Mr 14 - Porciones del Nuevo Testamento en el idioma Letuama

“¿Marãkãꞌã marĩjĩkareka Jesúre majããrũjejĩñu ruku?”, ãᵽaraka najaibuꞌaeka

¹ Toᵽi mae, ĩꞌᵽarĩmi sajariwaꞌrika Ᵽascua baya ruᵽu. Levadura rukeberika ᵽan baꞌaribaya simaeka. Iꞌsia ᵽoto ᵽoꞌimajare õrĩbeyuju Jesúre ñiꞌarika kurarãka ĩᵽarimarãre ᵽakatarikoᵽeka, Moisére jãꞌmeka wãrõrimajaᵽitiyika. “¿Dikaᵽi kire okabaatirã kire majããrũjejĩñu?”, narĩbuꞌaeka.

² Ikuᵽaka ĩꞌrãrimarãre ãrĩka: —Ᵽascua baya simarãka ᵽoto Jesúre mañiꞌajĩkareka, ᵽoꞌimajare boebarijĩñu. Boebariwaꞌri baꞌiaja nabaajĩkareka, marãkãꞌã baatirã nare mokajããwãrũberijĩñu. Suᵽa imarĩ Ᵽascua baya ᵽoto, kire mañiꞌaberijĩñu ruᵽu,==narĩka.

Rõmore Jesús ruᵽukoꞌa ᵽemarã ruᵽukoꞌawearũkia yoꞌyekako

³ Iꞌsia ruᵽubaji Betania wejearã kimaeka ᵽoto, Simón kãmia rabaeka mirãki wiꞌiarã Jesúre imaeka. Torã baꞌabaraka nimaeka ᵽoto ĩꞌrãko rõmore naᵽõꞌirã eyaeka, ãta alabastro wãmeikakaka jotoa baaeka rikatirã. Satõsiarã nardo wãmeika iyebaka imaeka jiijĩsiakaka. Suᵽabaatirã waᵽajãꞌrĩtakakaka simaeka. Jotokuꞌrea ᵽeᵽaruꞌatatirã Jesús ruᵽukoꞌarã iyebaka koyoꞌyeka kire jiyiᵽuᵽayeewaꞌri.

⁴ Iꞌsuᵽaka kire kobaamaka, jimarĩa ĩꞌrãrimarãre kore boebarika. Boebariwaꞌri, —¿Dako baaerã kiruᵽukoꞌarã iyebaka koyoꞌyeyu? Waᵽuju sakoweꞌweᵽateyu.

⁵ Iꞌsia iyebaka trescientos denario rõꞌõjĩrã waᵽajãꞌrĩa sime. Sawaᵽa tõᵽotirã wayuoka baairãre koĩjirĩ imakoᵽeyu,==ĩꞌrãrimarãre ãrĩbuꞌaeka natiyiaja kore jaiyuyebaraka.

⁶ Suᵽa naᵽakãꞌã, ikuᵽaka Jesúre nare ãrĩka: —Koimaᵽarũ. Jia yire baawaꞌri suᵽa kobaayu.

⁷ Mija watoᵽekarã imajiᵽarũkirã nime wayuoka baairã. Suᵽa imarĩ mija yaᵽarãka rõꞌõjite nare mija jeyobaarijarijĩñu. Yiꞌi ᵽuri mijaka imajiᵽabesarãki.

⁸ Iko ᵽuri, koᵽuᵽaka kore jiyuika uᵽakaja jia yire baaiko. Yireyarũki ruᵽu iyebaka jiijĩsia yire koyoꞌyeyu. Yire nayayerũkia ᵽuᵽajoaweiko uᵽaka kobaayu.

⁹ Rita ika mijare yibojayu. Ritaja wejeareka Tuᵽarãrika wãrõbaraka, jia yire kobaaeka mirãka ᵽoꞌimajare bojarijarirãñu. Suᵽa imarĩ jia kobaaeka ᵽuᵽajoabaraka, kore nayeꞌkariribesarãñu,==nare kẽrĩka.

