Filipenses 2 - Porciones del Nuevo Testamento en el idioma Letuama

“Tẽrĩriki imariᵽotojo ‘Imatiyaiki ñime’, ãrĩberikaki Cristo”, Ᵽablote ãrĩka

^1-2 Kirirã mija imamaka, jia ᵽuᵽaᵽaraka mija imaokaroꞌsi Cristore mijare jeyobaayu. Mijare kiwãtayu baꞌiaja jũabaraka mija imakoreka. Suᵽabaatirãoka jaꞌatabekaja Esᵽíritu Santore mijaka imarijayu. Jia Cristore mare wayuĩaika simamaka jĩjimaka yituiokaroꞌsi ikuᵽaka mija imarika yiyaᵽayu: Mija jeyomarãka ĩꞌrãtiji ᵽuᵽakirã mija imabe. Ritaja mija imauᵽatiji, jia wayuĩabuꞌabaraka ĩꞌrĩka taꞌiarãja mija imabe, Cristore yaᵽaika uᵽakaja ĩꞌrãrokarekaja ñaꞌrĩyaarĩji ᵽuᵽajoairã mija imabe.

³ Aᵽerãte ᵽemawaꞌribaji imarika mija ᵽakatariaꞌsi. “Ᵽoꞌimajare yijare jiyiᵽuᵽayeerũ”, ãrĩwaꞌri mija jaiaꞌsi. Iꞌsiroka ᵽuᵽajoabekaja, “Yijare tẽrĩwaꞌribaji imatiyairã nime jeꞌe aᵽeyari aᵽerã”, ãrĩwaꞌri jiyiᵽuᵽaka nare mija õrĩrijaᵽe.

⁴ Mijaroꞌsi takaja jia mija imarũkia ᵽuᵽajoabekaja aᵽerãte jia imarũkiakakaoka mija ᵽuᵽajoarijaᵽe.

⁵ Iꞌsuᵽaka mijare ñañu Jesucristore imaekarokaᵽiji õrĩtirã kime uᵽaka mija imarijayaokaroꞌsi. Ikuᵽaka sime:

⁶ Tuᵽarãka ĩꞌrãtiji tẽrĩriki imariᵽotojo, “Iꞌsuᵽaka ñima yijaꞌatabesarãñu”, ãrĩbeyuka Cristore imaeka.

⁷ Tẽrĩwaꞌribaji kima jaꞌatatirã, ᵽoꞌimaji kiᵽoꞌijirika. Suᵽabaatirã aᵽerãte baꞌirabeĩjirimaji uᵽaka kijarika.

⁸ Ika kaꞌiarã kimaeka ᵽoto, “Yire ᵽemawaꞌribajika mime”, ãñuka imarĩ Kiᵽakire kiyiꞌrika. Iꞌsuᵽaka imaekaki imarĩ, baꞌiaja baarimajare najããroyireka uᵽaka yaᵽua tetaekarã kire naᵽatakĩaeka, sarã kireyaokaroꞌsi ᵽariji Tuᵽarãte kiyiꞌrika.

⁹ Kireyaeka beꞌerõꞌõ õñia kire jariᵽeꞌrirũjetirã, ikuᵽaka Tuᵽarãte kire ãrĩka: “Ritaja ima ᵽemawaꞌribajirã jiyiᵽuᵽaka õrĩrũkika mimarãñu. Ritaja imarã ᵽemawaꞌribaji ĩᵽi mimarãñu”, kire kẽrĩka.

¹⁰ Tuᵽarãte kire ãrĩka seyarãka ᵽoto nimauᵽatiji kiᵽoijiꞌaekarã: Maboꞌikakurirã imarã, õꞌõrã imarã, marokakurirã imarã ᵽariji Jesúre najiyiᵽuᵽayeerãñu.

¹¹ Naᵽemarã kimarãka ᵽoto ĩatirã, “Ritaja imarã ĩᵽamaki Jesucristore ime”, kireka narĩrãñu. Baawaꞌri Kiᵽaki Tuᵽarãteoka jiyiᵽuᵽaka norĩrãñu.

