Ap 4 - Porciones del Nuevo Testamento en el idioma Letuama

Ikuᵽaka maboꞌikakurirã Tuᵽarãre jiyiᵽuᵽayeebaraka nimamaka Juanre ĩaeka

¹ Sabeꞌerõꞌõ ikuᵽaka simaraᵽe ate: Maboꞌikakurirã koᵽereka wieka imamaka ñiaraᵽe. Sañiaraᵽaka ᵽoto tromᵽeta jãjia okaayu uᵽakaᵽi yire jaiũꞌmuraᵽakire ikuᵽaka yire ãrãᵽe: —Õꞌõrã miꞌtabe, ñamajĩ imarũkiakaka mire yibeaokoroꞌsi,==kẽrĩkoraᵽe.

² Toᵽi mae makãrãrũñuroka uᵽakaᵽi ñimaraᵽaka ᵽoto maboꞌikakurirã Esᵽíritu Santore yire eyarũjeraᵽe. Torã eyatirã ĩᵽi ruᵽarikũmuareka ĩꞌrĩkare ruᵽamaka ñiaraᵽe.

³ Ãta jasᵽe wãmeika, cornalina wãmeika yaꞌtarika uᵽaka yaꞌtaiki kimaraᵽe. Kiruᵽarõꞌõ esmeralda wãmeika ãta uᵽaka yaꞌtaika neꞌeᵽurea imaraᵽaka.

⁴ Suᵽabaatirã kiruᵽaraᵽarõꞌõrã ĩꞌrĩka ᵽoꞌimaji baatirã botarakamaki ᵽakiarimarã saya boia jããtiirã kiwãꞌtarã rãkuruᵽaraᵽarã naruᵽarikũmuaᵽitiyika. Ĩᵽarimarãroꞌsi takaja simaraᵽe ruᵽarikũmua. Suᵽabaatirã orokaka baaeka buꞌya tuaekarã nimaraᵽe.

⁵ Suᵽabaatirã nañeꞌmetãji niᵽamakire ruᵽaraᵽakũmuᵽi wĩᵽoa yaajiyeika uᵽaka sabaaraᵽe. Iꞌsuᵽaka baawaꞌri jãjitaka wĩᵽoa jaika uᵽaka sokaaraᵽe. Kiruᵽaraᵽaka wãjitãji ĩꞌᵽotẽñarirakabi ᵽeka jũꞌrẽika imaraᵽaka. Ᵽeka jũꞌrẽraᵽaka Esᵽíritu Santo koᵽakaja ima simaraᵽe.

⁶ Iꞌsuᵽakajaoka Tuᵽarã ruᵽarikũmuwãjitãji riaᵽakiaka jia waria okoika imaraᵽaka. Suᵽabaatirã, botarakamarã maikoribeyu uᵽaka ĩorã naᵽemaᵽẽꞌrõtoᵽi, naᵽẽterõꞌõᵽioka rĩkimakaja ñakokirã ñeꞌmetãji kiruᵽaraᵽe.

⁷ Mamarĩ õiũꞌmuraᵽaki, yaia león uᵽaka ĩoki. Aᵽika imaraᵽaki waꞌibikirãwẽko uᵽaka ĩoki. Kibeꞌerõꞌõjĩte imaraᵽaki ᵽoꞌimaja ᵽema uᵽakaja ᵽemaiki. Ᵽiyika awaᵽakiaka wiyu uᵽaka imaki nimaraᵽe.

⁸ Maikoribeyurã uᵽaka ĩoirã nimaraᵽaka imarĩ, ĩꞌrõtẽñarirakato kajekirã nimaraᵽe. Naᵽoꞌiareka, nakajerokarõꞌõᵽioka rĩkimakaja ñakoirã nimaraᵽe. Ĩmi, ñami ᵽariji Tuᵽarãte jiyiᵽuᵽayeebaraka ikuᵽaka nabayakoyarijayu: —Jia oyiaja baaiki, jia oyiaja baaiki, jia oyiaja baaiki kime maĩᵽamaki Tuᵽarã. Ritaja ima tẽrĩwaꞌribaji imaki kime Tuᵽarã. Bikija imaraꞌaekaki imakoꞌomakaja, maekakaoka imarijayuka kime. Suᵽabaatirã ikijioka imaki imajiᵽarũkika,==ãrĩbaraka nabayakoyaraᵽe.

⁹ Ĩᵽire kiruᵽarikũmuarã ruᵽamaka ĩatirã kire jiyiᵽuᵽayeebaraka ikuᵽaka narĩrijayu: —Ritaja ima ᵽemawaꞌribaji jiitakiji mime. Suᵽa imarĩ miꞌi ĩꞌrĩkaja tẽrĩrikaja, jiyiᵽuᵽaka õrĩrũkika mimarijayu. Jiitaka mibaayu,==ãrĩka reyaribaꞌimarĩkare najiyiᵽuᵽayeeyu.

¹⁰ Ĩꞌrãkurimarĩa suᵽa baabaraka nima ᵽoto veinticuatro rakamarã ᵽakiarimarã kiwãjitãji moꞌiᵽãñawaꞌyurã reyaribaꞌimarĩkare jiyiᵽuᵽayeebaraka. Suᵽabaatirã orokaka baaeka nabuꞌya eꞌetatirã kiwãꞌtarã ᵽããjiyetirã ikuᵽaka kire narĩrijayu:

¹¹ —Yija ĩᵽamaki Tuᵽarã, miꞌi ĩꞌrĩkaja mime jiyiᵽuᵽaka yija õrĩrũkika. Suᵽabaatirã miꞌijioka mime ritaja ᵽoꞌijiaekaki, miyaᵽaeka uᵽakaja miᵽoꞌijiaeka ritaja imañujua ruᵽu. Iꞌsuᵽaka simamaka ikuᵽaka ᵽoꞌimajare mire ãrĩrijarirũkika mime: “Ritaja ima ᵽemawaꞌribaji jiitakiji imarĩ, miꞌi ĩꞌrĩkaja tẽrĩrikaja jiyiᵽuᵽaka õrĩrũkika mime. Iꞌsuᵽakajaoka ritaja jãꞌmerimaji mime”,==kire narãᵽe.