Jesúre nañiꞌaokaroꞌsi karerõꞌõᵽi Judare kire bojajããeka

¹⁰ Torãjĩrã mae kurarãka ĩᵽarimarãka jairĩ Judas Iscariotere aꞌrika. Jesúka wãrũrimaja ĩꞌᵽoũꞌᵽuarãeꞌearirakamarãkaki kimaeka. “Jesúre mija ñiꞌaokoroꞌsi, kimarõꞌõrã mijare yeꞌewaꞌrirãñu”, nare kẽrĩka.

¹¹ Iꞌsuᵽaka nare kibojamaka, jĩjimaka najarika. Suᵽa imarĩ, —Niñerũ mire yija ĩjirãñu,==kire narĩka. Torãjite mae, “Ᵽoꞌimajamatorã Jesúre nañiꞌaerã, ¿marãkãꞌã nare yibaarũjerãñu ruku?”, Judare ãrĩᵽuᵽajoaũꞌmueka.

Jesúre ᵽiyia baꞌaekakaka

¹² Levadura rukeberika ᵽan nabaꞌaribaya ũꞌmuekarĩmi seyaeka. Iꞌsirĩmi oveja makarãka jããtirã nabaꞌaeka. Egiᵽtokaꞌiarã nañekiarãre imaeka ᵽoto Tuᵽarãre nare tããeka ᵽuᵽajoabaraka iꞌsia baya wejejẽꞌrãrakakaja nabaajiᵽaeka. Suᵽa imarĩ kika wãrũrimajare ikuᵽaka kire jẽrĩaeka: —¿Noꞌorã baꞌarika baaweirĩ yija aꞌririka miyaᵽayu, Ᵽascua baya ᵽoto mabaꞌarũkia?==kire narĩka.

¹³ Toᵽi ĩꞌᵽarã kika wãrũrimajare ᵽũataweibaraka ikuᵽaka kẽrĩka: —Wejearã mija eyarãka ᵽoto torã ĩꞌrĩka jotoaᵽi okoa kõkewaꞌyukare mija ĩatõᵽorãñu. Kibeꞌerõꞌõ mija aꞌᵽe.

¹⁴ Kibeꞌerõꞌõ aꞌritirã, wiꞌiarã kikãkarãñurõꞌõ ĩatirã, ikuᵽaka sabaꞌiᵽite mija jẽrĩabe: “Yijare wãrõrimaji ikuᵽaka ãrĩkoꞌoka: ‘¿Noꞌorã sime yika wãrũrimajaka, Ᵽascua baya ᵽoto baꞌarũkia nabaaweirũkirõꞌõ?’, kẽrĩkoꞌo”, mija ãᵽe.

¹⁵ Iꞌsuᵽaka mija ãᵽakãꞌã, ĩmiᵽẽꞌrõtorã ima kuraraka joꞌbarõꞌõjĩte mijare kibearãñu. Koᵽakaja najietikarõꞌõ simarãñu. Suᵽa imarĩ iꞌsia kurarakarã mabaꞌarũkia mija baaweibe,==nare kẽrĩka.

¹⁶ Beꞌerõꞌõ, torã naꞌrika. Torã eyatirã Jesúre nare bojaeka uᵽakaja simamaka niaeka. Ᵽascua bayarĩmi nabaꞌarũkia torã nabaaeka mae.

¹⁷ Rãꞌiwaꞌri neiᵽuᵽurõꞌõ sajarika ᵽoto Jesúre torã eyaeka kika wãrũrimaja, ĩꞌᵽoũꞌᵽuarãeꞌearirakamarãka.

¹⁸ Torã mae naka baꞌabaraka ikuᵽaka nare kibojaeka: —Mija ãꞌmitiᵽe. Rita mijare yibojayu mae. Mawatoᵽekarã ĩꞌrĩkare ime maka baꞌakoꞌomakaja, yimajãmarãre yire ñiꞌaokoroꞌsi yire bojajããrũkika,==nare kẽrĩka.

