Ap 5 - Porciones del Nuevo Testamento en el idioma Letuama

Ᵽaᵽera buᵽeka wierimaji

¹ Iꞌsuᵽaka simaraᵽaka beꞌerõꞌõ ĩᵽi kiruᵽarikũmuarã ruᵽaraᵽaki ᵽitaka ritaᵽẽꞌrõtoᵽi ᵽaᵽera buᵽeka kirikamaka ñiaraᵽe. Saᵽemarã, sarokaᵽioka oꞌoeka simaraᵽe, suᵽabaatirã ĩꞌᵽotẽñarirakakuri ᵽaᵽatãteka simaraᵽe.

² Toᵽi mae ĩꞌrĩka ángel tẽrĩki imatiyaiki ᵽemakotowiritirã ikuᵽaka ãrãᵽaki: —¿Maki imaki Tuᵽarã ñakoareka, ika ᵽaᵽera buᵽeka ᵽaᵽatãteka sabebetirã sawierũkika?==ãrĩwaꞌri jãjirokaᵽi kijẽrĩakoᵽeraᵽe.

^3-4 Iꞌsuᵽaka kẽrĩkoꞌomakaja niꞌioka, ĩmirã imaki, ika wejeareka imakioka, suᵽabaatirã marokakakurikakioka sawierũkika Tuᵽarã ñakoareka imaberaᵽaki. Ĩꞌrĩka sĩatirã jairimajire imabeᵽakãꞌã ĩawaꞌri jimarĩ yoraᵽe.

⁵ Iꞌsuᵽaka yibaamaka ĩatirã, ikuᵽaka ĩꞌrĩka ᵽakiakire yire bojaraᵽe: —Iꞌtojĩrãja mioritiyibe. Õꞌõrã miyoibe mae. Õꞌõrã ĩꞌrĩkare ime Satanáre tẽrĩkaki. León jãjika uᵽaka ĩᵽi marãkãꞌã mabaaberijĩki Judátatarãkaki, suᵽabaatirã David ĩᵽi riᵽarãmi imarĩ, ĩꞌᵽotẽñarirakakuku ᵽaᵽera ᵽaᵽatãteka wierũkika kime,==ãrĩwaꞌri yire kibojaraᵽe.

⁶ Iꞌsuᵽaka simaraᵽaka ᵽoto, ᵽakiarimarã watoᵽeka, botarakamarã maikoribeyu uᵽaka imaraᵽarã watoᵽekaᵽi, ĩᵽi ruᵽarikũmua imaraᵽarõꞌõᵽi ĩꞌrĩka Oveja weiwaꞌyua uᵽaka ĩokire imaraᵽe. Ᵽoꞌimajare kire jããeka kãmia kireka imakoꞌomakaja õñia imakire ñiaraᵽe. Suᵽabaatirã ĩꞌᵽotẽñarirakabi wakaiki, okajãjiki imarĩ. Iꞌsirakaojoka ñakoika kimaraᵽe, Esᵽíritu Santo, tẽrĩritakire ika kaꞌia ĩꞌrãkõꞌrĩmatomarĩa Tuᵽarãre ᵽũatayu ãrĩrikoᵽakaja simaraᵽe kiñakoa.

⁷ Toᵽi mae Tuᵽarã ruᵽarikũmurõꞌõrã keꞌraᵽe ᵽaᵽera buᵽeka eꞌerĩ. Sarã keyaraᵽaka ᵽoto ĩᵽi kiruᵽarikũmuarã ruᵽaraᵽaki ᵽitaka ritaᵽẽꞌrõtoᵽi ᵽaᵽera buᵽeka keꞌeraᵽe.

⁸ Iꞌsuᵽakajaoka botarakamarã maikoribeyu uᵽaka imaraᵽarã, suᵽabaatirã veinticuatro rakamarã ᵽakiarimarã, kiwãjitãji moꞌiᵽãñawaꞌraᵽarã kire jiyiᵽuᵽayeewaꞌri. Nimarakamarãja baya koyabaraka nabirerijayua arᵽa rikatirã, orokaka seroaoka narikaraᵽe. Sareka sajãitaraᵽe samajoemaka jia jiijĩsia ooika. Sanajoeika ũmakaka mirĩwaꞌyua, Tuᵽarãre yiꞌyurã kire najẽñerijayu uᵽakaja simaraᵽe.

