Ap 3 - Porciones del Nuevo Testamento en el idioma Letuama

Sardes wãmeika wejeareka imaekarãroꞌsi ᵽaᵽera oꞌotirã Juanre ᵽũataeka

¹ Iꞌsia beꞌrõ ikuᵽaka yire kẽrãᵽe ate: —Sardes wejeareka yire ãꞌmitiriᵽẽairãre imaruᵽutarimajiroꞌsi ikuᵽaka mioꞌoĩjibe: “Ĩꞌᵽotẽñarirakamarã uᵽaka imaki tẽrĩwaꞌribaji imatiyaiki Esᵽíritu Santo ᵽuᵽakaᵽi baarijayuka, ĩꞌᵽotẽñarirakamarã tãꞌᵽia rikaiki ñime. Mia: Ritaja mija baaika õrĩᵽataiki oka ñime. Mijare ĩatirã ‘Cristore jia yiꞌyurã nime’, ᵽoꞌimajare mijareka ãrĩkoꞌomakaja yireka ᵽuri yiyaᵽaika uᵽaka baabeyurã imarĩ, yire ãꞌmitiriᵽẽabeyurã uᵽaka mija ime.

² ¡Jia mija ᵽuᵽajoabe! Yire yiꞌribeyurã uᵽaka mija jayua simamaka, jia ᵽuᵽaᵽeꞌritirã yire mija ãꞌmitiriᵽẽabe ate, yire mija yiꞌyua mija jaꞌatakoreka. Tuᵽarã ñakoarekaoka kiyaᵽaika uᵽakataka baabeyurã mija ime ruᵽu.

³ Suᵽabaatirã mamarĩ yirika bojariroka mija wãrũũꞌmuraᵽakakaka jia mija ᵽuᵽajoaᵽeꞌabe. Jia sõrĩwaᵽuꞌaᵽeꞌatirã, baꞌiaja mija baaika mija jaꞌatabe. Suᵽa mija baabesarãkareka, ikuᵽarõꞌõᵽiji kareeꞌerimajire etaika uᵽakaja mija õrĩbeyurõꞌõᵽiji mija ᵽõꞌirã etatirã mijare sayiwaᵽajairãñu.

⁴ Suᵽa simakoꞌomakaja, ĩꞌrãrimarã takaja imarã Sardereka baꞌiaja baabeyurã. Ĩꞌrã ᵽuri jariroaka kaꞌimarĩa jããirã uᵽaka imarã. ‘Baꞌiaja baariᵽeꞌyoirã imarĩ, jia boia jariroaka jããtirã yika nimarãñu’, ñañua jia sime.

⁵ Nimauᵽatiji Satanáre ĩꞌrãᵽẽꞌrõtorãja baairãre jariroaka jia boia yijããrũjerãñu. Suᵽa imarĩ ‘Ikarakamarã nime yika imajiᵽarũkirã’, ᵽaᵽera ᵽũñurã ãñua yirũꞌrẽbesarãñu. Iꞌsuᵽakajaoka, Yiᵽakire ĩarãka wãjitãji, suᵽabaatirãoka kiángelrãkare ĩarãka wãjitãji ‘Yire yiꞌyurã nime’, nareka ñarĩrãñu.

⁶ Mija ãꞌmitiᵽe ritaja wejeareka yire yiꞌᵽaraka imarijayurã. Jia samija õrĩᵽũariyaᵽayeꞌe, Esᵽíritu Santore yire jeyobaaikaᵽi yibojaika jia mija ãꞌmitiᵽe”, ãrĩwaꞌri mioꞌobe,==kẽrãᵽe.

Filadelfia wãmeika wejeareka imaekarãroꞌsi ᵽaᵽera oꞌotirã Juanre ᵽũataeka

⁷ —Toᵽi ate Filadelfia wejeareka yire ãꞌmitiriᵽẽairãre imaruᵽutarimajiroꞌsi ikuᵽaka mioꞌoĩjibe: “Tuᵽarãᵽi imarijayuka imarĩ ñañu uᵽakaja baaiki ñime. Suᵽabaatirã ĩᵽi David imaekaki riᵽarãmi imarĩ, kiuᵽakajaoka Tuᵽarãrirãre jãꞌmerimaji ñime. Suᵽa simamaka yijãꞌmerũkirõꞌõrã kãkaokaroꞌsi koᵽereka yiwierãka, maki satãtewãrũberijĩki. Suᵽabaatirã kãkakoreka koᵽereka yitãterãka maki sawieberijĩki.