¹⁹ Iꞌsuᵽaka kẽᵽakãꞌã, baꞌiaja naᵽuᵽarika. Suᵽa imarĩ nimarakamakiji ikuᵽaka kire najẽrĩaũꞌmueka: —¿Yiꞌimarĩka iꞌsuᵽaka baarãki ruku?==kire narĩka.

²⁰ Toᵽi mae, ikuᵽaka nare kiyiꞌrika: —Ĩꞌᵽoũꞌᵽuarãeꞌearirakamakikakiji seroarã yika ᵽan ñuꞌabaꞌaikiji kime.

²¹ Tuᵽarã majaroᵽũñurã sabojaika uᵽakaja simaerã baayu yiroꞌsi. Ᵽoꞌimaja Maꞌmi ñime. Yire ñiꞌatirã ᵽoꞌimajare yire jããrãñu. “Aᵽerãre kire ñiꞌarũ”, ãrĩwaꞌri yire bojajããrãki ᵽuri, baꞌitakaja jũarãki. Suᵽa imarĩ imaberiri kimakoᵽeka,==nare kẽrĩka.

²² Baꞌabaraka nimekãꞌãja ᵽan Jesúre eꞌeka. Seꞌerikatirã, “Jia mibaayu Tuᵽarã”, kẽrĩka. Iꞌsuᵽaka ãrĩtirã sañakatarutirã nare sakĩjika. —Ãjaꞌa, samija baꞌabe; yiᵽoꞌikoᵽakaja sime,==nare kẽrĩka.

^23-24 Toᵽi ate koꞌa keꞌeka. Seꞌerikatirã, “Jia mibaayu Tuᵽarã”, kẽrĩka. Suᵽabaatirã nare sakĩjika. Nimaekauᵽatiji sanukueka beꞌerõꞌõ ikuᵽaka nare kẽrĩka: —Iyaokokoᵽakaja yiriwea sime. Riweajurubaraka yireyarãkaᵽi ãrĩwaꞌri rĩkimarãre Tuᵽarãre tããrãñu. Yireyamaka, “Baꞌiaja nabaaika yijũjerãñu”, Tuᵽarãre ãrĩka uᵽakaja kibaarãñu mae.

²⁵ Rita mijare ñañu, Tuᵽarãroꞌsi yijãꞌmerũkirĩmi seyabeyukaji iyaokoa mijaka ukubesarãki ruᵽu yiꞌi. Yijãꞌmeũꞌmurãñurĩmi seyarãka ᵽoto, aᵽeakaka, mamaka iyaokoa yukurãñu mae,==nare kẽrĩka.

“ ‘Jesúre õrĩbeyuka yiꞌi’, yireka merĩrãñu”, Ᵽedrote kẽrĩka

²⁶ Suᵽa imarĩ Tuᵽarã baya koyaweatirã Olivos wãmeika ᵽusiarã naꞌrika.

²⁷ Torã naꞌrika ᵽoto ikuᵽaka nare kẽrĩka: —Yire ãꞌmitiriᵽẽairã imakoꞌomakaja yire mija jaꞌatarãñu. Yire jaꞌatawaꞌri rakakaja mija ᵽibiᵽaterãñu. Tuᵽarã majaroᵽũñurã ãñu uᵽakaja simarãñu: “Mia, oveja ĩarĩrĩrimajire yijããrãka kioveja ruꞌriᵽaterãñu”, ãrĩwaꞌri sabojayu.

^28-30 Suᵽa imarĩ yire najããkoꞌomakaja yiᵽuᵽatũrũrãñu. Suᵽabaatirã mija ruᵽubaji Galileakaꞌiarã yeyarãñu. Torã mijare yeꞌetorirãñu,==nare kẽᵽakãꞌã, ikuᵽaka Ᵽedrore kire ãrĩka: —Aᵽerã ᵽuri nimauᵽatiji mire jaꞌatarãñurã jeꞌe. Yiꞌi ᵽuri mire jaꞌatabesarãki,==kẽᵽakãꞌã, Jesúre kire yiꞌrika: —Rita mire ñañu. Ire ñami ĩꞌᵽakuri karaka akaerã baarãka ruᵽu, maekarakakuri, “Jesúre õrĩbeyuka yiꞌi”, merĩrãñu ᵽoꞌimajare,==Jesúre ãrĩka Ᵽedrore.

