Santiago 3 - Porciones del Nuevo Testamento en el idioma Letuama

Baꞌiaja jairikaᵽi ãrĩwaꞌri rĩkimakaja baꞌiaja mabaarijayu

¹ Yijeyomarã, ĩꞌrĩka uᵽakaja Tuᵽarãrika bojariroka wãrõrimaja mija imaᵽuᵽajoaꞌsi. Ĩꞌrãrimarãja sawãrõrimaja mija imajĩkareka jia simajĩñu. Ikuᵽaka õñurã mija: Tuᵽarãrika nare nawãrõika uᵽakaja nayiꞌriberijĩkareka, aᵽerã ᵽemawaꞌribaji Tuᵽarãte nare sawaᵽa jẽñerãñu.

² Rĩkimakaja sime baꞌiaja mabaaika. Suᵽa simakoꞌomakaja, rakajeᵽããwaꞌri jia jaibaraka, jĩjimaka imarã tarãja nime Tuᵽarãte yaᵽaika uᵽakaja ritaja baawãrũrijayurã.

³ Kũᵽajĩka marẽrõkaka imakoꞌomakaja, rĩkimakaja baꞌiaja mañu saᵽi jaibaraka. Ãꞌmitirikõrĩ, ikuᵽaka sime baꞌiaja majaika: Joꞌbaki kawarute imakoꞌomakaja kũᵽajĩka ᵽerumijia kirijokoᵽearã maᵽiꞌᵽeikaᵽi kire matuariyaᵽaika uᵽakaja kiyiꞌyu.

⁴ Iꞌsuᵽakajaoka sime joꞌbaka kũmua. Jãjia wĩrõa baekoꞌomakaja kũᵽajĩka wẽrũᵽãiaᵽi samatemarĩkayu, maꞌririyaᵽairõꞌõrã saꞌririka yaᵽawaꞌri.

⁵ Iꞌsuᵽakajaoka sime marẽrõkaka. Kũᵽajĩka simakoꞌomakaja saᵽi baꞌiaja aᵽerãre majaiyu, “Imatiyairã yija ime, aᵽerãte ᵽemawaꞌribaji yija ime”, ãrĩᵽuᵽajoawaꞌri. Iꞌsuᵽakajaoka sime ᵽeka. Kũᵽajĩkaᵽi samawããika imakoꞌomakaja joꞌbaka rioᵽakiaka sajoeyu.

⁶ Suᵽa imarĩ ᵽeka uᵽaka sime marẽrõkaka. Saᵽi baꞌiaja jaibaraka rĩkimarã aᵽerãte baꞌiaja majũarũjeyu. Majaika ãꞌmitiritirã, “Ritaoka baꞌiaja baairã nime”, aᵽerãte mareka ãrĩwãrũrijayu. Baꞌiaja jaiwaꞌri maimarika mabitatarijayu. Suᵽabaatirã aᵽerãte baꞌiaja baairã majarirũjeyu. Satanáre baꞌiaja mare jairũjemaka, iꞌsuᵽaka maroꞌsi simarijayu.

⁷ Mia. Ritaja baꞌirĩjia, wĩꞌñaka, ãñaka, suᵽabaatirã riakakakaoka ᵽoꞌimajarũjewãrũirã maime.

⁸ Iꞌsuᵽaka simakoꞌomakaja baꞌiaja majaika ᵽoto, “Baꞌirataka jaibekaja maimayeꞌe”, marĩwãrũbeyu, rakajeᵽããwãrũberiwaꞌri. Rãmitaka uᵽaka sime marẽrõkaka, baꞌiaja aᵽerãte saᵽi mabaaika.

^9-10 Iꞌsuᵽaka simamaka, “Jia yijare mibaayu”, Maᵽaki Tuᵽarãte marĩkoꞌomakaja, “Baꞌiaja najũarũ aᵽerã ᵽuri”, marĩrijayu. Yijeyomarã, iꞌsuᵽaka jaiyuyebekaja maimayeꞌe, “Ñima uᵽakaja nimarũ”, ritaja ᵽoꞌimaja ãrĩwaꞌri Tuᵽarãte mare ᵽoꞌijiaeka.

