1 Korintié 10 - Kebu go dore go herua 1978

Ga lageng angalang koliyong

¹ Karmeng ’enung dar ca henogeng ca kual go ba wai moinderana ga ba ’yé kang Mois, ké mam, ké magaga to meddalin dugo bua, ké mam hal cin kurai go gumu go ddoaga go yilé bu’.

² Ké desegé mam duro meddalin bua, kang kurai go gumu go ddoaga bu’, ca daiegé pena dang Mois.

³ Ké mam di wo go Kumu ba bigé.

⁴ Ké mam si kang ga Kumu ba bigé bu’. Ké si kang ga ba andong a duro keddang go ba ’yang nagé, keddang lé na Krist.

⁵ Ga pena combu a duroigé muai Kumu gusi ’eno, na ca ma ké aserdong ma duro gada.

⁶ Henga lé gelna waldong wang, ca ddo na lo tabelang do isini main ké ba lang kain ’eno.

⁷ Ddo keng melaué koliyong main ga pena a duroigé ba lang kain ’eno, main cidab do Kumu toi ba yang waldong wang kain: Kalang jom dugo ca do bua, ca so bua, kardené ké sai dang ca waddé bu’.

⁸ Ddo na lo béli main ga pena a duroigé ba lang kain ’eno, wolé pena kalang dubu to sua ca subu aserdong ma,

⁹ Ddo na gesaué Bagulong ’eno, main ga pena a duroigé ba gesauiang kain, kumbulo yidiégé basegé.

¹⁰ Ddo keng lo sudené main ga pena a duroigé ba lang kain ’eno, cawa kangito go deddé kalang basegé.

¹¹ Ké pasu henga lé ga ba waiegé ca gelena waldong wang, ca na wa duro saman toa do karé.

¹² Na ca ma kema ’erem ddia ’era gag na, ddai ddi la angal ca ddi aserong ’eno.

¹³ Gesaué go ba waigeng na, na gesaué go ba wai kalang mam. Kumu na go geddang ca kebu goi go doré, ddi go ddo gesaué ca ddo dono dogeng ’eno, ama kiddin ga gesaua waigeng na, ddia bugeng dono do ’yomé gusugeng gag bua, dang dono do andong a duro gesaué lé dong bu’.

¹⁴ Kajanderndeng, na ca ma ga lageng angal ca melaué go koliyong.

¹⁵ ’Enung yegeng kual la ca kenga ga nadurong, keng gang kaidé kual ca kual go ’enung ba yegeng.

¹⁶ Ga ’eremegeng dang ddarin do busu do na wa loi Kumu désé ca, kiddin ga na wa so a dura na, na la dandangang kebar go Krist koi ’eno ga? Kiddin ga na wa do wo go na ba bbodelei na, na la dandangang Krist gusi ’eno ga?

¹⁷ Cawa wo na pena, na kalang combu, ama na gusu pena, cawa na mam dia wo go pena lé.

¹⁸ Ga selageng ga Israél ga do tibé go ké ba wali Kumu na, ké la dandangang Kumu ca dandang do tibé.

¹⁹ ’Enung ya mena ga? Henga ga ké ba walgé tebang kula na, bbala henga ga?

²⁰ Na kain ’eno, ama henga ga kalang ga toigé ddang wa walgé tibé na, ké tiba habé ga isini, na Kumu ’eno, ’enung dar ca keng lo dandangang habé ga isini ’eno.

²¹ Keng bbal ca so ddarin do Bagulong toi dang ddarin do habé ga isini togé bu’ ’eno. Keng bbal do wo go Bagulong koi dang do go habé ga isini kogé bu’ ’eno.

²² Keng dar ca na belé Bagulong ddéngi ga? Laba keng ’erem ca na ddianga dono ga?

La henga mam ca hormo do Kumu toi

²³ Kalang ga pena yé wa: Na bbal lo henga mam, ama henga mam ddara ’eno. Na bbal lo henga mam, ama henga mam bbal jégenena duro bo cindi ’eno.

²⁴ Ddo kema goni goni kau, ddi daré henga ca gusi mera ’eno, ama ddai ddi dara ca mondi bu’.

²⁵ Keng bbal ca do kunyung ga ké ba kelgé a duro gasgo, ama ddo keng ’engeré toigé ’eno, ca magé kual go duro ddaindugeng ddar.

²⁶ Main cidab do Kumu toi ba yang waldong wang kain. Delinya dang henga ga dura mam na Bagulong kai.

²⁷ Kema go delinya nia tegeng ca do ma, keng dar ca oré na, henga mam ga ddia bugeng na, ga dageng, ddo keng ’engeré toigé ’eno, ca keng maga kual duro ddaindugeng ddar.

²⁸ Ama kema go pena nia yegeng wa: Kunyung lé kua, ké walgé tebanga koliyong na, ga dogeng ’eno, ca kema go ba yegeng lé bua, ca keng maga kual go duro ddaindugeng dar bu’.

²⁹ Ama ’enung ya ca kual go duro ddaindin mera ’eno, ama na ca moindin bu’. Jia ’engerung wa: ’Enung bbal ca lo henga mam ca kual go duro mondang ddaindi ’enoa cawa ga?

³⁰ ’Enung nia lé Kumu désé ca henga ga ’enung ba digé na, ké si kual cang ca do go ’enung ba lei Kumu désé caia cawa ga?

³¹ Na ca ma keng nia di bua, keng nia si bu na, ga lageng henga mam ca hormo do Kumu toi.

³² Ddo keng lo henga ga aseré ga Juib ’eno bua, dang kalang ga toigé ddang ’eno bua, dang yaué go Kumu koi ’eno bu’.

³³ Lageng main ’enung ba lang kain, kema goni goni kau, ’enung dar ca mowoi gusi ca henga mam, ’enung dara ddarua ca gusung mera ’eno, ama ’enung dar ddarua ca kalang mam ca ké wa minyé.