³¹ Iꞌsuᵽaka Jesúre kire ãrĩkoꞌomakaja, ikuᵽaka Ᵽedrore kire yiꞌrika ate: —Jẽnoꞌotaka, yire najããriyaᵽakoꞌomakaja, “Jesúre õrĩbeyuka yiꞌi”, ñarĩbesarãñu,==Ᵽedrore ãrĩka. Kẽrĩka uᵽaka oyiaja nayiꞌriᵽataeka aᵽerãoka.

Getsemaní wãmeirõꞌõrã Tuᵽarãka jairĩ Jesúre aꞌrika

³² Toᵽi mae Getsemaní wãmeirõꞌõrã naꞌrika. Torã eyatirã kika imaekarãre ikuᵽaka kẽrĩka ate: —Iꞌtorã Tuᵽarãka jairĩ yaꞌyu. Õꞌõrãja yire mija taꞌaruᵽabe ruᵽu,==nare kẽrĩka.

³³ Ᵽedrore, Santiagore suᵽabaatirã Juanre, torã keꞌewaꞌrika. Torã naꞌririjarika ᵽoto jimarĩ kiwayuᵽiꞌriũꞌmueka.

³⁴ Suᵽa imarĩ ikuᵽaka nare kẽrĩka: —Yiᵽuᵽakaᵽi yiwayuᵽiꞌritiyayu, “Reyatiyaerã yibaayu”, ãñurõꞌõjĩrã. Õꞌõrãja mija tuibe ruᵽu. Kãᵽekaja yire mija taꞌabe,==nare kẽrĩka.

³⁵ Suᵽabaatirã ñoakuriᵽañakarã keꞌrika. Torã kaꞌiarã moꞌiᵽãñatirã, Tuᵽarãka kijaika, baꞌiaja, ãꞌmika jũarika yaᵽaberikoᵽewaꞌri.

^36-37 Kika jaibaraka ikuᵽaka kire kẽrĩka: —Aꞌbi, ritaja baawãrũiki mime. Suᵽa imarĩ yire najããkoreka, yire mijeyobaarika yiyaᵽayu. Ikuᵽaka mire yijẽñekoꞌomakaja yiyaᵽaika uᵽakamarĩa mibaajĩka marã imabeyua. Miyaᵽaika uᵽakaja simarũ,==Tuᵽarãka jaiweatirã kiᵽeꞌriwaꞌrika maekarakamarãre imaekarõꞌõrã. Kãrĩrikarekaja nosika ᵽoto naᵽõꞌirã keyaeka. Suᵽa imarĩ, ikuᵽaka Ᵽedrore kẽrĩka: —¿Simón, dako baaerã mikãñu? ¿Ĩꞌrãkuri aiyajẽrã rõꞌõjĩrãjĩka kãᵽekaja imaberijĩka mime bai?

³⁸ Rakajekaja Tuᵽarãre jẽñebaraka mija imabe, baꞌiaja mija baakoreka. “Tuᵽarãre yaᵽaika uᵽakaja yija baarãñu”, ãñurã imakoꞌomakaja, mija ᵽoꞌiaᵽi ᵽuri samija rakajeᵽããwãrũbeyu. Suᵽa imarĩ Tuᵽarãre yaᵽaika uᵽaka mija baawãrũbeyu,==nare kẽrĩka.

³⁹ Suᵽa nare ãrĩweatirã Tuᵽarãka jairĩ keꞌrika ate. Mamarĩ kire kijẽñeka uᵽakajaoka kire kẽrĩka.

⁴⁰ Jaiweatirã kijeyomarã ᵽõꞌirã kiᵽeꞌriwaꞌrika. Jimarĩa õõmaka nare baaeka imarĩ kãrĩkarã nimaeka. Keyamaka, tũrũtirã kiruᵽu niꞌyoᵽiꞌrika. Suᵽa imarĩ marãkãꞌã kire narĩwãrũberika.

