Filipenses 1 - Porciones del Nuevo Testamento en el idioma Letuama

Ᵽablo, kijeyomaki Timoteoᵽitiyika Filiᵽoswejeakarãroꞌsi ᵽaᵽera naᵽũataeka

¹ Yijeyomarã Filiᵽoskarã, Jesucristore jia baaikaᵽi kirirã imarijayurã, suᵽabaatirã kire yiꞌyurãte imaruᵽutarimaja suᵽabaatirãoka, nare jeyobaarimaja, “Jia mija imabe toᵽi”, ãrĩwaꞌri oka mijaroꞌsi yija oꞌoᵽũayu. Yiꞌi Ᵽablo, yijeyomaki Timoteoᵽitiyika mijaroꞌsi sayija ᵽũatayu Jesucristoroꞌsi baꞌirabeĩjirimaja imarĩ.

² Suᵽa imarĩ, Maᵽaki Tuᵽarã, suᵽabaatirã maĩᵽamaki Jesucristoreoka, “ ‘Jia dako okamirãmarĩaja nimarũ’, ãrĩwaꞌri jia nare mija jeyobaabe”, ãᵽaraka mijaroꞌsi nare yija jẽñerijayu.

“Filiᵽoswejeakarã Jesucristore ãꞌmitiriᵽẽairãte jia mibaayu Tuᵽarã”, Ᵽablote ãrĩka

³ Mijare yiᵽuᵽajoaika rakakaja, “Jia mibaayu”, Tuᵽarãte ñarĩrijayu.

^4-5 Suᵽabaatirã Tuᵽarãte mijaroꞌsi yijẽñeika rakakaja jĩjimakaᵽi kire yijairijayu. Tuᵽarãte mija yiꞌriũꞌmuekarõꞌõjĩteᵽi, maekakaoka aᵽerãte Jesúrika bojariroka bojataᵽabaraka yire mija jeyobaarijayua simamaka iꞌsuᵽaka yibaayu.

⁶ Rita sime, jia Tuᵽarãte mija ᵽuᵽaka baaũꞌmutika sime, kiyaᵽaika uᵽakaja mija imamirĩrĩkawaꞌyaokaroꞌsi mijare kijeyobaarijarirãñu, Jesucristore etarãñurĩmi rõꞌõjĩrã.

⁷ Mijare wãtaiki imarĩ, iꞌsuᵽaka mijareka yiᵽuᵽajoayu. Yire jeyobaariᵽuᵽakirã imarĩ, ĩꞌrãkurimarĩa yiyaᵽaika yiroꞌsi mija ᵽũatarijayu. Wẽkomaka imariwiꞌiarã Jesúrika bojarirokakaka yaᵽabeyurã wãjitãji, “Ikuᵽaka sime”, ãrĩwaꞌri nare okaeꞌebaaraka, yibojajiirijayu. Suᵽa yibaayu ᵽoꞌimajare yibojawãrõrũkia Tuᵽarãte yire jaꞌataeka simamaka. Iꞌsuᵽaka ñimarijayua simamaka yiwayuoka õrĩwaꞌri yire mija ᵽũatarijayua jia sime.

⁸ Jesucristore wãtaka mijare õñuaᵽi ãrĩwaꞌri mijaka ñima Tuᵽarãte õñu. Iꞌsuᵽaka imaki imarĩ jimarĩa mijare ñiariᵽakatarikoᵽeyu ate.

^9-11 Suᵽa imawaꞌri, ikuᵽaka Tuᵽarãte mijaroꞌsi yijẽñeĩjirijayu. “Jia mire õrĩrijaᵽaraka miyaᵽaika uᵽakaja rikatuyurã imarĩ jiibaji wayuĩabuꞌairã nimarũ. Miyaᵽaika uᵽaka imarika najẽrãkoꞌarũ”, ãrĩwaꞌri Tuᵽarãte mijaroꞌsi yijaiĩjirijayu. “Jia baarijaririka jaꞌatabekaja nimarũ”, ãrĩwaꞌri. Suᵽa mija imamaka ĩatirã Cristore etarãñurĩmi, “Dakoa okamirãmarĩaja jia yika nima nare ñoñu”, mijareka kẽrĩrika yiyaᵽayu. Suᵽabaatirãoka Jesucristore mijare jeyobaaikaᵽi, “Tuᵽarãte yaᵽaika uᵽakaja baarijayurã nimarũ mae”, mijareka ñañu. Suᵽa imarĩ mijare kijeyobaamaka ĩatirã, “Tẽrĩwaꞌribaji jia baaiki Tuᵽarãte ime”, ãrĩwaꞌri aᵽerãte kire jiyiᵽuᵽayeeokaroꞌsi yijaiĩjirijayu.

