Ap 6 - Porciones del Nuevo Testamento en el idioma Letuama

Ĩꞌrõtẽñarirakabaꞌi saᵽaᵽatãteka ima ᵽaᵽera buᵽeka

¹ Iꞌsuᵽaka simaraᵽaka beꞌerõꞌõ Oveja weiwaꞌyua uᵽaka imaki, ᵽaᵽera buᵽeka ᵽaᵽatãteka mamarĩkakuku kiwiemaka ñiaraᵽe. Torãjĩrã mae, botarakamarã maikoribeyu uᵽaka imaraᵽarãkaki wĩᵽoa jãjitaka jãꞌmitaika uᵽaka jaibaraka ikuᵽaka ãrãᵽaki: —Miꞌtabe.==

² Kẽᵽakãꞌã ĩaᵽũataerã baakõrĩ, ĩꞌrĩka kawaru boikare iꞌtarijaᵽakãꞌã ñiaraᵽe. Kiᵽemarã tuyuraᵽaki tẽmuᵽãia rikaiki, kiruᵽukoꞌarã buꞌya Tuᵽarãre kire tuaekaki kimaraᵽe. Saᵽi ãrĩwaꞌri tẽrĩrimaji imarĩ, aᵽeakaꞌiarã imarãre kitẽrĩrijaraᵽe mae.

³ Suᵽabaatirã aᵽekuku ate ᵽaᵽera buᵽeka ᵽaᵽatãteka Oveja weiwaꞌyua uᵽaka imakire wieraᵽaka ᵽoto ikuᵽaka aᵽika maikoribeyu uᵽaka imaraᵽakire ãrĩkoraᵽe: —Miꞌtabe.==

⁴ Iꞌsuᵽaka kẽᵽakãꞌã kawaru jũꞌakire iꞌtarijaᵽakãꞌã ñiaraᵽe. Kiᵽemarã tuyuraᵽaki ᵽoꞌimajare jããrũkia sara Tuᵽarãre kire ĩjikaki kimamaka ñiaraᵽe. Ᵽoꞌimajare jããbuꞌabaraka imaokoroꞌsi Tuᵽarãre jãꞌmekaki kimaraᵽe.

⁵ Iꞌkire aꞌritaᵽaraᵽaka beꞌerõꞌõ aᵽekuku ᵽaᵽera buᵽeka ᵽaᵽatãteka Oveja weiwaꞌyua uᵽaka imakire wieraᵽe. Iꞌtojĩte ate aᵽika maikoribeyu uᵽaka imaraᵽakire ikuᵽaka ãrĩkoraᵽe, —Miꞌtabe.==Suᵽa imarĩ yoirã baakõrĩ kawaru neikare ñiaraᵽe. Kiᵽemarã tuyuraᵽaki rĩkia jẽrãbaarũkia rikaiki kimaraᵽe.

⁶ Suᵽabaatirã maikoribeyu uᵽaka imaraᵽarã watoᵽekaᵽi ikuᵽaka sãrĩkoraᵽe: —Trigo, cebada ĩjitirã kũᵽajĩrĩti niñerũ sawaᵽa eꞌerũkia samijarirũjebe. Iꞌsuᵽaka simamaka ĩꞌrãrĩmi baꞌiraberiwaᵽa ĩꞌrãwajojĩkaja trigo tõᵽorika simarãñu. Iꞌsuᵽakajaoka simarãñu ĩꞌrãrĩmi baꞌiraberiwaᵽa maekarakawajojĩka cebada tõᵽorika simarãñu. Imakoꞌomakaja, olivoᵽitiyika, iyaka ĩꞌᵽabaꞌi õterikia mirũetarirũjebesarãñu. Iyaokoa, olivo iyebaka yoꞌarũkiaoka waᵽajãꞌrĩmarĩa mijarirũjebe,==ãrĩbaraka sajaikoraᵽe kawaru ᵽemarã tuyuraᵽakire.

⁷ Iꞌkire aꞌraᵽaka beꞌerõꞌõ, aᵽekuku ᵽaᵽera buᵽeka ᵽaᵽatãteka Oveja weiwaꞌyua uᵽaka imakire wieraᵽe. Sabeꞌerõꞌõ ikuᵽaka ᵽiyika maikoribeyu uᵽaka imaraᵽakire ãrĩkoraᵽe: —Miꞌtabe.==

⁸ Suᵽa kẽrãᵽaka beꞌrõ, jũꞌsiᵽoa ĩoika ᵽoyaiki kawarure ñiaraᵽe. Kiᵽemareka tuyuraᵽaki reyarika jãꞌmerimaji wãmeiki. Kibeꞌerõꞌõ imaraᵽaki, “Reyaeka mirãrãre imarõꞌõ”, wãmeiki. Nare ikuᵽaka Tuᵽarãre ãrĩkoraᵽe: —Ika wejeareka imarã ᵽoꞌimajare ᵽitãꞌmuaᵽi, kẽsiaᵽi, risirikaᵽi, makaᵽoyamajakaᵽi mija jããbe. Suᵽabaatirã ritaja ᵽoꞌimajare botarakarioꞌro ᵽibatirã ĩꞌrãoꞌro mija jããᵽatabe,==kẽrĩkoraᵽe.