Jesucristore imaekarokaᵽi õrĩtirã saᵽiji mija imarijaᵽe kire yiꞌribeyurã wãjitãji

¹² Yijeyomarã, iꞌsuᵽaka Cristore baaeka ãꞌmitiriwaꞌri iꞌsuᵽakajaoka Tuᵽarãte mija yiꞌrijĩñu. Mija ᵽõꞌirã ñimaraᵽaka ᵽoto jia kire yiꞌyurã mija imamaka ñiaraᵽe. Maekaka ᵽuri mija ᵽõꞌirã ñimabeyua simamaka torã ñimaroyiraᵽaka ᵽoto jia kire mija yiꞌriroyiraᵽaka uᵽakaja jiibaji kire yiꞌᵽaraka mija imarika yiyaᵽayu. Suᵽa imarĩ baꞌiaja mija jũarũkiareka Tuᵽarãte mijare tããeka simamaka, dakoa okamirãmarĩaja, kiyaᵽaika uᵽakaja mija baarijaᵽe.

¹³ Iꞌsuᵽaka mijare ñañu, “Yiyaᵽaika takaja baariᵽuᵽakirã nimarũ”, ãrĩwaꞌri Tuᵽarãte mijare jeyobaarijayua simamaka.

¹⁴ Mija imarijayu uᵽakaja, baꞌiaja jaibuꞌabekaja, jĩjimakaᵽi mija imarijaᵽe.

^15-16 Iꞌsuᵽaka mijare ñañu, oka mirãmarĩaja, jia wãjiroka oyiaja baarijayurã mija imaokaroꞌsi. Suᵽa imarĩ ika wejeareka baꞌiaja baarimaja watoᵽekarã imariᵽotojo, “Tuᵽarãte yaᵽaika uᵽaka baairã nime. Dakoa oka imabeyua naroꞌsi”, mijareka narĩrãñu. Jia baairã mija imarãkareka, Tuᵽarãte yaᵽaika mija baarãñu. Suᵽa imarĩ Cristore ᵽeꞌrietarãñurĩmi, “Nare yibojaeka uᵽakaja baarijayurã nime”, ãrĩwaꞌri jĩjimakaᵽi kire yibojarãñu.

^17-18 Tuᵽarãte yaᵽaika uᵽakaja Jesúrika bojariroka yibojariᵽareaja, aᵽeyari yire najããrũjerãñu jeꞌe. Sayiꞌyurã imawaꞌri, baꞌiaja mija jũakoꞌomakaja jĩjimaka mijaka ñime. Iꞌsuᵽaka imaki imarĩ iꞌsuᵽakajaoka yika mija imarika yiyaᵽayu.

Timoteo, Eᵽafroditoᵽitiyika ĩꞌᵽarãte Filiᵽoswejearã Ᵽablote nare ᵽũatariᵽuᵽajoaeka

¹⁹ Maĩᵽamaki Jesúre yaᵽarãka uᵽakaja, ñojimarĩji mija ᵽõꞌirã Timoteore yiᵽũatarãñu jeꞌe, yimajaroka mijare kibojamaka jia mija ᵽuᵽayaokaroꞌsi. Õꞌõrã ate kiᵽeꞌrietarãka ᵽoto mija majaroka yire kibojamaka ãꞌmitiritirã jia yiᵽuᵽarirãñu yiroꞌsioka.

²⁰ Jia mija imarika ᵽuᵽajoatiyaiki kimamaka, mija ᵽõꞌirã kire yiᵽũatariyaᵽayu. Maki aᵽika kiuᵽaka ᵽuᵽajoaiki imabeyuka õꞌõrã.

²¹ Aᵽerã ᵽuri naroꞌsitakaja nimarũkiakaka ᵽuᵽajoabaraka imarã. Iꞌsuᵽaka imawaꞌri Jesucristore yaᵽaika uᵽaka baarika ᵽuᵽajoabeyurã nime.