“Rĩkimarãja Jesucristorika bojariroka ãꞌmitiriᵽẽairãte ime”, Ᵽablote ãrĩka

¹² Yijeyomarã, Jesúrika bojariroka yiwãrõriᵽareareka baꞌiaja yijũaika simakoꞌomakaja, ᵽoꞌimajare yibojarijaꞌatabeyua sime. Baawaꞌri rĩkimarã aᵽerã yibojaika ãꞌmitiriwãrũtirã kire nayiꞌririjayuakaka jia mija õrĩwãrũbe.

¹³ Mia, “Cristore kiyiꞌyu ᵽiꞌiwaꞌri wẽkomaka imariwiꞌiarã kime”, ika wejea ĩᵽamaki wiꞌia ĩarĩrĩrimaja surararãkare yireka ãñu. Suᵽabaatirã ᵽoꞌimaja ritaja ika wejeareka imarãoka iꞌsuᵽaka yireka nañu.

¹⁴ Suᵽa imarĩ, Cristore yiꞌririjaꞌataberiwaꞌri wẽkomaka imariwiꞌiarã ñima õrĩtirã, baꞌiaja jũarika kĩkibekaja rĩkimarãja ika wejearã Maĩᵽamakire yiꞌyurã jiibaji kirika nabojarijayu.

¹⁵ Simakoꞌomakaja, ĩꞌrãrimarã ᵽuri, “Wẽkomaka imariwiꞌiarã Ᵽablote ima marã imabeyua”, ãñurã. Suᵽa ãñurã imarĩ, “Ᵽablote bojaikakaka ãꞌmitiriberiwaꞌri rĩkimabaji yijare ãꞌmitiriᵽẽairãte imarãñu jeꞌe”, nañu, ñimarijayuakaka oakiyurã. Aᵽerã ᵽuri jia yika imawaꞌri jiaᵽi Cristorika bojariroka bojarijayurã.

¹⁶ Yire wayuĩairã imarĩ, “Tuᵽarãᵽi ãrĩwaꞌri wẽkomaka imariwiꞌiarã Ᵽablote ime”, ãñurã. “Suᵽa imarĩ Romawejeakarã ĩᵽarimarã Cristorika bojariroka bojarika nayaᵽabeyu simakoꞌomakaja Ᵽablote sanajẽᵽakãꞌã ᵽuri, nawãjitãji jia yiꞌriwãrũiki kime”, nañu.

¹⁷ Aᵽerã imarã yire ᵽemawaꞌribaji imarika yaᵽakoᵽewaꞌri, “Cristorika bojariroka yija wãrõmaka yijare takaja ãꞌmitiriᵽẽairãte imarãñu jeꞌe. Sãꞌmitiritirã yijare oakiriwaꞌri, wẽkomaka imariwiꞌiarã kimarõꞌõᵽi baꞌiaja Ᵽablote ᵽuᵽarirãñu jeꞌe”, narĩkoᵽeyu.

^18-19 Suᵽa nabaarijayua marã imabeyua yiroꞌsi. Ritaja Cristorika bojariroka nawãrõrijayuaᵽi ãrĩwaꞌri jĩjimaka ñime. “Tuᵽarãte yiroꞌsi mija jẽñeĩjimaka, suᵽabaatirã Esᵽíritu Santore yire jeyobaamaka ᵽariji ritaja yijũaika jia oyiaja yiroꞌsi sawaᵽuꞌrirãñu jeꞌe”, ñarĩᵽuᵽajoayu.

²⁰ Ᵽuᵽajoaiki imarĩ, ĩᵽarimarã ᵽemarã naka yijairãka ᵽoto, “Dakoa iꞌyomarĩaja yijairãñu jeꞌe”, ãñuka ñime. Suᵽa imawaꞌri Cristorika bojariroka jia wãjia yibojaraꞌaeka uᵽakaja nare sayibojariyaᵽayu. Suᵽa imarĩ yire najẽrĩrãka beꞌerõꞌõ, yire najããkoᵽejĩka, yire naᵽoatajĩkaoka, marã imabeyua yiroꞌsi. Ritaja yibaarijayua Cristore jiyiᵽuᵽayeerũkiakaka imarika yiyaᵽayu.

