Ap 8 - Porciones del Nuevo Testamento en el idioma Letuama

Ᵽiyikuku ᵽaᵽera buᵽeka ᵽaᵽatãteka imaraᵽaka kiwieraᵽarõꞌõ

¹ Torãjĩrã mae Oveja weiwaꞌyua uᵽaka imaki ĩꞌᵽotẽñarirakakuku ᵽaᵽera buᵽeka ᵽiyikuku ᵽaᵽatãteka ima kiwieraᵽe. Sakiwieraᵽakarõꞌõjĩte treinta minuto rõꞌõjĩrã maboꞌikakurirõꞌõ ñaꞌkikãꞌãja jaraᵽaka.

² Iꞌsuᵽaka simaraᵽaka beꞌrõ ĩꞌᵽotẽñarirakamarã ángelrãkare Tuᵽarã wãjitãji rĩkamaraᵽe. Ĩꞌᵽotẽñarirakao tromᵽeta Tuᵽarãre nare ĩjikarã nimaraᵽe.

³ Iꞌtojĩrã ate aᵽika ángel õñioka ᵽearũkia orokaka baaeka rikatirã etaraᵽaki. Tuᵽarãre jiyiᵽuᵽayeewaꞌri joeĩjiritẽrĩa orokaka baaeka wãjitãji ᵽemaari keyarĩkaraᵽe. Torã kimaraᵽaka ᵽoto, rĩkimakaja õñioka ĩᵽi ruᵽarikũmuarã ruᵽaraᵽakire kire ĩjiraᵽe, joeĩjiritẽrĩarã sakijoeokoroꞌsi. Tuᵽarãroꞌsi joeĩjibaraka kire yiꞌyurãre kire jẽñeraᵽaka kiᵽõꞌirã eyaraᵽaka ũmakakaka ĩꞌrãtiji.

⁴ Õñioka kijoeika ũmakakajiijĩsia kire najẽñerijayua Tuᵽarã ᵽõꞌirã eyaraᵽaka.

⁵ Torãjĩrã Tuᵽarãre jiyiᵽuᵽayeebaraka õñioka ᵽearũkia kirikaraᵽakarã joeĩjiritẽrĩakaka ᵽeka yaꞌtarika kijããᵽorotaraᵽe. Suᵽa sabaatirã ika ritatojorã sakiweꞌataraᵽe. Suᵽa kibaaraᵽakarõꞌõjĩte jimarĩ jãjia wĩᵽoa yaaraᵽaka. Jãjia okaritirã yoeᵽi aᵽea jãꞌmijiyekoraᵽaka. Torãjite kaꞌia iyiraᵽaka mae.

Tromᵽeta ángelrãkare ᵽuᵽueka

⁶ Torãjĩrã mae, saᵽuᵽuokoroꞌsi tromᵽeta rikatikaja ĩꞌᵽotẽñarirakamarã ángelrãkare imaraᵽe.

⁷ Mamarĩtaka saᵽuᵽuraᵽakire ᵽuᵽuraᵽakaka, ĩꞌrãtiji, okojiyia riwea rukueka, ᵽeka yaꞌtarika jũjiraᵽaka. Iꞌsuᵽaka sabaaraᵽaka beꞌrõ kaꞌia ñeꞌmetãji rokajĩrã ojibaka ooraᵽaka. Yaᵽua, taya õñioka.

⁸ Kirokajĩte imaraᵽakire ᵽuᵽuraᵽaka ᵽoto ᵽusia uᵽaka jũꞌrẽtirã riaᵽakiakarã ñaꞌrãᵽe. Suᵽabaatirã riaᵽakiokoa ñeꞌmetãji rokajĩrã riwearoꞌsi jaraᵽaka.

⁹ Suᵽa sabamaka riaᵽakiakareka ima ñeꞌmetãji rokajĩrã jĩrĩᵽataraᵽaka. Kũmuᵽakiaka sareka imaraᵽakaoka ñeꞌmetãji rokajĩrã ñaꞌmiᵽataraᵽaka.

¹⁰ Iꞌtojĩrã aᵽika ángel tromᵽeta ᵽuᵽuraᵽaki ate. Kiᵽuᵽuraᵽakarõꞌõjĩte, ĩmiᵽi tãꞌᵽiᵽakiaka ᵽeka jũꞌrẽika uᵽaka jũꞌrẽñaꞌrãᵽaka. Riaka, koᵽeaᵽi okoa juruika ñeꞌmetãji rokajĩrãoka ñaꞌraᵽaka.

¹¹ Iꞌsuᵽaka baaraᵽaki Jĩmia wãmeiki tãꞌᵽire imaraᵽe. Ikiᵽi ãrĩwaꞌri ñeꞌmetãji rokajĩrã ruꞌarĩ jĩmia okoa jaraᵽaka. Iꞌsia okoa ukutirã rĩkimarãja ᵽoꞌimajare reyaraᵽe.

¹² Torãjite kirokajĩkaki ángelre tromᵽeta ᵽuᵽuraᵽe. Sakiᵽuᵽuraᵽaka ᵽoto aiya ĩmikaki, ñamikakioka, ñeꞌmetãji rokajĩrã nayaaboaika ruirĩkaraᵽaka. Rĩkamakaja tãꞌᵽia imaraᵽakaoka ñeꞌmetãji rokajĩrã ririᵽatarijaraᵽaka. Suᵽa baawaꞌri botarakakuri aiyajẽrã rõꞌõjĩrã ĩꞌrãrĩmi uᵽakaja aiya ĩmikakire neiñamitaꞌraᵽe. Ñamikakioka iꞌtojĩrã ñoaka ĩꞌrãñami uᵽakaja neiñamitaꞌririjaraᵽaki.

¹³ Toᵽi mae yuꞌawaꞌri ĩaerã baakõrĩ awaka wiraᵽaka ñiaraᵽe. Iki jãjirokaᵽi ikuᵽaka ãrĩkoraᵽaki mae: —Yee jaꞌa, ritatojo wejeareka imarãre baꞌitakaja jũaerã baayu. Maekarakamarã ángelrãka tromᵽeta ᵽuᵽubeyukajirã naᵽuᵽuᵽatarãka ᵽoto iꞌsuᵽaka simarãñu,==kẽrĩkoraᵽaka ñaꞌmitiraᵽe.