⁹ Torãjĩrã ate aᵽekuku ᵽaᵽera buᵽeka ᵽaᵽatãteka Oveja weiwaꞌyua uᵽaka imakire wieraᵽe. Suᵽa kibaaraᵽaka ᵽoto joeĩjiritẽrĩ wãꞌtarã najããekarãre imamaka ñiaraᵽe. Torã ñiaraᵽarã, õñia nimaeka ᵽoto Tuᵽarã majaroka wãrõbaraka, “Jesúre yiꞌyurã yija ime”, nañua jaꞌatabeyurã nimamaka Tuᵽarãre ãꞌmitiriᵽẽabeyurãre nare jããekarã nimaraᵽe.

¹⁰ Ĩꞌrã jãjirokaᵽi ikuᵽaka ãrãᵽarã mae: —Ritaja jãꞌmerimaji, ĩꞌrãkuri baꞌiaja baakoribeyuka mime, suᵽabaatirã wãjia bojarijayuka imarĩ, meñu uᵽakaja baaiki mime. Yijare jããraᵽarãre baꞌiaja baamaka ĩatirã, “Baꞌiaja imarika tiyibesarãka mijaroꞌsi”, nare merĩrũkia, ¿noꞌojĩrã yaje sarã seyarũkia sajariwaꞌyua?==kire narãᵽe.

¹¹ Iꞌsuᵽaka naᵽakãꞌã saya uᵽaka jariroaka jia boia nare kĩjiraᵽe. Nare sĩjitirã, —Jajua baabekaja mija imabe. Aᵽerã imañujurã ruᵽu mija uᵽakaja yimajaroka bojarimaja. Mija uᵽakajaoka baꞌiaja baarimajare nare jããrũkirã nime,==Tuᵽarãre ãrãᵽe.

¹² Torãjĩrã ate, aᵽekuku ᵽaᵽera buᵽeka ᵽaᵽatãteka Oveja weiwaꞌyua uᵽaka imakire wieraᵽe. Iꞌsuᵽaka kibaaraᵽakarõꞌõjiteje jãjia kaꞌia iyiraᵽaka. Iꞌsuᵽaka sabaaraᵽaka ᵽoto ĩmikaki aiyare taꞌsikãꞌãja jaraᵽe. Suᵽabaatirã ñamikaki aiya riwerõꞌõjĩrã jũꞌaka jaraᵽaki.

¹³ Suᵽabaatirã tãꞌᵽia kaꞌiarã jũjiraᵽaka, rĩkimakaja wĩrõa baeᵽatemaka higuera rika jũjika uᵽaka.

¹⁴ Torãjĩrã mae ñeꞌmetãjirã taꞌritatirã wejeᵽema riraᵽaka. Iꞌtojĩteje ᵽusia, jũmurika aᵽerõꞌõrã Tuᵽarãre wiataᵽataraᵽe.

¹⁵ Suᵽa simamaka ᵽusiarã ãta wiꞌiarã, ãta watoᵽekarã ᵽoꞌimajare ruꞌraᵽe. Ĩᵽarimarã, jãꞌmerimaja, imatiyarimaja, imatiyabeyurã, aᵽerãroꞌsi baꞌiraberimaja, aᵽerãroꞌsi baꞌirabeĩjibeyurã, rĩkimaka niñerũ rikairã, wayuoka baairãᵽitiyika ritaja ᵽoꞌimajare sarã ruꞌraᵽe.

^16-17 Suᵽabaatirã ikuᵽaka narãᵽe: —Ᵽusia, ãta yijare mikaꞌratãtebe ĩᵽi ruᵽarikũmuarã ruᵽaraᵽakire yijare ĩatõᵽokoreka. Suᵽabaatirã Oveja weiwaꞌyua uᵽaka imakire baꞌiaja yijare jũarũjekoreka. Koᵽakaja iꞌsirĩmi seyayu mae. Niꞌioka sareka ruꞌriwãrũbesarãki,==narãᵽe.