¹¹ Õrĩkõrĩ: ¿Okokoᵽea jia waria okoa ᵽoataika, jũꞌakaᵽitiyika rukubaka ᵽorijĩka ruku mijareka?

¹² Iꞌsuᵽakajaoka sime yaᵽua higuera imakoꞌomakaja olivo wãmeika õterikia ruika uᵽaka ruiberijĩka iꞌsia. Iꞌsuᵽakajaoka iyaka, higuera rikayu uᵽaka rikariberijĩka. Okoa rukueka imabeyu uᵽaka maimayeꞌe yijeyomarã aᵽerãreka baꞌiaja jaibekaja.

Tuᵽarãte mare jeyobaamaka õrĩᵽuᵽairã maimarãñu

¹³ Ĩꞌrĩka mija ᵽõꞌirã, “Tuᵽarãte yaᵽaikakaka õrĩᵽũaiki yiꞌi”, ãñukate imajĩkareka jia oyiaja kibaajĩñu. Aᵽerãte ᵽemawaꞌribaji imabekaja, jia nare kijeyobaarijarijĩñu. Iꞌsuᵽaka kibaamaka ĩatirã, “Jia õrĩᵽũaiki imawaꞌri, jia baawãrũiki kime”, aᵽerãte kireka ãrĩrãñu.

¹⁴ Oakiriwaꞌri aᵽerãte mija ãꞌmijĩarãka, “Naᵽemawaꞌribaji ñimarãñu”, mija ãrĩᵽuᵽajoarãka, “Jia õrĩᵽũairã yija ime”, mija ãrĩaꞌsi. Iꞌsuᵽakajaoka jia imakoᵽeika mija ãꞌmitiriᵽeꞌyorijayu.

¹⁵ Iꞌsuᵽaka imarã ᵽuri Tuᵽarãte yaᵽaika uᵽakamarĩa ᵽuᵽajoawaꞌri, õrĩᵽũabeyurã nime. Wejeareka imarã uᵽaka ᵽuᵽajoairokaᵽi nimarijayu. Suᵽabaatirãoka Esᵽíritu Santore ãꞌmitiriᵽẽabekaja, baꞌiaja naᵽuᵽaka nare ãñua Satanárikaᵽi iꞌtaika sime.

¹⁶ Iꞌsuᵽakajaoka nare oakiᵽaraka aᵽerãte naꞌmijĩarãka, suᵽabaatirã, “Nare ᵽemawaꞌribaji õñurã yija ime”, narĩrãka rukubaka ᵽuᵽajoairã jariwaꞌri, iꞌsuᵽaka ritaja nayaᵽaika uᵽakaja baꞌiaja baairã najarirãñu.

¹⁷ Iꞌsuᵽaka mare simakoreka, ikuᵽaka sime Tuᵽarãte yaᵽaika uᵽaka imarika: Jia oyiaja baabaraka, suᵽabaatirã jia aᵽerãka imariyaᵽawaꞌri oka jiebaraka maimarijarirãñu. Iꞌsuᵽaka simamaka aᵽerãte ãñua ãꞌmitiritirã, mayaᵽaikatakaja ᵽuᵽajoabekaja, jia nare mawayuĩarãñu. Wayuĩabuꞌawaꞌri jia ĩꞌrãtiji jeyobaabuꞌabaraka maimarijariyeꞌe. Waᵽuju ᵽakibuꞌabekaja, mañu uᵽakaja baabaraka maimayeꞌe.

¹⁸ Suᵽabaatirã aᵽerãka jia imawaꞌri, oka jiebaraka natiyiaja jia nimaerã aᵽerãte jeyobaairã ᵽuri jiitakaja baairã nime. Suᵽa imarĩ najeyobaairã jia oyiaja imarijarirãñurã.