Los Hechos 11 - Porciones del Nuevo Testamento en el idioma Letuama

Jerusalénkarã Jesúre yiꞌyurã imaekarãte Ᵽedrote majarobojaeka

¹ Toᵽi mae, aᵽóstolrãka, suᵽabaatirã Judeakaꞌiakarã Jesúre ãꞌmitiriᵽẽaekarãoka, “Judíotatamarĩrã imariᵽotojo, Jesúre naꞌmitiriᵽẽayuꞌre”, ãrĩka majaroka naꞌmitirika.

^2-3 Suᵽa imarĩ Jerusalénrã Ᵽedrote ᵽeꞌrieyaeka ᵽoto, ikuᵽaka kire narĩka: —¿Dako baaerã judíotatamarĩrã wiꞌiarã mikãkaraᵽe? Suᵽabaatirãoka ¿marãkãꞌã ãrĩwaꞌri naka mibaꞌaraᵽe?==Ᵽedrore narĩka.

^4-5 Toᵽiji wãjirokaᵽi Ᵽedrore nare bojajiika: —Joᵽewejearã Tuᵽarãte jaibaraka ñimaraᵽaka ᵽoto ikuᵽaka simaraᵽe. Makãrãrũñuroka uᵽakaᵽi ikuᵽaka yire saᵽemakotowiraᵽe: Maboꞌikakuriᵽi sayaᵽãia joꞌbato ĩꞌᵽaᵽẽꞌrõto ñiꞌatirã majaꞌaruetaika uᵽaka ĩoika ima yiᵽõꞌirã etaraᵽaka.

⁶ “¿Dakoa satõsiareka ima?”, ãrĩwaꞌri jia sañiatiyaraᵽe. Ritajakaka waꞌiroꞌsia, waꞌiroꞌsiwẽkoa ᵽariji imaraᵽaka. Waꞌibikirãka uᵽaka tuyua, wiyua, suᵽabaatirã yiibaraka tuyuaoka simaraᵽe.

⁷ Sañiawearaᵽaka ᵽoto maboꞌikakuriᵽi ikuᵽaka yire sãrĩkoraᵽe: “Ᵽedro mimiꞌmibe. Jããtirã samibaꞌabe”, yire sãrĩkoraᵽe.

⁸ “Marãkãꞌã baatirã yibaaberijĩka Ñiᵽamaki, Moisés wãsare jãjibaaeka baꞌakoribeyuka ñime ruᵽu”, ãrĩwaꞌri yiyiꞌraᵽe.

⁹ Suᵽa ñaᵽakãꞌã ikuᵽaka yire sãrĩkoraᵽe ate: “ ‘Jãjika yiroꞌsi sime’, merĩaꞌsi, Tuᵽarãte baꞌarũjeika ᵽuri ‘Mibaꞌabe’ ”, sãrĩkoraᵽe.

¹⁰ Maekarakakuri iꞌsuᵽaka yire sãrãᵽe. Sabeꞌerõꞌõᵽi mae Tuᵽarãte sayaᵽãia eꞌemiaraᵽe maboꞌikakurirã.

¹¹ Ikuᵽarõꞌõᵽiji maekarakamaki ᵽoꞌimajare ñimaraᵽarõꞌõrã eyaraᵽe. Cesareawejeakaki Corneliore ᵽũataekarã yire neꞌeayaokaroꞌsi.

¹² “Netarãka ᵽoto, baꞌiaja ᵽuᵽaribekaja naka meꞌᵽe”, Esᵽíritu Santore yire ãᵽakãꞌã, yaꞌraᵽe. Suᵽabaatirã ĩꞌrõtẽñarirakamarã Jesúre ãꞌmitiriᵽẽairã yika õꞌõrã imarã yijeyoa turaᵽarã. Naka mae Cornelio wiꞌiarã yija kãkaraᵽe.

¹³ Yija kãkaeyaraᵽaka ᵽoto, ikuᵽaka Corneliore yijare bojaraᵽe: “Yiwiꞌiareka ñimaraᵽaka ᵽoto ángelte yire ᵽemakotowirirĩkaraᵽe. Mia jeꞌe ikuᵽaka yire kẽrãᵽe: ‘Joᵽewejearã Simónre akarĩ aꞌrirũkirãte miᵽũatabe. Ᵽedrooka kire nañu.

¹⁴ Mija ᵽõꞌirã eyatirã, “Mire, miwiꞌiareka imarãteoka baꞌiaja imarika tiyibeyurõꞌõrã mija aꞌrirũkia imakoᵽeikareka ikuᵽaka Tuᵽarãte mijare tããrãñu”, ãrĩwaꞌri mijare kibojarãñu’, Corneliore yijare ãrãᵽe”, ángelte kire ãrĩka bojabaraka.

¹⁵ Iꞌsuᵽaka yire kẽrãᵽaka beꞌerõꞌõ, yiꞌi ate nare bojaũꞌmuraᵽaki. Nare yijaiũꞌmuraᵽaka ᵽotojo, ikuᵽarõꞌõᵽi Esᵽíritu Santore nare ñaꞌrĩjãiraᵽe, mare mamarĩ kibaaraᵽaka uᵽakajaoka.

¹⁶ Iꞌsuᵽaka simakaka ĩawaꞌri, Maĩᵽamakire bojaeka yiᵽuᵽajoatõᵽoraᵽe. Mia, ikuᵽaka kẽrĩka: “Bikija ᵽuri, okoaᵽi Juanre ruᵽukoꞌa mijare jũjeka. Tuᵽarã ᵽuri Esᵽíritu Santo mijare ñaꞌajããrãki, kiyaᵽaika uᵽakaja baawãrũirã mija imaokaroꞌsi”, iꞌsuᵽakajaoka mamarĩrãja Jesúre mare bojatika.