^9-10 Suᵽabaatirã kiwãjitãji moꞌiᵽãñawaꞌraᵽarã ikuᵽaka mamaroka maꞌmitirikoribeyua bayakoyaraᵽarã: —Ᵽoꞌimajare mire jããeka. Iꞌsuᵽaka mire nabaakoꞌomakaja ritaja wejeareka imarã ᵽoꞌimajaroꞌsi, ritaja ᵽoꞌimajatatarã imabayu uᵽakaja, noka ima uᵽakaja jaibaraka imarã mireyaekaᵽi, miriweaᵽi ãrĩwaꞌri baꞌiaja nabaaika miwaᵽakoyika, Tuᵽarãrirã nimaokoroꞌsi. Suᵽa mibaaeka simamaka kurarãka uᵽakaja, Miᵽaki Tuᵽarãre yaᵽaika uᵽakaja baairã nime. Suᵽabaatirã miꞌiᵽi ãrĩwaꞌri ritatojo wejeareka imarãre jãꞌmewãrũrũkirã nime. Iꞌsuᵽaka simamaka miꞌijioka mime ᵽaᵽera buᵽeka wierũkika,==ãrĩka nabayakoyaraᵽe.

¹¹ Torãjĩrã ate, Tuᵽarã ruᵽarikũmu wãꞌtarã rãkuruᵽairã botarakamarã maikoribeyu uᵽaka imarã, suᵽabaatirã veinticuatro rakamarã ᵽakiarimarã rĩkimarã ángelrãkaoka baya koyamaka ñaꞌmitiraᵽe. Majoaᵽataberijĩka nimamaka ñiaraᵽe.

¹² Toᵽi mae jãjirokaᵽi ikuᵽaka nabayakoyaraᵽe: —Ᵽoꞌimajare baꞌiaja baaikareka nare tããwaꞌri, Oveja weiwaꞌyua uᵽaka imakire reyaeka. Suᵽa baaekaki imarĩ tẽrĩriki, jia wãjia õñuka kime. Iꞌsuᵽakajaoka dika jariwaꞌririmarĩa jãꞌmewãrũiki kimamaka, ritaja kirika oyiaja sime. Suᵽa kimamaka, kire oyiaja jiyiᵽuᵽayeerũkika kime. Suᵽabaatirã, “Ritaja ima tẽrĩwaꞌribaji jiitaki kime”, ᵽoꞌimajare ãrĩrũkika Oveja weiwaꞌyua uᵽaka imakire ime,==ãrĩka jiyiᵽuᵽakaᵽi kiroꞌsi nabayakoyaraᵽe.

¹³ Suᵽabaatirã ritaja õñirã Tuᵽarãre ᵽoꞌijiaekarã maboꞌikakurirã imarã, õꞌõrã imarãoka jaimaka ñaꞌmitiraᵽe. Iꞌsuᵽakajaoka kaꞌiwatoᵽekarã imarã, okowatoᵽekareka ima ᵽariji jaimaka ñaꞌmitiraᵽe. Suᵽabaatirã Tuᵽarãre, Oveja weiwaꞌyua uᵽaka imakire ᵽariji jiyiᵽuᵽayeebaraka ikuᵽaka nabayakoyaraᵽe: —Ĩᵽi kiruᵽarikũmuareka ruᵽakire, kiwãꞌtarã Oveja weiwaꞌyua uᵽaka imakireoka majiyiᵽuᵽayeerũkirã nime. Jiyiᵽuᵽaka mijare õrĩrijariwaꞌri, “Jiitarã mija ime”, ritaja mijare narĩrũ. Ritaja ima ᵽemawaꞌribaji jiitarã, suᵽabaatirã ritaja jãꞌmerimaja imarijayurã mija ime. Iꞌsuᵽaka oyiaja simarijarirũ,==ãrĩka nabayakoyamaka ñaꞌmitiraᵽe.

¹⁴ Toᵽi mae, —Iꞌsuᵽaka oyiaja baarijarirũkia simarũ,==narĩkoraᵽe botarakamarã maikoribeyu uᵽaka imaraᵽarã. Suᵽa imarĩ iꞌtojĩteje, ĩᵽiruᵽarikũmuarã ruᵽaraᵽakire, suᵽabaatirã Oveja weiwaꞌyua uᵽaka imakire jiyiᵽuᵽayeewaꞌri veinticuatro rakamarã ᵽakiarimarãre nawãjitãji moꞌiᵽãñawaꞌraᵽe.