Mr 16 - Porciones del Nuevo Testamento en el idioma Letuama

Õñia Jesúre jariᵽeꞌrika

¹ Sabadorĩmi, najẽrĩtaeka beꞌerõꞌõ, rãꞌirã María Magdalena, María Santiago ᵽako suᵽabaatirã Salomé maekarakakorã ruᵽukoꞌa wearũkia jia jiijĩsia nawaᵽaĩjika, Jesús ᵽoꞌiarã yoꞌyeokoroꞌsi.

² Jẽrĩtarikaũꞌmuirĩmi, Domingo bikitojo wãrĩrika ñaꞌrĩᵽataeka ᵽoto naꞌrika ãta wiꞌiarã. Aiyare wararaꞌaekarõꞌõjĩte torã naꞌririjarika.

^3-4 Suᵽabaatirã natiyiaja ikuᵽaka najaibuꞌarijarika: —Joꞌbaka ãtaᵽi ãtawiꞌia natãteraᵽe, ¿maki maroꞌsi seꞌetarãki ruku?==narĩbuꞌaeka. Torã neyaeka ᵽoto ãta joꞌbaka aᵽerõꞌõrã taᵽamaka niaeka.

⁵ Suᵽa imarĩ, sarã nakãkawaꞌrika. Kãkawaꞌritirã ĩaᵽũataerã baakõrĩ nakãkawaꞌrika, koᵽereka ritaᵽẽꞌrõtoᵽi, ĩꞌrĩka bikirimaji saya boia jããikire ruᵽamaka niaeka. Kire ĩatirã rõmijãre ᵽuᵽatatiyaeka.

⁶ Naᵽuᵽatamaka, ikuᵽaka nare kẽrĩka: —Mija ᵽuᵽataꞌsi. Jesús Nazaretkaki yaᵽua tetaekarã naᵽatakĩaraᵽaki moꞌarĩ mija iꞌtaiki imabeyuka õꞌõrã. Kiᵽuᵽariᵽakãꞌã õꞌõrã kire nayayeraᵽe. Beꞌerõꞌõ koᵽakaja kiᵽuᵽatũrũkoꞌo. Mia, õꞌõrã kire nataraᵽe, karemarĩa kimajĩka.

⁷ Mija aꞌᵽe. Kika wãrũrimaja mirãrãre, suᵽabaatirã Ᵽedroreoka ikuᵽaka mija bojaᵽe: “Mija ruᵽubajirã Galilearã eyaokoroꞌsi aꞌriweitiki Jesús. Mijare kibojatika uᵽakaja torã kire mija ĩatõᵽorãñu”, ãrĩwaꞌri nare mija bojabe,==nare kẽrĩka.

⁸ Ᵽuᵽatatiyawaꞌri tarabaraka rõmijãre ruꞌriᵽoriwaꞌrika. Suᵽa imarĩ aᵽerãre sanabojaᵽibaberika.

Õñia kijariᵽeꞌrika beꞌerõꞌõ María Magdalena wãmeika imaekakote Jesúre ᵽemakotowirika

⁹ Najẽrĩtaekarĩmi beꞌerõꞌõ aᵽerĩmi bikitojo Jesúre ᵽuᵽatũrũeka. María Magdalena ᵽõꞌirã mamarĩtaka Jesúre ᵽemakotowiriũꞌmueka. Ĩꞌᵽotẽñarirakamaki Satanárika ima koreka ñaꞌrĩjãikarãre kiᵽoataeka mirãko koimaeka.

^10-11 Kire ĩatirã, kika turitaᵽaeka mirãrãre bojarĩ koꞌrika. Baꞌiaja ᵽuᵽariwaꞌri oᵽaraka nimaekarõꞌõrã naᵽõꞌirã eyatirã ikuᵽaka nare kõrĩka: “¡Ᵽuᵽatũrũkoꞌoka Jesús! Kire ñiakoꞌa imarĩ suᵽa ñañu”, kõrĩka. Imakoꞌomakaja kore nayiꞌriberika.