^21-22 Suᵽa imarĩ, yire najããbesarãkareka ritaja yibaarijayuaᵽi jia Cristore jiyiᵽuᵽayeebaraka ᵽoꞌimajare imarika yiyaᵽayu. Yire najããkoᵽerãkaoka jiibaji yiroꞌsi simarãñu Cristoka jia imarũkika ñima simamaka. Iꞌsuᵽaka simakoꞌomakaja yire naᵽoatarãkarekaoka, Cristorika bojariroka yibojamaka rĩkimarãja sãꞌmitirijiyurãñu. Suᵽa imarĩ, “¿Dika sime imatiyaika jeꞌe?”, ãrĩwãrũbeyuka ñime.

²³ “Ika ĩꞌᵽabaꞌiwãꞌtaja jia yiroꞌsi ima”, ñarĩwãrũbeyu. Simakoꞌomakaja reyatirã maboꞌikakurirã jiibaji kika imarika simarãñu jeꞌe yiroꞌsi ñarĩᵽuᵽajoarijayu.

²⁴ Iꞌsuᵽaka yiᵽuᵽaka imakoꞌomakaja õñia ñimeje mijare jeyobaabaraka imarika yiyaᵽayu jiibaji mijaroꞌsi simaerã.

²⁵ Suᵽa imarĩ, “Jiibaji Tuᵽarãte yiꞌᵽaraka jĩjimaka kika nimaokaroꞌsi nare wãrõbaraka, naka ñimarãñu jeꞌe ate”, ãrĩᵽuᵽajoaiki ñime.

²⁶ Wẽkomaka imariwiꞌiarã ñima beꞌerõꞌõ, ᵽoritirã mija ᵽõꞌirã yeyarãka ᵽoto, “Wẽkomaka imariwiꞌiarã kimaraᵽarõꞌõᵽi Ᵽablote miᵽoaeka jiitaka kire mibaayu”, Jesucristore ãᵽaraka jia jĩjimaka mija imarãñu jeꞌe.

^27-28 Yiroꞌsi wẽkomaka imariwiꞌiarã simarãka uᵽakaja simakoᵽerãka marã imabeyua. Jia Cristorika bojariroka yiꞌyurã imarĩ, sabojaika uᵽakaja jia baabaraka mija imarijaᵽe. Mija ᵽõꞌirã yeyarãka uᵽarãka, yeyabesarãkarekaoka jia ĩꞌrãtiji ᵽuᵽajoabaraka mija imabe, Cristore yiꞌririjaꞌatabeyurã mija ima ñoñaokaroꞌsi. Aᵽerãte mijare okabaakoꞌomakaja ĩꞌrĩka taꞌiarãja imarã imarĩ, Jesúrika bojariroka mijare yiwãrõraᵽaka uᵽakaja mija imarijayua ñaꞌmitirirãñu jeꞌe. Baꞌiaja mijare baarijayurã ruᵽu wayuᵽiꞌribekaja mija imabe. Iꞌsiareka mija ima ĩatirã, “Rita, Tuᵽarãka õñia imajiᵽarũkirã nime, narĩrãñu jeꞌe. Yija ᵽuri baꞌiaja nare yija jaiwãꞌimañu ᵽareareka, baꞌiaja imarika tiyibeyurõꞌõrã aꞌrirũkirã”, narĩᵽuᵽajoarãñu jeꞌe. Mijare yibojaika Tuᵽarã ĩꞌrĩkaja imaki sabaarimaji.

²⁹ Jia mijare baawaꞌri kirirãroꞌsi Tuᵽarãte mijare wãꞌmaeka, “Baꞌiaja jũakoꞌomakaja yimakire yiꞌᵽaraka nimarũ”, ãrĩwaꞌri. Suᵽa imarĩ kire mija yiꞌyua jaꞌatabekaja mija imamaka ĩatirã aᵽerãoka yiꞌrirãñu Cristore.

³⁰ Mija ᵽõꞌirã ñimaraᵽaka ᵽoto baꞌiaja yire nabaamaka mija ĩaraᵽaka uᵽakaja jũairã mija ime mijaoka. Mae Romawejearã aᵽerãte baꞌiaja yire baaika majaroka mija ãꞌmitiyu jeꞌe ate.