⁸ Ritaja mija baaika õñuka ñime. Ᵽoꞌimaja mijare ĩaikareka ᵽuri ‘Imatiyarimaja nime’, mijareka ãrĩbeyurã. Imakoꞌomakaja yiwãrõeka jia yiꞌririjayurã mija ime. Suᵽabaatirãoka aᵽerãre kĩkiwaꞌri ‘Jesucristore yiꞌribeyurã yija’, ãrĩbeyurã mija. Suᵽa imarĩ, maki mijare jãjibaakoreka, koᵽereka mijaroꞌsi yiwieyu, yibojariroka mija wãrõrijayaokoroꞌsi.

⁹ Mija ãꞌmitiᵽe. Ᵽakirika jaibaraka torã imarã, ‘Tuᵽarãrirã yija ime’, ãrĩkoꞌomakaja Satanáre yaᵽaika uᵽaka baarijayurã. Iꞌsuᵽaka nimamaka ñamajĩ mija wãjitãji nare yiñukuruᵽarũjerãñu mijare najiyiᵽuᵽayeeokoroꞌsi. Suᵽabaatirã ‘Jesucristore wãtairã nime’, mijareka nañaokoroꞌsi.

¹⁰ ‘Aᵽerãre baꞌiaja mijare baakoꞌomakaja, yire ãꞌmitiriᵽẽabaraka mija imabe’, mijare ñarãᵽaka uᵽakaja yiꞌyurã mija ime. Suᵽa imarĩ ritaja ᵽoꞌimajare baꞌiaja jũarijẽꞌrãka seyarãka ᵽoto mijare ĩarĩᵽaraka ñimarijarirãñu. Iꞌtojĩte ritatojo wejeareka imarãre ĩatirã ‘Ĩrã imarã baꞌiaja jũawaꞌri ᵽuᵽaᵽeꞌritirã yire ãꞌmitiriᵽẽairã, aᵽerã ᵽuri jẽnoꞌobaji jayurã’, ñarĩwãrũrãñu.

¹¹ Mia, noꞌojĩrãmarĩa ikuᵽarõꞌõᵽiji yetarãñu. Suᵽa simamaka yire mija ãꞌmitiriᵽẽarijayua jaꞌatabekaja mija imabe. Suᵽa mija imamaka, ñamajĩ jiibaji Tuᵽarãre mijare baarãñu. Suᵽa imarĩ baꞌiaja baairãre mija ãꞌmitiriᵽẽaꞌsi.

¹² Yire ãꞌmitiriᵽẽarijaꞌatabesarãñurãre ᵽuri, Yiᵽaki ᵽõꞌirã yeyarũjerãñu. Suᵽa imarĩ Yiᵽaki Tuᵽarãre jiyiᵽuᵽaka õrĩriwiꞌiarã bota ima uᵽaka torã imajiᵽarũkirãroꞌsi nimarãñu, toᵽi ᵽorirũkimarĩrã. Suᵽa nimamaka, maekarakawãme nare yiwãmejĩꞌarãñu. Yiᵽaki Tuᵽarã wãmea, mamaka Jerusalén, ĩmiᵽi ruietarãka wãmea, suᵽabaatirã mamaka yiwãmea.

¹³ Mija ãꞌmitiᵽe ritaja wejeareka yire yiꞌᵽaraka imarijayurã. Jia samija õrĩᵽũariyaᵽayeꞌe, Esᵽíritu Santore yire jeyobaaikaᵽi yibojaika jia mija ãꞌmitiᵽe”, ãrĩwaꞌri mioꞌobe,==kẽrãᵽe.