⁴¹ Suᵽa nimekãꞌãja Tuᵽarãka jairĩ keꞌrika ate. Beꞌerõꞌõ naᵽõꞌirã etatirã, —¿Kãrĩkarã mija imañuju ruᵽu? Koᵽakaja yire nañiꞌarijẽꞌrãka seyayu. Ᵽoꞌimaja Maꞌmire nañiꞌaokoroꞌsi bojajããrimajire etayuju mae. Baꞌiaja baarimajare yire kiñiꞌarũjerã baayu.

⁴² Mija miꞌmibe. Dajoa kire matoyari,==kika wãrũrimajare kẽrĩka.

Jesúre nañiꞌaeka majaroka

⁴³ Iꞌsuᵽaka Jesúre jaiyuju Judare etaeka. Jesúka wãrũrimaji ĩꞌᵽoũꞌᵽuarãeꞌearirakamakikaki kimaeka. Rĩkimarãja ᵽoꞌimajare kika iꞌtaeka Jesúre ñiꞌarĩ. Sara, yaᵽua rikatirã kurarãka ĩᵽarimarã, Moisére jãꞌmeka wãrõrimaja, suᵽabaatirã judíorãka ĩᵽarimarãre ᵽũataekarã ᵽariji imaekarã.

⁴⁴ “Ikuᵽaka kire yibaarãñu”, ãrĩwaꞌri Judare nare bojatikarã nimaeka. —Jesúre mija ĩawãrũokoroꞌsi uꞌsurikaᵽi kire yijẽñerãñu. Iꞌsuᵽaka yibaarãka beꞌerõꞌõ kire ñiꞌatirã jia kire mija ĩarĩrĩwaꞌᵽe,==nare kẽrĩka.

⁴⁵ Beꞌerõꞌõ Jesús ᵽõꞌirã eyatirã, —¿Yaje mime wãrõrimaji?==kire ãrĩtirã kire kiuꞌsueka.

⁴⁶ Sĩatirã, Jesúre nañiꞌaeka mae.

⁴⁷ Torãjite, Jesús wãꞌtarã rĩkamarikaki sara baiwararĩ keꞌetaeka. Saᵽi kurarãka ĩᵽamaki imatiyaiki baꞌiraberimaji ãꞌmua kitoakõrõtaeka.

⁴⁸ Toᵽiji, —¿Dako baaerã sara, yaᵽuaᵽitiyika yire ñiꞌarĩ mija iꞌtayu? ¿Kareeꞌerimajire ñiꞌaika uᵽaka yire mija ñiꞌariyaᵽayu bai?

⁴⁹ Ĩꞌrãrĩmi jariwaꞌririmarĩa mija watoᵽekarã Tuᵽarãre jiyiᵽuᵽaka õrĩriwiꞌiareka mijare wãrõbaraka ñimaraᵽe. Torã ñimaroyiraᵽaka ᵽoto yire ñiꞌarĩ mija etaberaᵽe ruᵽu. Yire mija ñiꞌaika, Tuᵽarã majaroᵽũñurã sabojaika uᵽakaja sime yiroꞌsi,==Jesúre nare ãrĩka.

⁵⁰ Kire nañiꞌamaka, kika wãrũrimajare nimauᵽatiji kire ruꞌritaᵽawaꞌrika.

⁵¹ Kire neꞌewaꞌrika ᵽoto ĩꞌrĩka bikirimajire kibeꞌerõꞌõᵽi aꞌririjarika. Sayaᵽãijĩka takaja kiᵽõꞌirã wãꞌojĩki kimaeka. Keꞌririjarika ᵽoto torã imaekarãre kire ñiꞌaᵽeꞌrotaeka.

⁵² Suᵽa imarĩ kisayaᵽãitakaja kireka nabaꞌitatamaka, dakomarĩaja kiruꞌriwaꞌrika.

