1 Piér 1 - Kebu go dore go herua 1978

Waigi do Piér toi

¹ Na ’enung Piér, paja go gié go Jésu Krist toi. ’Enung pasu maktub lé kua ca bogé kalang ga Kumu ba pargé ga ba ddasindé a ca gesong ga Pont, dang Galat, dang ga Kapados, dang ga Asi, dang Bitini bu’.

² Ba Kumu gabegenga tumu din ca kenga bel kalang gai a gusu dono do Habé gai togé bua, ca keng ja kual go Jésu Krist koi bua, ca keng bel arinya carara ca kebardi bu’. Dda Kumu lageng wai dang jalua juam nain.

Tugoié goang bo cindi

³ Dda na debainyé Kumu go Bagulondena Jésu ca olum doi do combi na, ddi bena jomé goang cindena go herua ca ddi ba belé Jésu Krist dang cindi a duro ga maré. Na ca ma nanga tugoié goang cindi.

⁴ Na ca ma, nanga gusu mowa ca deba doana do Kumu wa maga a dang ni caina, deba lé na, go osinyé ’eno bua, go toinyang ’eno bua, wuraju doa go doarang cong ’eno bu’.

⁵ Keng ga bu cindi na, dono do Kumu toi wa magegeng bera wolé go minyé orang goi, ddi ji ’yoab ca andong dong a duro saman toa do karé.

⁶ Cakcak kua na, ké nia gesauageng dang gelé go cin cindi kaindi kaindi duro saman do bbani kau na, dda gusugeng muageng.

⁷ Gelé go cin lé na, gesua bo cindi gogeng dono doi, bo cindi gogeng belé dona ca gesaué, luguinya do toanyang cong do ké ba gesaué cin tua, main kain na, ka logeng désé dang pidé, dang hormo bu’ a duro wolé go Jésu Krist koi go da jiga.

⁸ Kederegeng ’yei, ama keng selaiang candegeng ’eno dé, ama keng bu cindi cai. Cakcak kua keng selaiang candegeng ’eno dé, na ca ma gusugeng mowegeng combu danga mowa go ddo kual go yo.

⁹ Cawa keng ’ya bo cindi toi do karé go minyé keudegeng.

¹⁰ Ca minyé lé na, ga cogelé kebu go Kumu koi angel toi ca ka soloiang duro, kardené ké cogel kebu ca wai do Kumu da lang nageng.

¹¹ Ké angel kual lé toi ca ka solé saman dang kiddin ga henga lé ddainya da lé, cawa Habé ga Krist kai ga wo ddaindegé ga ba gelgé ca gelé go cin go ka geli Krist bua, dang hormo do ka biang na karu bu’.

¹² Kumu gel kalang gai ga cogelé kebu goi ca kual go ddi ba gelgé lé na, na caigé ’eno, ama kual lé na caigeng. Cakcak kua na, keng ’yé kual lé ka, cawa ga gelé dorgang Nô do Ddari lé danga dono do Habé ga Kumu kai togé ga ké ba gigigé a dang. Kangiyong kau dar ca solé kual lé toi bu’.

Ké tegenga ca kenga jima arinya carara

¹³ Na ca ma, ga ’imageng ’eremé gogeng gag bua, ga jimageng dang angal bua, ga segeng tugoié gogeng mam ca wai do Krist toi do ddia jiga begeng bu’.

¹⁴ Ga jageng kual go Kumu koi, ddo keng oré duro tabelang dogeng do tumu ’eno, cawa tumu na, kenga kalang ga mamiyong.

¹⁵ Ama Kumu go ba tegegeng na, ddia go arinyi carara, ama ga belgeng arinya carara main nai kain duro oré gogeng.

¹⁶ Cawa cidab do Kumu toi yé waldong wang: Ga belegeng arinya carara ca ’enunga go arin carara.

¹⁷ Kiddin ga keng wa olé na, keng té Kumu Ba, na ddi go kaidé kual ca gié go kema goni goni koi mam go ddi ba lei, ddi go meré kema cindi ’eno. Na ca ma, oré gogeng go duro delinya na, ga mer Kumu.

¹⁸ Cawa keng sol ca ké torgeng a duro hada do kalin do moinderegeng togé danga henga ga toanyang main germé dang luguinya kain ’eno.

¹⁹ Ama ddi torgeng danga Jésu kebardi go ddo kelé, ddi go main gagera go bbalé kerab go laddin go basé kenwa kain.

²⁰ Na ddi go Kumu ba gabegai tumu din basé ddi debu delinya dé, ama a duro saman toa do karé do cakcak lé kau na, ddi gelgi dong caigeng.

²¹ Ca kondi ma, keng bu cindi ca Kumu go ba belaiang cindi a duro ga maré, kardené ddi bi hormo nain, na ca ma bo cindi gogeng, dang tugoié gogeng wa ca Kumu.

²² Keng belé arin carara ca keng ba kobu kual go cindi bua, kederegeng ’yé kermegeng ga bo cindiang duro bu’. Na ca ma dda kederegeng ’ya kema goni goni mam dang ddainya pena.

²³ Ama ké wogenga herua, na wo go main bainderegeng ga maré kogé kain ’eno. Ama na a gusu gasa ga basé osinyé, na a gusu kual go Kumu koi go ba jimang cindi bera kuddum.

²⁴ Main kual go Kumu koi ba yang waldong wang kain: Kalang mam mainya hademé kain. Hormo dogé mam mainya busu go hademé kogé kain, Cawa hademé lué bua, busu gogé bé cong bu’.

²⁵ Ama kual go Bagulong koi na, joma bera kuddum. Kual lé na Nô do Ddari do ké ba dorgeng dang na.