²² Iꞌsuᵽaka ᵽuᵽajoairãte ima simakoꞌomakaja, “Timoteo ᵽuri Jesucristore yaᵽaika uᵽakaja baarijayuka”, ãrĩwãrũirã mija ime. Iꞌsuᵽaka kireka mija ãñua imarĩ, “Kimaki uᵽakaja jia Ᵽablote kijeyobaarijayu, rĩkimabaji Cristorika bojariroka yiꞌyurãte imarika yaᵽawaꞌri”, ãñurã mija ime.

²³ Suᵽa imarĩ, “Ikuᵽaka ĩᵽarimarãre yire baarãñu”, ñarĩwãrũrãka ᵽoto, Timoteore mija ᵽõꞌirã yiᵽũatarãñu yimajaroka mijare kibojaerã.

²⁴ Suᵽabaatirã, “Yiꞌioka ñamajĩ naᵽõꞌirã yaꞌrirãñu jeꞌe aᵽeyari”, ñarĩᵽuᵽajoayu. Iꞌsuᵽaka yibaarãñu, ñiᵽamakire yire jeyobaarãkaᵽi ãrĩwaꞌri.

²⁵ Majeyomaki Eᵽafroditore yire jeyobaaerã yiᵽõꞌirã kire mija ᵽũataraᵽaka jia sime. Yijũaika uᵽakaja baꞌiaja jũaiki kime kiroꞌsi Cristorika bojariroka wãrõrimaji imarĩ. “Cristorika bojariroka mija bojaꞌsi”, sãꞌmitiriᵽeꞌyoirãte ãñua imakoꞌomakaja, yire jeyobaarijayuka kime. Jia yire kijeyobaaika simakoꞌomakaja mija ᵽõꞌirã kire yiᵽeꞌataerã baayu.

²⁶ “Wãmarĩa yijaraᵽaka majaroka ãꞌmitiritirã, baꞌiaja Filiᵽoswejeakarãre ᵽuᵽayu jeꞌe”, ãrĩwaꞌri baꞌiaja ᵽuᵽawaꞌri, mijare ĩarika kiyaᵽayu.

²⁷ Rita sime, kũᵽajĩroꞌsiji kireyarũkia jariwaꞌrikoꞌomakaja Tuᵽarãte kire wayuĩamaka kitãrãᵽe. Yire ᵽariji wayuĩawaꞌri, “Wẽkomaka imariwiꞌiarã imawaꞌri baꞌiaja kiᵽuᵽayua ᵽemawaꞌribaji Eᵽafroditore reyamaka baꞌiaja Ᵽablote ᵽuᵽariaꞌsi”, ãrĩwaꞌri, Tuᵽarãte kire tããraᵽe.

²⁸ Suᵽa imarĩ ñojimarĩji mija ᵽõꞌirã kire yiᵽeꞌataerã baayu. Jia dakoa risirika baꞌijũaberikaki uᵽakaja mija ᵽõꞌirã keyamaka ĩatirã jĩjimaka mija imarãñu. Kire yiᵽeꞌatatirãka beꞌerõꞌõ ᵽuri, baꞌiaja ᵽuᵽaritiyabekaja ñimarãñu yiꞌioka.

^29-30 Ñoakurirã mija ima simamaka marãkãꞌã baatirã Cristorika bojariroka yiwãrõika yire mija jeyobaawãrũbeyu. “Kire kijeyobaarũ”, ãrĩwaꞌri mija ᵽũataraᵽaki ᵽuri jia yire jeyobaaraᵽaki. Suᵽa imarĩ koiteje kireyakoᵽeraᵽaka simamaka jia jiyiᵽuᵽaka kire mija õᵽe. Jia jãjika mija ᵽõꞌirã keyamaka jĩjimakaᵽi kire mija eꞌetoᵽe mija uᵽakaja Maĩᵽamakiriki kima simamaka. Suᵽabaatirã, jia jiyiᵽuᵽaka mija õᵽe kiuᵽaka imarãte.