Judíotatarã ĩᵽarimarã imatiyaitata imaekarã, “Oka mireka ima”, Jesúre narĩka

⁵³ Suᵽabaatirã kurarãka ĩᵽamaki imatiyaiki wiꞌiarã Jesúre neꞌewaꞌrika. Kire neꞌeeyaeka ᵽoto kurarãka ĩᵽarimarã nimauᵽatiji torã rẽrĩkarã. Moisére jãꞌmeka wãrõrimaja, suᵽabaatirã judíorãka ĩᵽarimarãoka rẽrĩkarã.

⁵⁴ Iꞌsuᵽaka nabaaeka ᵽoto yoeᵽãñakaᵽi aꞌritirã Ᵽedrore nabeꞌerõꞌõ kurarãka ĩᵽamaki imatiyaiki wiꞌi ᵽẽtetaꞌteka rõꞌõrã eyaeka. Torã kãkatirã kiwiꞌia tuerimajaka kiᵽekajũrĩruᵽaeka.

⁵⁵ Torãjite mae kurarãka ĩᵽarimarã, suᵽabaatirã judíotatarã ĩᵽarimarã imatiyaitataoka, “¿Dakoaᵽi Jesúre majããrũjejĩñu?”, ãrĩwaꞌri jaibuꞌabaraka nimaeka. Suᵽa imarĩ, “Ikuᵽaka baꞌiaja Jesúre baaraᵽe”, ãrĩwaꞌri bojarũkirãre nayaᵽakoᵽeka. Imakoꞌomakaja baꞌiaja oka kireka imaeka natõᵽoberika.

⁵⁶ “Ikuᵽaka baꞌiaja Jesúre baaraᵽe”, ãrĩᵽakikoꞌomakaja rakakaja oyiaja najaitaruᵽaeka.

^57-58 Ĩꞌrãrimarã ᵽuri miꞌmirĩkatirã ikuᵽaka nokabaaᵽakika: —“Tuᵽarãre jiyiᵽuᵽaka õrĩriwiꞌia ᵽoꞌimajare baaeka yiᵽoaᵽaterãñu. Suᵽabaatirã maekarakarĩmi beꞌerõꞌõ ate sayiᵽoꞌijiarãñu, ᵽoꞌimajare baaeka uᵽaka marĩa”, Jesúre ãᵽakãꞌã yija ãꞌmitiraᵽe,==narĩka.

⁵⁹ Iꞌsuᵽaka bojakoꞌomakaja ĩꞌrĩka uᵽakamarĩ oyiaja nabojaᵽakika ruᵽu.

⁶⁰ Suᵽa imarĩ kurarãka ĩᵽamaki imatiyaiki nimauᵽati wãjitãji miꞌmirĩkatirã ikuᵽaka Jesúre kijẽrĩaeka: —¿Dako baaerã nare miokaeꞌebeyu jeꞌe? ¿Dakoaᵽi ãrĩwaꞌri iꞌsuᵽaka tĩmarĩtakaja mire nokabaayu?==kire kẽrĩka.

^61-62 Iꞌsuᵽaka kẽrĩkoꞌomakaja Jesúre kire okaeꞌeberika. Imakoꞌomakaja ikuᵽaka kurarãka ĩᵽamakire kire jẽrĩaeka ate: —¿Miꞌiji bai mime Tuᵽarã Maki, Jãꞌmerũkika Kiwãꞌmaekaki?==kire kẽrĩka ᵽoto, —Ãꞌã, yiꞌiji ñime. Ñamajĩ Tuᵽarã ᵽõꞌi ritaᵽẽꞌrõtorã Ᵽoꞌimaja Maꞌmire ruᵽamaka mija ĩarãñu. Suᵽabaatirã ĩmiᵽi oko ũmaka watoᵽekaᵽi yiruiraꞌamakaoka mija ĩarãñu,==kẽrĩka.

