Los Hechos 4 - Porciones del Nuevo Testamento en el idioma Letuama

^1-2 “Najããekaki imakoꞌomakaja Jesúre ᵽuᵽatũrũeka. Iꞌsuᵽaka kibaaeka simamaka mareoka Tuᵽarãre ᵽuᵽatõrõrãñu”, Ᵽedro Juanᵽitiyika ᵽoꞌimajare bojabaraka nimaeka ᵽoto naᵽõꞌirã netaeka kurarãka, saduceokaka ᵽuᵽajoairã, suᵽabaatirã Tuᵽarãre jiyiᵽuᵽaka õrĩriwiꞌia ĩarĩrĩrimaja ĩᵽamakioka. Koᵽakaja naꞌmitiritika simamaka, boebaitakaja nimaeka.

³ Suᵽa nabaamaka Ᵽedrore, Juanka ĩᵽarãre wẽkomaka imariwiꞌiarã neꞌewaꞌrika. Naꞌitakarã sajaᵽakãꞌã, “Waeroka bikitojo naka majaiyeꞌe”, narĩᵽuᵽajoaeka.

⁴ Iꞌsuᵽaka nare nabaakoꞌomakaja, Jesús majaroka kibojamaka ãꞌmitiritirã sayiꞌyurãte rĩkimarãja imaeka. Mia jeꞌe, ĩmirĩjatakaja majoajĩkareka cinco mil rakamarãrõꞌõjĩrã Jesúre yiꞌyurãte imaeka Jerusalénreka.

^5-6 Toᵽi mae bikitojo Jerusalénrãjaoka, judíotatarã ĩᵽarimarã, suᵽabaatirã Moisére jãꞌmeka wãrõrimaja, suᵽabaatirã ᵽakiarimarãᵽitiyika torã narẽrĩka. Kurarãka ĩᵽamaki imatiyaiki Anás, suᵽabaatirã Caifás, Juan, Alejandrorãkaoka imaekarã. Suᵽabaatirã Anás tãꞌõmajaoka torã imaekarã.

⁷ Suᵽa imarĩ Ᵽedro, Juanᵽitiyika wẽkomaka imariwiꞌiarã imaekarãte Anáre akarũjeka. Mae kiᵽõꞌirã eyatirã kiwãꞌtarã narĩkataeka ᵽoto, ikuᵽaka nare kijẽrĩaeka: —¿Maki iꞌsuᵽaka baarika mijare jãꞌmeraᵽaki? Suᵽabaatirã, ¿marãkãꞌã simamaka bitamajire mija jieraᵽe?==nare kẽrĩka.

^8-9 Iꞌsuᵽaka kẽᵽakãꞌã, Esᵽíritu Santore kire jeyobaamaka ikuᵽaka Ᵽedrote yiꞌrika: —Yija ĩᵽarimarã, ᵽakiarimarãoka, mija ãꞌmitiᵽe ruᵽu. Makire yijare jãꞌmemaka bitamajire wãtawaꞌri kire yija jieraᵽe ãrĩwaꞌri mijare sayija bojaerã baayu mae.

¹⁰ Mija ãꞌmitiᵽe Israelkarã. Jesús Nazaretkakire jãꞌmeikaᵽi ãrĩwaꞌri ĩꞌĩ bitamajire yija jieraᵽe. Jãꞌmeikirejeoka yaᵽua tetaekarã mija jããraᵽaka imakoꞌomakaja Tuᵽarãre kire ᵽuᵽatõrõraᵽe.

¹¹ Mija ãꞌmitiᵽe, bikija Davidre ikuᵽaka oꞌoeka: “Wiꞌia baarimaja, ãta ĩꞌrõ mija taaeka. Aᵽika iꞌsio ãtaᵽi wiꞌia kibaamaka aᵽo ãta tẽrĩwaꞌribaji imatiyaio sajarika”, ãrĩwaꞌri Davidre oꞌoeka, Tuᵽarãre ᵽũatarũkikare ᵽuᵽajoaweibaraka.

¹² Jesucristo ĩꞌrĩkaja imaki ritatojo wejeareka ᵽoꞌimajare tããrũkika Tuᵽarãte ᵽũataekaki. Maki aᵽika imabeyuka Jesús uᵽaka baaiki,==Ᵽedrote nare ãrĩka.

