Los Hechos 1 - Porciones del Nuevo Testamento en el idioma Letuama

Esᵽíritu Santore mijare yiñaꞌajããrãñu, Jesúre ãrĩka

^1-2 ¿Teófilo, yaje mime? Bikija ᵽaᵽera miroꞌsi yiᵽũataũꞌmuraᵽe. Jesúre imaroyiraᵽaka, suᵽabaatirã kiwãrõroyiraᵽakakaka saᵽi mire yibojaᵽũaraᵽe. Ritaja mire yibojaikareka maboꞌikakurirã Tuᵽarãre kire eꞌemiaekarõꞌõjĩrã miroꞌsi yoꞌotiyiraᵽe. Maboꞌikakurirã Tuᵽarãte kire eꞌemiaerã baaeka ruᵽu kirika bojariroka bojarimaja kiwãꞌmaekarãka kimaeka. Esᵽíritu Santore kire jeyobamaka kiyaᵽaeka uᵽakaja nabaarũkiakaka nare kibojaeka.

³ Reyakoꞌomakaja kiᵽuᵽatũrũeka beꞌrõ ĩꞌrãkurimarĩa kimajaroka bojataᵽarũkirãre kiᵽemakotowirika. Ĩꞌᵽarã ᵽoꞌimajarakarĩmi suᵽa nare baabaraka Jesúre imaeka. “Iꞌkitakijioka kime”, nañaokaroꞌsi suᵽa kibaaeka. Suᵽa baabaraka, “Ikuᵽaka yire yiꞌyurãre jãꞌmebaraka Tuᵽarãre nare imaruᵽutarãñu mae”, ãrĩka nare kiwãrõrijarika.

⁴ Ĩꞌrãkuri naka rẽrĩtirã baꞌabaraka kimaeka ᵽoto, ikuᵽaka Jesúre nare bojaeka: —Jerusalénrãja mija imabe ruᵽu. Maᵽaki Tuᵽarãte mijare bojaeka uᵽakaja Esᵽíritu Santore mijare kiᵽũatarãñu. Suᵽa imarĩ õꞌõrãja kire mija taꞌabe. Koᵽakaja mijare yibojaroyiraᵽaka ãꞌmitiriroyiraᵽarã mija ime.

⁵ Mamarĩ ᵽuri okoaᵽi takaja ruᵽukoꞌa ᵽoꞌimajare Juanre jũjeka. Maekaka ᵽuri noꞌojĩrãmarĩaja Esᵽíritu Santore Tuᵽarãte mijare ñaꞌajããrãñu kiyaᵽaika uᵽakaja mija imawãrũokaroꞌsi,==kika wãrũekarãte kẽrĩka.

Maboꞌikakurirã Jesúre aꞌrika

⁶ Ĩꞌrãrĩmi ate Jesúka rẽrĩtirã ikuᵽaka kire narĩka: —Yija ĩᵽamaki, “Maekaka ᵽuri Romatatarãte ᵽoatatirã Israel kaꞌiakarãre yijãꞌmerãñu Tuᵽarãte ᵽũataekaki imarĩ”, ¿yaje meñu jeꞌe?==kire narĩka.

⁷ Suᵽa naᵽakãꞌã ikuᵽaka nare kẽrĩka: —Marãkãꞌã baatirã mija õrĩrũkimarĩa sime. Maᵽaki Tuᵽarã ĩꞌrĩkaja sõñuka.

^8-9 Iꞌsuᵽaka simakoꞌomakaja Esᵽíritu Santore mijare ñaꞌrĩjãirãka ᵽoto, okajãjia mija jarirãñu. Suᵽa jariwaꞌri aᵽea wejearã aꞌritirã, yika imaekarã imarĩ, yimajaroka nare mija bojarãñu. Jerusalénrã, Judeakaꞌiarã, Samariakaꞌiarã, suᵽabaatirã ritatojo wejearekaoka, yimajaroka mija bojarijarirãñu,==nare kẽrĩka beꞌrõ, kire nayoiyukãꞌãja, maboꞌikakurirã keꞌrika. Oko ũmakakarã keyawaꞌrika ᵽoto kiõiberika.

¹⁰ Keꞌᵽakãꞌã wejeᵽemarãja nañakoarika. Iꞌsuᵽaka nimekãꞌãja ikuᵽarõꞌõᵽiji ĩꞌᵽarã ángelrãka boia jariroaka jããekarã naᵽõꞌirã ᵽemakotowirirĩkaekarã.

¹¹ Toᵽi ikuᵽaka nare narĩka: —Galileakarã, wejeᵽemarãja mija ñakoariaꞌsi mae. Mijaka imaroyiraᵽaki maboꞌikakurirã Tuᵽarãte kire eꞌemiamaka mija ĩaikijioka toᵽi mija ᵽõꞌirã etarãki ate keꞌyu uᵽakajaoka,==nare narĩka.

Judaswãsa õꞌtorã Matíare neꞌeka

¹² Olivos wãmeika ᵽusiarã nimaeka aᵽóstolrãka. Iꞌsia beꞌrõ Jerusalénrã naᵽeꞌrika mae, nimaekarõꞌõᵽi koyikuriji simaeka simamaka.

