1 Piér 2 - Kebu go dore go herua 1978

Keddang goang cindi dang kalang ga arinya carara

¹ Ga ddageng isinwa mam cong, dang poi mam bua, dang babé bua, dang ddéngi bua, dang nyilé bu’.

² Ga darageng kobin ga carara ga Habé kagé, main karang ga ûwâ kain, ca keng malga tumu tumu duro minyé.

³ Main cidab do Kumu toi ba yang waldong wang kain: Keng dobu wai do Bagulong toi ’enda.

⁴ Ga ’erageng gusu Bagulong ’yoab, cawa ddia keddang go jomang cindi go kalang ba kainyi cong, ama Kumu pari cawa ddi gesia go ddo wal.

⁵ Ga ’erageng gusi main keddang go jomang cindi kain ca ké gaddageng kulu go yaué go Habé kogé, ca keng belu ga tibé ga arinyi carara ca tibé Kumu duro habé ga mowoi Kumu gusi ca Jésu Krist.

⁶ Cawa cidab do Kumu toi yé waldong wang: ’Enung par keddang go ddo wal, Go ’enung ba si main keja do debé dalem do kulu toi a duro Sion kain, Kema goa bu cindi cai na, dasi go loi ’eno.

⁷ Keng ga bo cindi na, ddia keddang go ddo wal caigeng, ama ca ké ga ba bu cindi na, Ddia keddang go kalang ga gaddé ba kainyi cong, Ddi belé keja do ddo wal do debé dalem.

⁸ A duro kiddin ga pena na, ké yé wa: Keddang lé na, na go togé kalang gondigé bua, Na kajegala ga aserdégé bu’. Gondigé tega ca ké kain bo cindi ca kual lé, ama ddi banga sogé ca kandia la main kain.

⁹ Ama kenga kalang ga Kumu pargeng bua, kenga ga tibé ga kelma kai bua, kenga kalang ga arinyi carara bua, kenga kalang ga Kumu kai bu’. Ké pargenga ca kenga dura kual ca gié go Kumu koi go ddari go kagelokemo, na ddi go ba tegeng a duro delem ca kenga jima a duro arinwa doi do kagelokemo.

¹⁰ Tumu din na, kenga kalang ga Kumu kai ’eno, ama cakcak kua na, kenga kalang gai. Tumu din na, Kumu lageng olum ’eno, ama cakcak kua na, ddi legeng wai.

Jimageng ga gié ga Kumu kai

¹¹ Kajanderndeng, ’enung olgeng ca kenga kergé ga colang ’ereigeng dang a duro delinya, ga maga gusugeng ca tabelang do gusugeng do wa worinyé kembel dang keudegeng.

¹² Ga ’erageng oré go ddari a duro kalang ga delinya, ama ké nia yé kual go isini caigeng na, ka sol gié gogeng go ddari bua, ka bi Kumu hormo a duro wolé go ddia ’erga bu’.

¹³ Ga debu caigeng dugo to so go kalang kogé goni goni mam bua, dang go ddo ca go dono mam koi bu’, ca Bagulong.

¹⁴ Dang kermelong ga ddo ca ga Kumu ba sigé ca kaidé kual ca kalang ga isindong bua, ddi sigé ca pidé kalang ga lo gié go ddari bu’.

¹⁵ Lageng gié go ddari ca dda kalang ga mamiyong, ké sugaia kebegé kurad, kua na henga ga Kumu kederei ba dargé.

¹⁶ Ga ’erageng main kalang ga talagai kain, ama a duro talagai dogeng lé na, ddo keng bburogé isinwa ’eno, ama ga jimageng main ga gié ga Kumu kai kain.

¹⁷ Ga bigé kalang mam hormo bua, dda kederegeng ’ya karmegeng bua, ga ger Kumu muro bua, ga bi go ddo ca hormo bu’.

’Yugula gelé go cin go Krist koi

¹⁸ Ga gié, ga debu caigeng dugo to kagulondegeng bua, ga hendaragé duro henga mam bu’, na ca ké ga logeng ddarua mera ’eno, ama na ca ké ga gelegeng cendegeng bu’.

¹⁹ Keng nia ’eré gag a duro gelé go cin ca henga ga Kumu kederei ba dargé na, keng mowi Kumu gusi.

²⁰ Keng nia lé isinwa, ké tegeng ca ma, keng ’yom gusugeng na, pedé gogeng wa andi ga? Ama keng nia ’yom ddaindegeng a duro gelé go cin ca keng ba lé gié go ddari na, keng mouia Kumu gusi.

²¹ Na ca ma, Kumu tegenga ca, Krist ba gel cin caigeng ca keng ’yugulai kuba ca gondi.

²² Ddi la isinwa pena ’eno bua, kema ja kual go poi andang a kebi ’eno bering bu’.

²³ Kiddin ga ké ba nyangdi kau, ddi jiga nyangdagé ’eno bua, kiddin ga ké ba geli cindi kau, ddi yagé kual go madera ’eno bu’, ama ddi déngé kual goi mam ca Kumu go kaidé kual go geddang.

²⁴ Krist ’yé isinwa duana gusi ca sia go addegelé, ca na jima main kalang ga maré kain a gusu isinwa bua, ca na jimang cindena jomé go geddang bu’. Na ca yanyong gai ma, keng wai labia kua.

²⁵ Cawa tumu na, keng mainya gamgé ga ba kaiyong kain, ama cakcak kua na, keng jiga gusu go magé gamgé dang go magé keudegeng bu’.