1 Korintié 2 - Kebu go dore go herua 1978

Doré go Nô do Krist toi do ké ba bbobeli ca sia go adegelé

¹ Karmeng, kiddin ga ’enung ba ’yé gusugeng ca doregeng mendem do cindi do Kumu toi na, ’enung dorgenga kual go homi nain go ddo caigeng ’eno,

² Cawa kiddin ga ’enung ba jom duroigeng na, ’enung dara solé henga ga ddang ’eno, ’enung dar ca sola Jésu Krist go ké ba bbobeli ca sia go adegelé mera.

³ Na ca ma ’enung ’yé gusugeng main kema go todero go muro kain.

⁴ Gelé guang dang kual go ’enung ba dorgeng dang nai bu’ na, danga narua do kema toi ’eno, ama danga dono do Habé ga Kumu kai togé.

⁵ Ca ddo bo cindi gogeng ’eré ca narua do kalang togé ’eno, ama ddai ddi ’er ca dono do Kumu toi.

Narua do Kumu toi

⁶ Ama ’enung ya kual go narua ca kalang ga Krist kai ga bbalé, ama na narua do delinya toa ’eno bua, na dono do ga do termala toa do halé cong togé ’eno bu’.

⁷ Ama ’enung ya narua do Kumu toi do mendem, do ddi ba paro wasa tumu kalang ca hormo duana, kiddin ga ddi debu delinya ’eno dé.

⁸ Ga ddo ca ga delinya ka sela narua lé ’eno, ké nia sela narua la solé na, ké go bbobelé Bagulong go hormo ca sia go adegelé ’eno.

⁹ Ama main cidab do Kumu toi ba yang waldong wang kain: Henga ga Kumu ba nyangé ca kalang gai ga kederégé ba yei na, Kema pena selagé ’eno bua, ja kual gogeng ’eno bua, Kema pena ’erem caigé ’eno bu’.

¹⁰ Ama Kumu gelna mendem lé ca Habé ga Kumu kai, cawa Habé bbal ca solé henga mam, dang ddugua do Kumu toi do ba waia.

¹¹ Ama ca kema na, habeia solé henga ga duro ddaindi mera, main kain na Habé ga Kumu kaia solé henga ga Kumu kai mera bu’.

¹² Na ’ya habé ga delinya ka ’eno, ama na ’ya Habé ga ba saga a gusu Kumu, ca na sela henga mam ga Kumu ba bena.

¹³ Ni yé kual danga gelé go narua do kalang kogé ’eno, ama danga gelé go Habé ga Kumu kai kogé. Ni gel kual go cindi go Habé kogé ca ké gang Habé ga Kumu kai.

¹⁴ Kema goang Habé ga Kumu kai ’eno na, ddi go bbalé ’yo kual go cindi go ba saga a gusu Habé ’eno, ddi sol kual la mainya kual go mam kain, ddi go bbalé solé kual lé toi ’eno, cawa Haba bbalé ca gelé kual lé toi.

¹⁵ Kema goang Habé ga Kumu kai na, ddi bbal ca solé kual toi mam, ama na ddi banga go solé kual lé toi ’eno.

¹⁶ Main cidab do Kumu toi ba yang waldong wang kain: Wanga solé ’eremé go Bagulong koi ga? Na wanga bbalé gejei ga? Ama na na, nanga ’eremé go Krist koi.