¹³ Ᵽedro, Juanᵽitiyika kĩkirimarĩaja najaimaka ãꞌmitiritirã, ĩᵽarimarãre ᵽuᵽataeka. “Jia ᵽaᵽera wãrũtiyaberikarã imakoꞌomakaja jiitakaja najaiyu, Jesús jeyomarã mirãrã imarĩ”, narĩᵽuᵽajoaeka.

¹⁴ Bitamajite Ᵽedrorãkaka imamaka ĩawaꞌri, “Baꞌiaja mija baayu”, ĩᵽarimarãre nare ãrĩwãrũberika.

^15-16 Torãjĩrã mae, ᵽẽterã ĩᵽarimarãre nare ᵽorirũjeka. Ᵽẽterã naꞌrika beꞌrõ natiyiaja ikuᵽaka najaibuꞌaeka: —¿Marãkãꞌã nare mabaarãñu mae? Ritaja Jerusalénkarãre õrĩᵽatayu bitamajite najieka. Suᵽa imarĩ, “Waᵽuju ᵽakirimaja nime”, marĩwãrũberijĩka sime.

¹⁷ Suᵽa imarĩ bitamaji majaroka ãꞌmitiririmarĩa sime. Suᵽa imarĩ ikuᵽaka nare marĩyeꞌe mae: “Jesúrika ᵽoꞌimajare mija bojamirĩrĩkawaꞌrirãkareka baꞌiaja mija jũarãñu”, nare marĩyeꞌe,==ãrĩwaꞌri ĩᵽarimarãre jaibuꞌaeka.

¹⁸ Nimaekarõꞌõrã nare akatirã, ikuᵽaka nare narĩka: —Jesúmajaroka ᵽoꞌimajare mija wãrõaꞌsi mae,==nare narĩkoᵽeka.

¹⁹ Ikuᵽaka ĩᵽarimarãre nayiꞌrika: —Mija ãñua yija yiꞌrijĩkareka, Tuᵽarãte yiꞌribeyurã yija jarijĩñu. ¿Tuᵽarãte yiꞌririkoᵽakaja, mijare yija yiꞌrijĩñu bai jeꞌe? Tuᵽarãte ĩaika wãjitãji, ¿dika jiibaji imajeꞌe, mija ᵽuᵽajoaikareka?

²⁰ Jesúre ãrĩka yija ãꞌmitirika mirãka, kibaaroyika yija ĩaekaoka, bojarijaꞌataberijĩrã yija ime,==narĩka.

^21-22 —Samija bojamirĩrĩkawaꞌriaꞌsi. Iꞌsuᵽaka mija baarãkareka, baꞌiaja mija jũarãñu,==ĩᵽarimarãre nare ãrĩka. Bitamaji imakoᵽekakire tuᵽakãꞌã ĩawaꞌri, jia ᵽoꞌimajare jiyiᵽuᵽaka Tuᵽarãte õrĩka. Suᵽabaatirã najiekaki, ĩꞌᵽarã ᵽoꞌimaja ᵽemawaꞌribaji wejejẽꞌrãka eyawaꞌyuka kimaeka. Iꞌsuᵽaka ᵽoꞌimajare imamaka kĩkiwaꞌri baꞌiaja Ᵽedrorãkare baabekaja ĩᵽarimarãre nare ᵽoataeka.

“ ‘Jesúrika bojariroka bojabaraka nimarũ’, ãrĩwaꞌri, yijare mijeyobaabe”, ãᵽaraka Tuᵽarãte najẽñeka

²³ Ᵽoriwaꞌritirã najeyomarã ᵽõꞌirã Ᵽedrorãkare eyaeka. Naᵽõꞌirã eyatirã kurarãka, suᵽabaatirã ᵽakiarimarãre jaika nare nabojaeka.

²⁴ Sãꞌmitiritirã ĩꞌrĩka taꞌiarãja ᵽuᵽakirã imarĩ ikuᵽaka Tuᵽarãte najẽñeka: —Yija ĩᵽamaki, ritaja õñuka mime. Suᵽa imarĩ miꞌijioka imaki wejeᵽema, kaꞌia, riaᵽakiaka, suᵽabaatirã ritaja sareka imarũkia baaekaki.

²⁵ Bikija, yija ñeki David, miyaᵽaika uᵽakaja baaroyikaki Esᵽíritu Santore kire jeyobaamaka ikuᵽaka kioꞌoeka: “¿Dako baaerã judíotatarã, judíotatamarĩrãoka Tuᵽarãte boebariwaꞌri, baꞌiuᵽakaja kire nabaariᵽuᵽajoaeka?