⁶³ Boebariwaꞌri kiõñu uᵽakaja kijariroaka ᵽemakato kurarãka ĩᵽamakire baibebataᵽateka. “ ‘Tuᵽarã uᵽakaja ñime’, kẽñu ruku”, ãrĩwaꞌri iꞌsuᵽaka kibaaeka. Suᵽabaatirã ikuᵽaka aᵽerã ĩᵽarimarãre kẽrĩka: —Baꞌiaja baaiki kime aᵽerãre ãrĩrũkia jariwaꞌribeyua mae, koᵽakaja ritaja baꞌiaja kijaika morĩwãrũᵽatayu.

⁶⁴ Mijaoka ãꞌmitirikoꞌorã baꞌiaja Tuᵽarãreka kijaikoꞌa. Suᵽa imarĩ ¿marãkãꞌã kire mabaarãñu jeꞌe mijareka?==ãrĩwaꞌri kijẽrĩaeka ĩᵽarimarã kijeyomarãre. Iꞌsuᵽaka kẽᵽakãꞌã, —Oka baꞌiaja kiroꞌsi ima simamaka kire jããrika sime,==narĩᵽataeka.

⁶⁵ Suᵽabaatirã ĩꞌrãrimarã Jesúre rijoꞌkataᵽatebaraka kiñakoa ᵽiꞌᵽetãtetirã kire naᵽajeka. Kire ᵽajebaraka ikuᵽaka kire najẽrĩaeka: —¿Maki mire ᵽajeiki? Karemarĩa Tuᵽarãre mire bojarãkareka, “Iki yire ᵽajekoꞌoka”, merĩwãrũrãñu,==kire narĩwãꞌimarĩka. Kire eꞌewaꞌᵽaraka kire ĩarĩrimaja kiᵽema ᵽajerijarikarã.

“Jesúre õrĩbeyuka yiꞌi”, Ᵽedrote ãrĩkarõꞌõ

⁶⁶ Jesúre baꞌiaja baabaraka wiꞌitõsiarã nimaeka ᵽoto ᵽẽterã Ᵽedrore imaeka ruᵽu. Torã kimaeka ᵽoto kurarãka ĩᵽamaki imatiyaikiroꞌsi baꞌiraberirõmore kiᵽõꞌirã etaeka.

^67-68 Ᵽedrore ᵽekaõꞌto wãꞌtarã jũrĩruᵽaeka, ñoaka kire koyoirĩkatirã ikuᵽaka kire kõrĩka: —Miꞌioka Jesús Nazaretkakika turiroyiraᵽaki mime,==kõᵽakãꞌã, ikuᵽaka kore kiyiꞌrika: —Meñua õrĩbeyuka yiꞌi, mijaikaoka ãꞌmitiriwãrũbeyuka yiꞌi,==kore ãrĩweatirã, koᵽereka ᵽẽꞌrõtorã keꞌrika ᵽoto karaka akaeka.

^69-70 Ate kire ĩatõᵽotirã ikuᵽaka torã imaekarãre kõrĩka: —Jesúka wãrũrimajakaki kime ĩꞌĩ,==nare kõrĩka ᵽoto, —Kika wãrũrimajimarĩka yiꞌi,==Ᵽedrore ãrĩka ate.

^71-72 Ñoaᵽañaka imatirã torã imaekarãre ikuᵽaka kire ãrĩka: —Rita kõñu. Galileakaki imarĩ, miꞌioka naka imaraᵽaki,==kire naᵽakãꞌã, —¡Iꞌsuᵽaka mija ãñukare õrĩberitiyaikiꞌre yiꞌi! Waᵽuju yiᵽakijĩkareka, baꞌiaja Tuᵽarãre yire baajĩñu,==kẽrĩka ᵽoto ate karaka akaeka. Sakamaka ãꞌmitiritirã, Jesúre kire bojaeka kiᵽuᵽakarã ñaꞌrĩjãirarika, “Ĩꞌᵽakuri karaka akaerã baarãka ruᵽu maekarakakuri, ‘Jesúre õrĩbeyuka yiꞌi’, merĩrãñu”. Jesúre ãrĩka kiᵽuᵽakarã ñaꞌrĩjãiraᵽakãꞌã, jimarĩ Ᵽedrore orika.