Santiago 2 - Porciones del Nuevo Testamento en el idioma Letuama

Ĩꞌrãtiji oyiaja jia jiyiᵽuᵽaka morĩbuꞌayeꞌe

¹ Mija ãꞌmitiᵽe yijeyomarã. Ritaja ima ᵽemawaꞌribajirã imatiyaiki maĩᵽamaki Jesucristore ima simamaka, jiyiᵽuᵽaka kire morĩrijayu. “Jia kire yiꞌyurã yija ime”, ãñurã imariᵽotojo, wayuoka baairãte wayuĩabekaja, baꞌirĩjia rĩkimaka rikairãte takaja jia jiyiᵽuᵽaka õrĩrijayurã mija ime.

² Mia jeꞌe: Karemarĩa mija rẽrĩrijayurõꞌõrã ĩꞌrĩka waᵽajãꞌrĩakaka jariroaka jããtirã, sajeyoa iꞌsuᵽakajaoka kiᵽitawãjoarã takaraꞌaruitirã etaiki. Aᵽika imaki wayuoka baaiki imarĩ, jariromajaka jããtirã etaiki.

^3-4 Jía jariroaka jããtirã etaikite jiyiᵽuᵽaka õrĩwaꞌri, “Ikarã miruᵽabe”, mija ãñu. Wayuoka baaikite ᵽuri, “Torãja mirĩkamaᵽe, merĩberiyeꞌe torãja miruᵽaᵽabe”, mija ãrĩrijayu. Iꞌsuᵽaka wayuoka baairãte ãñurã imariᵽotojo, “Imatiyairã nime”, ãrĩwaꞌri jia rĩkimakaja baꞌirĩjia rikairãte mija baairokaᵽi ᵽuri baꞌiaja mija baayu. Iꞌsuᵽaka simamaka ĩꞌrãtiji jiyiᵽuᵽaka õrĩbuꞌaberiwaꞌri, ĩꞌrĩka taꞌiarãja imarijaribeyurã mija ime.

⁵ Ate jia mija ãꞌmitiᵽe yijeyomarã. “Yire mija ãꞌmitiriᵽẽabe”, Tuᵽarãte ãrĩkaroka yiꞌyurã rĩkimarãja nime wayuoka baariᵽotojo sayiꞌyurã. “Wayuoka baairã baꞌiratarã nime”, Tuᵽarãte yiꞌribeyurãte nareka ãrĩrijayua imariᵽotojo, Jesucristore yiꞌyurã nimamaka, “Jiibaji kire yiꞌyurã najarirũ”, ãrĩwaꞌri jia Tuᵽarãte nare jeyobaarijarirãñu. Suᵽa imarĩ kẽrĩka uᵽakaja kire yiꞌritiyairã kijãꞌmerũkirõꞌõrã eyarũkirã nime.

^6-7 Iꞌsuᵽaka kẽrĩka simakoꞌomakaja wayuoka baairãte jiyiᵽuᵽaka õrĩbeyurã mija ime. Wayuoka baairãreka iꞌsuᵽaka õrĩriᵽotojo, rĩkimaka baꞌirĩjia rikairãte takaja jiyiᵽuᵽaka õrĩrijayurã mija ime. “¿Naᵽareareka baꞌiaja majũarijayu”, mija ãrĩwãrũbeyu bai jeꞌe? Mia: Baꞌiaja mijare baawaꞌri ĩᵽarimarã ᵽõꞌirã mijare okabaarĩ neꞌewaꞌririjayu. Suᵽabaatirã jiitakiji Jesúre imakoꞌomakaja kirika bojariroka ãꞌmitiririᵽeꞌyowaꞌri baꞌiaja kireka jaiyuyeirã nime. Jesúrirã imariᵽotojo ¿dikaᵽi ãrĩwaꞌri jia nareka mija ᵽuᵽajoayu jeꞌe?

^8-9 Ikuᵽaka maĩᵽamaki Jesúre mare jãꞌmeka: “Miᵽoꞌia miwãtaika uᵽakaja aᵽerãteoka miwayuĩabe”, ãrĩwaꞌri sabojayu Tuᵽarã majaroᵽũñureka. Iꞌsuᵽaka sareka ãñua mija yiꞌrirãkareka jia baairã mija imarijarirãñu. Ika mijare ñañua õñurã imariᵽotojo, jia mijare eyairãte takaja mija wayuĩamaka, “Mija õñu uᵽakaja baꞌiaja baairã mija jayu, yijãꞌmeika yiꞌribeyurã imarĩ”, Tuᵽarãte mijare ãñu.

