1 Korintié 12 - Kebu go dore go herua 1978

Bo kalin do Habé ga Kumu kai togé

¹ Karmeng, kual go ca kalin do Habé ga Kumu kai togé na, ’enung dar ca keng jimang solé go cindi ca bo go kalin lé.

² Keng sol ca kiddin ga kenga duro delinya dé na, ké golgeng ’yang nageng kebu koliyong ga basé yo kual.

³ Na ca ma, ’enung dar ca keng selang duro, kema go yo kualang Habé ga Kumu kai na, ddi go bbesé Jésu ’eno, kema goang Habé ga Kumu kai ’eno na, ddi go yo waldong wang, Jésu na Bagulong ’eno.

⁴ Bo kalin do Habé togé wo kené cindo kaindo kaindo, ama na Habé gang pena la bogé.

⁵ Gié cindi kaindi kaindi wo kené, ama gié la ca Bagulong bang pena lé bu’.

⁶ Gié cindi kaindi kaindi wo kené, ama na Kumu bang pena bogé kalang gié lé mam.

⁷ Ama Habé bi kema goni goni kalin ca jégené kalang mam.

⁸ Habé bu kema go pena dono ca yo kual go nari bua, ké bu koné ga ddang dono ca yo kual dang solé toi bu’.

⁹ Habé ga pena la boi kema go pena bo cindi bua, ké bi koné dono do bogé kalang ga hoamya labia bu’.

¹⁰ Habé lé bi kema kané dono do lo gié go dono go kagelokemo bua, ké bi koné dono ca doré kual go Kumu koi bua, ké bi koné dono ca gosindé habé ga poi dang ga cindi duroigé bua, ké bi koné dono do yo kebu go ddang bua, ké bi koné dono do doré kual toi bu’.

¹¹ Na Habé gang ga pena la bo gié lé mam, kema goni goni kau, ké bi gié main ké ba darang kain.

Gusu na pena ama ddiang henga ga karang gusia combu

¹² Cawa Krist na gurum go pena goang henga ga karang gusi combu, gurum gusu na pena, ama henga ga karang cudurong gusi kaindigé kaindigé.

¹³ Na ga Juib mam bua, kalang ga toigé ddang bua, goyong bua, kalang ga talagai bu’ ma, ké desena duro Habé ga Kumu kai ca belana gusu go pena bua, ké bena so duro Habé ga pena bu’.

¹⁴ Cawa gurum gusu na henga ga pena ’eno, ddianga henga combu.

¹⁵ Teba nia yé wa: ’Enung kuaba ’eno bua, ’enunga gusu gurum gusu ’eno bu’ na, yo goi go kain lé da nari jomé gusu gurum gusu ga?

¹⁶ Sema nia yé wa: ’Enunga tî ’eno bua, ’enunga gusu gurum gusu ’eno bu’ na, yo goi go kain lé da nari jomé gusu gurum gusu ga?

¹⁷ Gurum gusu mam nia tî mera ma, ddia jé kuala mena ga? Gurum gusu mam nia sema mera ma, ddia ddo henga mena ga?

¹⁸ Ama Kumu si henga ga karang gani gani gusu gurum gusu main ddi ba darang kain.

¹⁹ Henga ga karang mam nia ké gang mera na, gurum gusu wa andi ga?

²⁰ Henga ga karang wo kené combu, ama gusu na pena.

²¹ Tî go bbalé yoi kuaba wa: ’Enung darain ’eno, kau ca go bbalé yo go guaddang wa: ’Enung darageng ’eno bu’ na, ké go yo main kain ’eno.

²² Cawa henga ga karang ga gusu gurum gusu, ga na ba solgé main ga todero kain na, ké jégena nain.

²³ Henga ga karang ga gusu gurum gusuna ga na ba solgé kandia bbalang kamdigé ’eno na, na wa bogé hormo bua, na solgé ddara ca kamdigé bu’.

²⁴ Henga ga karang ga gusu gurum gusuna ga dang hormo na, Kumu léga pena dang kamdigé ga ba wié hormo.

²⁵ Main kain na, gosinyé wo ’eno a duro gurum gusu bua, henga ga karang mam kau dai pena.

²⁶ Henga ga karang ga gusu gurum gusu pena nia wai gelé go cin na, kamdigé mam kau danga gelé go cin bua, kané pena nia wai hormo na, kané mam kau wai gusu mowa bu’.

²⁷ Keng mam kenga Krist gusi, kema goni goni kau, na henga ga karang ga gusi lé.

²⁸ Na ca ma, Kumu si kalang ga pena a duro yaué goi, tumu jua na, ddi sia pajerong ga gié bua, ga sua na ga cogelé kebu goi bua, ga subu na ga gelé kual bua, kardené na, ddi si kalang ga lo gié go dono go kagelokemo bua, ddi bigé kalang ga pena dono do bogé kalang ga hoamya labia bua, ddi si kané ga jégené kalang bua, ddi si kané ga bogé yaué goi bua, kané ga yo kebu go ddang cindi kaindi kaindi bu’.

²⁹ Ka pajerong ga gié mam laba, ka ga cogelé kebu go Kumu koi mam laba, ka ga gelé kual mam laba, ka gang dono do lo gié go kagelokemo mam ga?

³⁰ Ka ga bogé kalang ga hoamya labia mam laba, ka ga yo kebu go kalang kogé cindi kaindi kaindi mam laba, ka ga poré kual toi mam ga?

³¹ Ga lageng tabelang ca ’yo bo kalin do ddo wal. Ama cakcak kua na, ’enung dar ca gelegeng giyong go ddari go ddo mam.