¹³ Wejearã eyatirã wiꞌiarã neyaeka. Ĩmika wiꞌiareka mirĩwaꞌritirã, kurarakarã ĩꞌrãkõꞌrĩmatorãja neyaeka. Ikuᵽati nimaeka torã eyaekarã: Ᵽedro, Juan, Santiago, Andrés, Feliᵽe, Tomás, Bartolomé, Mateo, Alfeo maki Santiago. Suᵽabaatirã aᵽerã imaekarã Simón Celote, suᵽabaatirã Santiago maki Judas.

¹⁴ Jesúᵽako María, kibeꞌerõꞌõkarã, suᵽabaatirã aᵽerã rõmijãᵽitiyika ĩꞌrãkõꞌrĩmatorãja narẽrĩrijarika ĩꞌrĩka uᵽakaja ᵽuᵽajoawaꞌri Tuᵽarãka jairã.

¹⁵ Iꞌsuᵽaka nabaaroyika ᵽoto Jesúre ãꞌmitiriᵽẽarĩ naka narẽrĩroyika, ciento veinte rõꞌõjĩrã ᵽoꞌimaja nimaeka. Ĩꞌrãkuri iꞌsirakamarã watoᵽekaᵽi miꞌmirĩkatirã ikuᵽaka Ᵽedrore nare bojaeka:

¹⁶ —Wãtaka ñoñurã, mija ãꞌmitiᵽe. Bikija mañeki David imaroyikaki Esᵽíritu Santore kire ãᵽakãꞌã, Jesúre nañiꞌaerã Judare bojajããrũkiakaka, kioꞌoeka.

¹⁷ Mia jeꞌe, yijakakiji Judare imakoᵽeroyiraᵽe. Kika yija imaokaroꞌsi Jesúre yijare wãꞌmaeka uᵽakaja kiwãꞌmaekakioka.

¹⁸ (Imakoꞌomakaja niñerũ yaᵽawaꞌri Jesúre kibojajããraᵽe. Kibojajããraᵽaka waᵽa niñerũ kire nijika mirãka kiᵽeꞌataraᵽakaᵽi kaꞌia nawaruaraᵽe. Sarã mae kiruᵽukoꞌaᵽi ñaꞌrĩtirã, kiñeꞌmea kijãwataraᵽe kitaᵽisia ᵽoriᵽateribaka.

¹⁹ Kibaaraᵽaka majaroka ãꞌmitiritirã, Jerusalénkarã Acéldama sawãmejĩꞌaekarã iꞌsia kaꞌia. Nokaᵽi, “Riwekaꞌia”, ãrĩrika simaeka.)

²⁰ Ikuᵽaka bikija Davidre oꞌoeka: “Baꞌiᵽarãmarĩa jariwaꞌrirãka wiꞌia sarã imaekakire aꞌritaᵽawaꞌrika simamaka. Aᵽika etatirã sarã imaberijĩki”. Toᵽi ᵽuri, “Aᵽika oꞌatirã kibaꞌiraberũ mamarĩkaki baꞌiraberimirãka”, ãrĩwaꞌri Davidre oꞌoeka uᵽakaja Judare baaeka.

^21-22 Suᵽa imarĩ kire oꞌarika sime mae. Maĩᵽamaki Jesúre maᵽõꞌirã imaroyiraᵽaka ᵽoto makaja imaroyiraᵽakire maꞌeyeꞌe. Juanre ruᵽukoꞌa Jesúre jũjemaka ĩaraᵽaki, maboꞌikakurirã Jesúre aꞌraᵽakarõꞌõjĩrã maka imaraᵽaki kimarãñu. Suᵽabaatirã kireyakoꞌomakaja Jesúre ᵽuᵽatũrũraᵽaka beꞌrõ kire ĩaraᵽakioka kimarãkareka jia simarãñu,==Ᵽedrote nare ãrĩka.

²³ Torãjĩrã mae, ĩꞌᵽarã torã imaekarãte nawãꞌmaeka. “José, Matíasᵽitiyika nime jia ᵽuᵽakirã”, narĩka. José Barsabás kiwãmea imakoꞌomakaja aᵽewãme Justo kire narĩka.

^24-25 Torãjĩrã mae, —Yija ĩᵽamaki Jesús, miꞌi mime ritaja ᵽoꞌimajare ᵽuᵽajoaika õñuka. “Ĩꞌĩ kime Judas õꞌtoarã oꞌarũkika mijaka wãrõrimaji”, ãrĩwaꞌri yijare miõrĩrũjebe. Judas ᵽuri yijare aꞌritaᵽaraᵽaki baꞌiaja baarika yaᵽawaꞌri. Suᵽa imarĩ maekaka baꞌiaja baariwaᵽa tiyibeyurõꞌõrã kime,==kire narĩka.

²⁶ Suᵽa imarĩ José wãmea ãtarã noꞌojĩꞌaeka, suᵽabaatirã Matías wãmea aᵽorã. Toᵽi mae jotoarã sajaꞌajããtirã, sanajãjeeka mamarĩ ñaꞌrĩrão ĩaokaroꞌsi. Sĩatirã, “Matías kime Tuᵽarãte wãꞌmaiki”, narĩka. Torãjiteᵽi ĩꞌᵽoũꞌᵽuarãeꞌearirakamakiroꞌsi kijarika mae.