¹⁰ Mare kijãꞌmeika simaja yiꞌyurã imariᵽotojo, ĩꞌrãbaꞌi mayiꞌribeyua imarãkareka, “Baꞌiaja baairã nime yijãꞌmeika yiꞌribeyurã imarĩ”, mareka kẽrĩrãñu.

¹¹ Ikuᵽaka sime aᵽebaꞌi Tuᵽarãte bojaeka: “Rõmikirã, iꞌsuᵽakajaoka tĩmiakirã, aᵽerãka baꞌiaja baawãꞌimaribekaja mija imabe. Suᵽabaatirãoka ᵽoꞌimajare jããbekaja mija imabe”, mare kẽrĩka. Rõmikirã ᵽuri iꞌsuᵽaka kẽrĩka yiꞌᵽaraka imarã, aᵽerãka baꞌiaja baawãꞌimarĩbeyurã imariᵽotojo ᵽoꞌimajare mija jããrãkareka kijãꞌmeika yiꞌribeyurã mija imarãñu.

^12-13 Baꞌiaja baarika majaꞌataokaroꞌsi kirika bojariroka Tuᵽarãte mare õrĩrũjeyu. Iꞌsuᵽaka simamaka samayiꞌrika, mayiꞌriberikaoka ĩatirã simauᵽakaja sawaᵽa mare kibaarãñu. Suᵽa imarĩ mokaᵽi, maimabaayu uᵽakaja aᵽerãte mija wayuĩabe. Ĩakõrĩ jeꞌe: Aᵽerimarãre wayuĩabekaja imarã, nare wayuĩabekaja sawaᵽa Tuᵽarãte nare jẽñerãñu. Aᵽerãte wayuĩabaraka imarã ᵽuri, “Wayuĩarikaᵽi Tuᵽarãte yijare ĩarãñu”, ãrĩwaꞌri jĩjimaka imarã.

Jia baarijayurã maima ĩatirã, “Rita jia yire yiꞌyurã nime”, Tuᵽarãre mareka ãrĩrãñu

¹⁴ Mija ãꞌmitiᵽe yijeyomarã. Ĩꞌrĩka, “Cristore yiꞌyuka ñime”, ãrĩriᵽotojo, Tuᵽarãte yaᵽaika uᵽaka aᵽerãte kijeyobaabesarãka, dakowaᵽamarĩa kijaikoᵽeika jarirãka. Iꞌsuᵽaka simamaka, “Cristore yiꞌyuka ñime”, kẽñutakaᵽiji Tuᵽarãte tããrũkimarĩka kime.

^15-16 Ĩꞌrãrimarã muᵽaka Tuᵽarãte yiꞌyurãte kẽsia baajĩka, suᵽabaatirã jariroaka wayuoka nabaajĩka, “Baꞌarika, jariroaka mija tõᵽoerã Tuᵽarãte jia mijare baarũ”, mija ãñua jiamarĩa sime. Jeyobaabeyurã mija imajĩka waᵽamarĩa sajayu nare mija jaikoᵽeika.

¹⁷ Iꞌsuᵽakajaoka sime Tuᵽarãte yiꞌririkakaka. “Tuᵽarãte yiꞌyurã yija ime”, ãñurã imakoꞌomakaja aᵽerãte jeyobaariᵽuᵽamarĩrã nimajĩka, kire yiꞌriberiwaꞌri suᵽa nabaajĩñu.

¹⁸ Yijaika yiꞌriberiwaꞌri ikuᵽaka ĩꞌrãrimarãre yire ãrĩrãñu jeꞌe aᵽeyari: “¿Yaje Tuᵽarãte miyiꞌritiyayu jeꞌe miꞌioka?”, yire narĩrãñu. Iꞌsuᵽaka naᵽakãꞌã, “Ãꞌã, Tuᵽarãroꞌsi jia yibaarijayuaᵽi kire yiꞌyuka ñima mijare yibeayu”, nare ñarĩrãñu. Iꞌsuᵽaka imaki imarĩ, jia nabaarijayua yire nabeabeᵽakãꞌã, “Jia Tuᵽarãte yiꞌyurã nime”, nareka ãrĩwãrũbeyuka yiꞌi. Yire ᵽuri ritaja jia yibaarijayua ĩatirã, “Rita, jia Tuᵽarãte yiꞌyuka kime”, narĩwãrũrãñu.

