kalang ga pena a duroigé ga ba bu cindi ca kual go Kumu koi ’eno dé na, keng da waigé a duro bo cindi ca oré gogeng basé keng doregé kual.

² Cawa ke sola oré gogeng go ddari go hormo bua, goang muro bu’.

³ Ddo keng nyané gusugeng dang henga ga ddaderong ga walia mera, main goddé go caigeng go temdé bua, dang bogé go luguinya bua, dang badigé ga hormo ga ddo wal gusugeng bu’ ’eno.

⁴ Ama dda nyané go gusugeng go walia jima a duro ddaindegeng. Walia lé go osinyé ’eno, cawa to saga a gusu habé ga jali juam ga lumag lumag, na henga ga keleigé combu tumu Kumu.

⁵ Kandu ga arin carara ga tumu din ga ba si tugoié gogé ca Kumu na, ké nyan gusuga main kain bua, ké debang caigé to konderndégé dugo bu’.

⁶ Main Sara ba lang kain. To debu ca to Abraham dugo bua, to teia Bagulong bu’. Cakcak kua keng nia lé henga ga geddang na, kenga karndo, keng go yoré muro ca henga pena ’eno.

⁷ Keng bainyong, ga jimageng dang kandigeng dang solé todero dogé bua, keng bigé hormo bu’, cawa ké kaua kamdegeng ga ’yo kalin do Kumu toi do jimang cindegé daiang nageng, ca ddo henga pena naré olé gogeng ’eno.

Gelé go cin wo kené ca gié go geddang

⁸ Kual toi do karé na, keng mam ga jimagengang ’eremé pena bua, ga sela gusugeng nyageigeng bua, kederegeng ’ya gusugeng main karmé kain bua, ga lageng kalang olum bua, ga debu caigeng dugo to gusugeng lumag lumag bu’.

⁹ Ddo keng boié isinwa dang moanda isina ’eno bua, ddo keng boié nyangdé dang mondi nyangdé ’eno bu’, ama ga biageng isinwa danga busu do so caigé, cawa Kumu tegageng danga kebu go doré go sogeng busu caigeng bu’.

¹⁰ Cawa cidab do Kumu toi yé waldong wang: Kema goni goni goa dar ca ddia solé jomé goang gusu mowa waindo waindo na, Ddai ddi yo kual go isini ’eno bua, Ddi yo kual go babé ’eno bu’.

¹¹ Ddai ddi kainya isinwa cong bua, Ddi la gié go ddari baiméné bu’. Ddai ddi dara jalua juam toa bua, Ddi maga bu’.

¹² Cawa Bagulong cindi wa ca kalang ga geddang bua, Ddi ja olé gogé bu’, Ama ddia tebena dang kalang ga lo isinwa.

¹³ Keng nia si ddaindegeng ca lo henga ga ddari ma, na wanga go logeng isinwa ga?

¹⁴ Ama keng nia wai gelé go cin ca henga ga geddang na, dda gusugeng muageng. Ddo keng logé kalang muro ’eno bua, ddo keng solé kegero ’eno bu’.

¹⁵ Ama ga bi Krist hormo a duro ddaindegeng bua, ga selai ca ddia Bagulondegeng bu’. Ga jimagengang nyané go gusugeng waindo waindo ca kema goni goni goa ’engergeng kual ca tugoié gogeng na, keng sai jigang kual yai cainé.

¹⁶ Ga jiga yaga kual go labia dang hormo bu’. Ama ga jimageng danga kual go ddari a duro ddaindegeng, cawa kiddin ga ké wa yo kual go isini caigeng ca oré gogeng go ddari ca Krist na, dda dasi lagé.

¹⁷ Na kederé daré ga Kumu kai ca kenga waia gelé go cin ca gié go geddang na, na golgo, ddi go keng wai gelé go cin ca gié go isini.

¹⁸ Cawa Krist ma caigeng, ddi ma cai pena mera ca isinwa do kalang togé mam, ddia go geddang, ddi ma ca kalang ga isindong ca ddi orang nagé gusu Kumu, ké deddu gusi, ama Kumu beleiang cindi a duro ga maré dang dono do Habé gai togé.

¹⁹ A gusu Habé lé na, ddi ba doré kual gusu habé ga a duro gerngang.

²⁰ To do poré, na habé ga ba kain Kumu kibi cong tumu din, kiddin ga ddi ba ’yom ddaindi wolé go Noé ba habel kuburo go gumu. Kalang ga ba andong duro kuburo ca minyé ca kang na, ka bbani, ka margem mera.

²¹ Kang lé, na kual go kera ca désé go to kang go wa minyegeng cakcak kua, na désé la go pelé ddisin do gusugeng cong ’eno, ama na olé go olé Kumu goang kual go ddari a duro ddaindegeng. Ddi minyegenga ca belé go Jésu Krist koi goang cindi a duro ga maré.

²² Ddi tol dang, ddi jom wo ca Kumu kobi go barua. Ddi wa ca kangiyong bua, dang ga ddo ca bua, dang ga dono bua, dang ga osurdong mam bu’.