¹⁷ Jesucristore yiꞌyurã maimamaka, Esᵽíritu Santore Tuᵽarãte mare ñaꞌajããraᵽaka uᵽakaja judíorãkamarĩrã nimakoꞌomakaja nareoka Esᵽíritu Santore kiñaꞌajããraᵽe. Iꞌsuᵽaka Tuᵽarãte nare baamaka, “Iꞌsuᵽakamarĩa sime. Judíorãkamarĩrã mija ᵽuri marãkãꞌã baatirã yijaka imaberijĩrã mija”, ãrĩberijĩka ñimaraᵽe,==Ᵽedrore nare ãrĩka imarĩ, kire najẽrĩatiyika.

¹⁸ Toᵽiji naᵽuᵽaka noꞌaeka mae: —Jiitakaja baaiki kime Tuᵽarã. Judíorãkamarĩrãteoka baꞌiaja nabaaika najaꞌatarãka, nare kiyeꞌkariarãñu jia kika nimajiᵽarũ,==ãrĩwaꞌri narĩka.

Antioquíakarã Jesúre nayiꞌriũꞌmueka

¹⁹ Iꞌsia ruᵽubaji Jesúre yiꞌribeyurã Estebanre jããekarã. Suᵽabaatirã aᵽerã kiuᵽaka imaekarã Jesúre yiꞌyurãteoka baꞌiaja nabaaeka. Suᵽa imarĩ ĩꞌrãrimarã Jesúre yiꞌyurã Feniciakaꞌiarã, Chiᵽrejũmurikarã imawejeareka, suᵽabaatirã Antioquía wejearãoka naruꞌriwaꞌrika. Torã eyatirã, judíorãkare takaja Jesúrika bojariroka nabojaeka.

²⁰ Ĩꞌrãrimarã ᵽuri, Chiᵽrekarã, Cirenekarã aꞌritirã Antioquíarã eyaekarã. Torã eyatirã judíorãkamarĩrã imaekarãteoka maĩᵽamaki Jesúrika nabojaeka.

²¹ “Jia nabojawãrũrũ”, ãrĩwaꞌri Tuᵽarãte nare jeyobaaeka. Suᵽa imarĩ rĩkimarãja Jesúrika nabojaeka ãꞌmitiritirã, mamarĩ nayiꞌrikoᵽeroyika najaꞌataeka, kire yiꞌriwaꞌri.

²² Antioquíawejearã Jesúre nayiꞌyua majaroka Jerusalénkarã Jesúre yiꞌyurãre ãꞌmitirika. Sõrĩtirã Antioquíarã Bernabére naᵽũataeka.

²³ Suᵽa kire naᵽakãꞌã toᵽi keꞌrika. Torã eyatirã, Tuᵽarãre jia nare baaeka kĩaeyaeka imarĩ, jĩjimakaᵽi ikuᵽaka nare kibojaeka: —Ika mija ima uᵽakaja, jiibaji Jesúre mija yiꞌririmirĩrĩkawaꞌᵽe,==nare kẽrĩka.

²⁴ Esᵽíritu Santore kire jeyobaaikaᵽi jiiᵽuᵽaki kimaeka. Tuᵽarãre yaᵽaika uᵽakaja oyiaja imaki imarĩ, jia Jesúre yiꞌyuka Bernabére imaeka. Suᵽa imarĩ rĩkimarãja kibojaeka ãꞌmitiritirã, Jesúre nayiꞌrika.

²⁵ Iꞌsia beꞌerõꞌõ Tarso wãmeika wejearã Bernabéte aꞌrika, Saulote moꞌarĩ.

²⁶ Kire tõᵽotirã, “Dajoa Antioquíarã”, kire kẽrĩka. Suᵽa kire kẽᵽakãꞌã ĩꞌᵽarã najeyoariwaꞌrika torã. Ĩꞌrãkuriwejejẽꞌrãka torã nimaeka, Jesúre yiꞌririmajaka. Torã imatirã rĩkimarãre Jesúrika nawãrõeka. Iꞌsia wejeakarã Jesúre yiꞌyurãtejeoka, “Cristianorãka nime”, ᵽoꞌimajare ãrĩũꞌmueka.

²⁷ Iꞌsia ᵽotojo Jerusalénkarã, Tuᵽarãroꞌsi bojaĩjirimajare eyaeka Antioquíarã, Jesúre yiꞌyurãte rẽrĩtirã imaekarõꞌõrã.

^28-30 Torã eyaekarãkaki ĩꞌrĩka imaekaki Agabo wãmeiki. Jesúre yiꞌyurãte rẽrĩtirã imaekarõꞌõrã eyatirã, Esᵽíritu Santore jeyobaaikaᵽi ᵽuᵽajoatirã, ikuᵽaka nare kẽrĩka: “Ritatojo kaꞌiarã nakẽsirabarãñu, baꞌarika torã ᵽurirãka simamaka”, Agabote nare ãrĩka. (Kẽrĩka uᵽakaja baꞌarika torã ᵽurika Romawejea ĩᵽamaki Claudiore imaeka ᵽoto.) Sãꞌmitiritirã, “Judeakarãre baꞌiaja jũaerã baayuꞌre, niñerũ nare maᵽũatayeꞌe”, Antioquíakarã Jesúre yiꞌyurãte ãrĩka. Narĩka uᵽakaja, narikaeka koꞌaᵽitorãja Saulo, Bernabéᵽitiyika ĩꞌᵽarãwãꞌtaja nijika, “Judeakarã Jesúre yiꞌyurãte imaruᵽutarimajare samija ĩjibe”, ãrĩwaꞌri.