¹⁹ Naᵽuᵽajoaikaᵽi ᵽuri, “Ĩꞌrĩkaja kime Tuᵽarã”. Rita sime. Rita ᵽuᵽajoakoꞌomakaja, aᵽerãte wayuĩabeyurã nimamaka, “Tuᵽarãte yiꞌyurã nime”, marĩwãrũbeyu. Õrĩkõrĩ: “Ĩꞌrĩkaja kime Tuᵽarã”, ãrĩᵽuᵽajoairã nime Satanás jeyomarã oka. Sõñurã imarĩ tararibaka Tuᵽarãte nakĩkirijayu nare wẽkomabaarũkika kimamaka.

^20-21 Jia mija ãꞌmitiᵽe õrĩwãrũbeyukajirã. Aᵽerãte jeyobaabeyurã mija imamaka, dako waᵽamarĩa sime Tuᵽarãte yiꞌyu uᵽaka mija imakoᵽeika. Samija õrĩrã mañeki Abraham majaroka mijare yibojaerã baayu. Jia Tuᵽarãre yiꞌyuka imarĩ kimakire kiroꞌsi kijoeĩjirã baakoᵽeka. Suᵽa kibaamaka ĩawaꞌri, “Jiitaka yiꞌyuka kime Abraham”, Tuᵽarãre ãrĩka.

^22-23 Tuᵽarãte yiꞌritiyaiki imarĩ kiyaᵽaeka uᵽakaja Abrahamre baaeka. Iꞌsuᵽaka kibaaekaᵽi, “Jiitakaja Tuᵽarãte yiꞌririjayuka kijarika”, ãrĩwãrũirã mija ime. Bikija ikuᵽaka Tuᵽarã majaroka bojaĩjirimajire oꞌoeka: “Jia Tuᵽarãte yiꞌyuka Abrahamre imaeka. Suᵽa imarĩ ‘Dako okamirãmarĩaja jia yika kima ñoñu’, Tuᵽarãte ãrĩka”, sãñu. Iꞌsuᵽaka kẽrĩka beꞌrõ Tuᵽarãte yiꞌritiyawaꞌri kimakire kiroꞌsi kijããkoᵽeka sãñu, Tuᵽarã majaroᵽũñurã oꞌoeka rita sime. Suᵽabaatirãoka, “ ‘Yijeyomaki mime’, Abrahamre kẽrĩka”, sãñu.

²⁴ Iꞌsuᵽaka Abrahamre baaeka õñurã imarĩ, “ ‘Tuᵽarãte yija yiꞌyu’, mañutakaᵽimarĩa jia kika majayu”, ãrĩwãrũirã maime. Kire yiꞌriwaꞌri, kiyaᵽaika uᵽakaja baabaraka maimarãkareka, “Dako okamirãmarĩrãja jia yika nima ñoñu”, Tuᵽarãte mareka ãrĩrãñu.

²⁵ Ikuᵽaka sime aᵽea: Niñerũ eꞌeokaroꞌsi ĩmirĩjaka baꞌiaja wãꞌimarĩrirõmo imakoꞌomakaja ikuᵽaka Rahabre baaeka Tuᵽarãte yiꞌriwaꞌri. Judíorãka ĩᵽamarãre ᵽũataekarãre etamaka ĩatirã, “Mija majamarãre mijare jããꞌsi, yiwiꞌiarã mija ruꞌrikãkabe. Suᵽabaatirã maꞌa mija ruꞌriwaꞌrirũkirõꞌõ mijare yibearãñu”, nare kõrĩka jia nare baawaꞌri. Iꞌsuᵽaka kobaamaka ĩatirã, “Jiitaka baaiko koime”, Tuᵽarãte koreka ãrĩka.

²⁶ Õrĩkõrĩ: Maᵽoꞌia õñimakimarĩa simajĩka dakoaᵽi õñia simaberijĩñu. Ikuᵽaka ãrĩrika sime: Tuᵽarãte yaᵽaika uᵽaka baaberikoꞌomakaja, “Kire yiꞌyurã yija ime”, marĩkoᵽeika uᵽaka sime.