²⁶ Ritatojo wejeareka imarã ĩᵽarimarã, suᵽabaatirã ᵽoꞌimajare imaruᵽutarimajaka rẽrĩtirã, imaweitikaja nimaeka baꞌiaja mire baaerã. Suᵽabaatirã ‘Jãꞌmerimaji kimarũ’, ãrĩwaꞌri miᵽũataekakiteoka baꞌiaja baaokaroꞌsi nimaeka”, ãrĩwaꞌri kioꞌoeka.

²⁷ Rita Davidre oꞌoeka uᵽaka simaraᵽe yija wejearã. Ĩᵽi Herodes, suᵽabaatirã Ᵽoncio Ᵽilato, aᵽetatarã, suᵽabaatirã Israelkaꞌiakarãoka ĩꞌrĩka taꞌiarãja ᵽuᵽaritiirã nimaeka. Miyaᵽaika uᵽaka baarimaji miᵽũataekakire baꞌiaja baaokaroꞌsi iꞌsuᵽaka naᵽuᵽajoaeka.

²⁸ Bikijarãja, “Iꞌsuᵽaka nabaarãñu”, merĩka uᵽakaja imawaꞌri suᵽa nabaaraᵽe.

²⁹ Yija Ĩᵽamaki, yijare miaꞌmitiᵽe. “Baꞌiaja mija jũarãñu”, yijare nañua miyeꞌkaririaꞌsi. Jia mire yiꞌyurã yija imamaka yijare mijeyobaabe. Suᵽabaatirãoka dako werikimarĩa Jesús majaroka yija wãrõerã yijare mijeyobaabe.

³⁰ Tẽrĩriki imarĩ wãmarĩa imarãte jiebaraka maikoribeyua mibeabe, “Jesúᵽi ãrĩwaꞌri iꞌsuᵽaka sime”, ᵽoꞌimajare ãñaokaroꞌsi,==Tuᵽarãre narĩka.

³¹ Kire najaiweaeka ᵽoto, nimaekarõꞌõ kaꞌia iyika. Sawatoᵽekaᵽi, Esᵽíritu Santore nare ñaꞌrĩjãika. Saᵽi ãrĩwaꞌri dakoa werikimarĩaja Tuᵽarã majaroka ᵽoꞌimajare nabojaeka.

Jesúre yiꞌyurã tiyiaja baꞌirĩjia naᵽibabuꞌaeka

³² Jesúre yiꞌyurã ĩꞌrĩka taꞌiarãja ᵽuᵽakirã imaekarã. Suᵽa imarĩ narikaika, “Yirikatakaja sime”, ãrĩbeyurã imarĩ, “Maroꞌsiji sime”, ãrĩwaꞌri najeyomarãre najeyobaaeka.

^33-35 Ĩꞌrãrimarã kaꞌibaꞌiᵽarã, suᵽabaatirã wiꞌia aᵽerãre ĩjirũkia rikairã, sawaᵽa niñerũ tõᵽotirã aᵽóstolrãkare nijika, wayuoka baairãre najeyobaaerã. Suᵽa imarĩ nakaki ĩꞌrĩkaoka wayuitaka baaikire imaberika. Suᵽabaatirã Tuᵽarãre nare jeyobaamaka jiitakaᵽiji, “Maĩᵽamaki Jesús reyakoꞌomakaja ᵽuᵽatũrũraᵽaki”, ãrĩwaꞌri aᵽóstolrãkare wãrõrijaꞌataberika. Suᵽa imarĩ Jesúre yiꞌyurã rakamarãja jĩjimaka nimaokaroꞌsi Tuᵽarãte nare jeyobaaeka.

³⁶ Mia, Jesúre yiꞌyurã watoᵽekareka José wãmeiki levitakaki kimaeka. Chiᵽre wãmeika jũmurikarã ᵽoꞌijirikaki kimaeka. Aᵽóstolrãka, Josére Bernabé kiwãmea noꞌaeka. Griego okaᵽi, “Jĩjimaka aᵽerãte imarũjerimaji”, ãrĩrika simaeka.

³⁷ Kiroꞌsiji kikaꞌia kirikaeka José. Iꞌsia aᵽikate kĩjika sawaᵽa tõᵽotirã aᵽóstolrãkare ĩjiokaroꞌsi, wayuoka baairãte najeyobaaokaroꞌsi.