Kika wãrũeka mirãrã ĩꞌᵽarã ᵽõꞌirã Jesúre ᵽemakotowirika

¹² Iꞌsia beꞌerõꞌõ ĩꞌᵽarã Jesúka wãrũeka mirãrãre Jerusalénᵽi naꞌririjarika ᵽoto aᵽeaja ĩoki jaritirã naᵽõꞌirã kiᵽemakotowirika.

¹³ Ᵽeꞌriwaꞌritirã aᵽerã Jesúka wãrũeka mirãrãre sanabojaeka. “Jesúre yija ĩakoꞌo”, nare narĩkoꞌomakaja nare nayiꞌriberika.

“Ikuᵽaka yirika ᵽoꞌimajare mija wãrõrãñu”, ãrĩwaꞌri Jesúre bojaeka

¹⁴ Iꞌsia beꞌerõꞌõ kika wãrũeka mirãrã ĩꞌrõũꞌᵽuarãeꞌearirakamaki imaekarãre baꞌaruᵽaekarõꞌõrã Jesúre ᵽemakotowirika. Suᵽabaatirã, ikuᵽaka nare kẽrĩka: —Yiᵽuᵽatũrũraᵽaka beꞌerõꞌõ, ¿dako baaerã aᵽerã yire ĩaraᵽarãre bojaraᵽaka mija yiꞌririyaᵽaberitiyaraᵽe?==ãrĩwaꞌri nare kiwaᵽeka.

¹⁵ Beꞌerõꞌõ, ikuᵽaka nare kẽrĩka ate: —Ritatojo wejearã mija aꞌᵽe, yirika ritaja ᵽoꞌimajare õrĩᵽatarũ.

¹⁶ Yire ãꞌmitiriᵽẽawaꞌri, “Jesúre yiꞌyuka ñime mae”, ãrĩwaꞌri kiruᵽukoꞌa jũjerũjeiki, baꞌiaja imarika tiyibeyurõꞌõrã aꞌribesarãki. Iꞌsuᵽaka simakoꞌomakaja yirika ãꞌmitiriᵽẽabeyukaroꞌsi ᵽuri baꞌiaja kibaaika waᵽa baꞌiaja imarika tiyibeyurõꞌõrã Tuᵽarãre kire ᵽũatarãñu.

¹⁷ Mija ĩabe. Yire ãꞌmitiriᵽẽairã ikuᵽaka baarãñurã: Yirirã nimamaka tẽrĩwaꞌribaji yirikaᵽi Satanárika ima ñaꞌrĩjãikarãre naᵽoatarijarirãñu. Suᵽabaatirãoka aᵽerã oka norĩbeyua najairãñu.

¹⁸ Ãñaka nañiꞌakoᵽerãka, okoa rĩmaka nukukoᵽerãkaoka dakoa nare oꞌribesarãka. Ᵽoꞌimaja jĩñurã ᵽoꞌiarã naᵽitaka najaꞌaᵽearãka ᵽotojo ᵽoꞌimajare jãjirijarirãñu,==

Maboꞌikakurirã Jesúre aꞌrika

¹⁹ Iꞌsuᵽaka maĩᵽamaki Jesúre nare ãrĩka beꞌerõꞌõ Tuᵽarãre maboꞌikakurirã kire eꞌemiawaꞌrika. Suᵽa imarĩ kiᵽõꞌirã ritaᵽẽꞌrõtoᵽi Jesúre ruᵽe maekaka, tẽrĩrikaja jiyiᵽuᵽaka õrĩrũkika imarĩ.

²⁰ Kimirĩwaꞌrika beꞌerõꞌõ kika wãrũeka mirãrãre kirika bojataᵽarĩ aꞌrika. Bojataᵽabaraka, niakoribeyua ᵽoꞌimajare nabeaokoroꞌsi Maĩᵽamakire nare jeyobaaeka, “Rita sime nabojaika”, ᵽoꞌimajare ãñaokoroꞌsi. Iꞌtojĩrãja sime ruᵽu.