Biblia Todo Logo
Bìoball air-loidhne

- Sanasan -

1 Korintié 6 - Kebu go dore go herua 1978


Kembé karmegeng tumu ga bedang ’eno

1 Kiddin ga kema go pena a duroigeng nia wai kual kang kermi na, ddi ’yé kembei tumu kalang ga delinya cawa ga? Golgo ddi orang nai tumu kalang ga Kumu kai.

2 Keng sela ca kalang ga Kumu kaia go kaidé kual ca delinya ’eno ga? Keng nia go kaidé kual ca delinya na, keng bbala kaidé kual go bbani go a duroigeng ’eno ga?

3 Keng sela ca na go kaidé kual ca kangiyong ’eno ga? Na ca ma, na bbala kaidé kual ca henga ga delinya ka ’eno ga?

4 Kual nia wo duroigeng na, keng ’yé kaidei tumu kalang ga ba sela yaué go Kumu koi kual goi ’enoa, cawa ga?

5 ’Enung yegeng main kainya ca dasi lageng, kema go nari pena go bbal ca nyané kual duro karmei wo ’eno a duroigeng ga?

6 Keng ’erem ca na gad kema ’era kembu kermi tumu kalang ga delinya ba ga?

7 Keng nia ’yang gusugeng duro bedang do kaidé kual na, cindi keng la wané, na golgo keng ’yom ddaindugeng ca isinwa do ké ba legeng dang na ’eno ga? Na golgo keng ’yom ddaindugeng ca henga gageng ga ké ba koiegé ’eno ga?

8 Ama keng la main kain ’eno, keng kau la wané bua, keng koi henga ga karmegeng kagé bu’.

9 Kalang ga isindong go wo Leu do Kumu toi ’eno, keng sela main kain ’eno ga? Ddo keng asé gusugeng ’eno, kalang ga béli, dang kalang ga melaué koliyong, dang kalang ga podelo, dang kalang ga mali.

10 Dang kalang ga koié, dang kalang ga lo tabelang, dang ga koié céré, dang ga nyangdé kalang, dang kalang ga golé giyong, ké go wo Leu do Kumu toi ’eno.

11 Ga pena a duroigeng tumu din kau la main kain, ama cakcak kua ké belegeng arin carara a duro isinwa bua, keng ji kalang ga Kumu kai bua, ké belegeng geddang tumu Kumu dang Bagulong Jésu Krist gusondi, dang Habé ga Kumu guana kai bu’.


Ga bi Bagulong hormo dang gusugeng

12 Ga pena a duroigeng yé wa: ’Enung bbal lo henga mam, ama ’enung bbal ca yo wa: Henga mam na ddara caigeng ’eno, cindi, ’enung bbal lo henga mam, ama ’enung dara ca belé guiang go henga ga pena kogé ’eno.

13 Keng yé wa: Do na ca kederé bua, kederé na ca do bu’, ama Kumu da toingé cong ca’. Ama gusu na ca lo go béli ’eno, ama na ca Bagulong bua, Bagulong na ca gusu bu’.

14 Kumu belé Bagulong dang cindi a duro ga maré bua, ddia belenang cindena a duro ga maré dang dono doi bu’.

15 Keng sela ca gusugeng na henga ga karang ga gusu gurum gusu go Krist koi ’eno ga? ’Enung da ai henga ga karang ga gusu gurum gusu go Krist koi, ’enung da belegé henga ga karang ga gusu gurum gusu go tama do podelo kua ga? Na main kain ’eno bering.

16 Keng sela ca kema go ba woiang tama do podelo na, ddi jia gusu pena kang na ’eno ga? Cawa main cidab do Kumu toi ba yang waldong wang kain, ké ca’ jia gusu pena.

17 Ama kema go daiang Bagulong na, ddi jia Habé pena kang nai.

18 Gergeng cong a gusu béli lo goa, isinwa doni doni do kema wa loa na, na do a gusi dong, ama kema go wa lo béli na, ddi la gusi bang isinwa.

19 Keng sela ca gusugeng na kulu go Habé ga arin carara kogé, na Habé ga ba jom duro kederegeng ga Kumu ba begengang nagé ’eno ga? Keng danga ma caigeng ’eno.

20 Kumu kelgeng danga kelé go combi, na ca ma ga bi Kumu hormo dang gusugeng.

© Alliance biblique universelle (United Bible Societies) 1978.

British & Foreign Bible Society
Lean sinn:



Sanasan