Laodicea wãmeika wejeareka imaekarãroꞌsi ᵽaᵽera oꞌotirã Juanre ᵽũataeka

¹⁴ Torãjĩrã yire ᵽemakotowiraᵽakire ikuᵽaka yire jairaᵽe ate: —Laodiceawejeareka yire ãꞌmitiriᵽẽairãre imaruᵽutarimajiroꞌsi ikuᵽaka mioꞌoĩjibe: “ ‘Yiꞌiᵽi ãrĩwaꞌri Tuᵽarãre ᵽuᵽajoaika uᵽakaja sime. Ritaja ñarĩka uᵽakaja baawaꞌri, wãjiroka Tuᵽarãre ima yibojarijayu. Suᵽabaatirã yiꞌiᵽi ãrĩwaꞌrijioka ritatojo ika wejeareka ima Tuᵽarãre ᵽoꞌijiaeka. Imaki kime, ika mijare bojaiki’, ãrĩwaꞌri naroꞌsi mioꞌobe.

¹⁵ Ritaja mija baaika õrĩᵽataiki ñime. Yire yiꞌririjaꞌatabeyurã mija imakoꞌomakaja, ‘Jiibaji kika maimajĩkareka jia sime’, yireka ãrĩbeyurã mija. Suᵽa imarã imarĩ, ukurũkia ijitakamaria, jijitakamarĩa uᵽaka mija ime. Suᵽa mija imarika yaᵽabeyuka yiꞌi.

¹⁶ Iꞌsuᵽaka yika mija imamaka, jiamarĩa imawaꞌri, koᵽakaja mijare yijaꞌataerã baayu mae.

¹⁷ Mia, ‘Ritaja Tuᵽarãrikakaka õrĩwãrũirã maime. Suᵽa imarĩ rĩkimakaja baꞌirĩjia rikairã uᵽaka imawaꞌri, dakoa mare jariwaꞌribeyua’, mija ãñu. Suᵽa mija imakoꞌomakaja, yiñakoareka imatiyaika õrĩᵽũabeyurã mija ime, jia yire ãꞌmitiriᵽẽabeyurã imarĩ. Baꞌirĩjimarirã, jariromarĩrã, yoibeyurã uᵽaka mija ime mijare ñiamaka.

¹⁸ Iꞌsuᵽaka mija imamaka, ikuᵽaka mijare yibojaerã baayu. Mija ãꞌmitiᵽe, yire yiꞌriᵽẽawaꞌri jia okajãjia mija imariyaᵽayeꞌe, mija ᵽuᵽaka baꞌiaja ima jaꞌatatirã, yire mija jẽñebe. Iꞌsuᵽaka mija baamaka ‘Tuᵽarãre yaᵽaika uᵽakaja maimayeꞌe’, ãñurã mijare ñimarũjerãñu. Iꞌsuᵽaka mija imamaka, orotaka aᵽeaᵽi rukuberika ᵽekaᵽi jia joeᵽateka yireka waruayurã uᵽaka yirika imatiyaikakaka mija õrĩwaᵽuꞌarãñu. Jariromarĩrã imarĩ iꞌyoa jũarikoᵽakaja jariroaka boia yire jẽñetirã sajããirã uᵽaka mija imabe yiñakoareka baꞌiaja baabeyurã mija imaokoroꞌsi. Iꞌsuᵽakajaoka jia ĩaokoroꞌsi ñakoĩkoa yire mija jẽñebe yiᵽuᵽajoaika õñurã mija imaokoroꞌsi.

¹⁹ Mija ãꞌmitiᵽe. Wãtaka ñoñurã yokajããmaka ãꞌmitiyurã, baꞌiaja mija baaika mija jaꞌatabe. Sajaꞌatatirã yire takaja ãꞌmitiriᵽẽairã mija jaᵽe.

²⁰ Mija ĩabe, ‘Naka ñimarũ’, ãrĩwaꞌri mijare yakayu. Suᵽa simamaka yoka ãꞌmitiriᵽẽatirã, ‘Ãꞌã, mika yija imarũ’, yire ãñurãka jia ñimarãñu.

²¹ Suᵽa imarĩ baꞌiaja jũakoꞌomakaja yire ãꞌmitiriᵽẽarijaꞌatabekaja imarijayurãre, maboꞌikakurirõꞌõrã yire jãꞌmejeyobaarimaja ñimarũjerãñu. Yiᵽakire yiꞌririjaꞌatabeyuka imarĩ, kire jãꞌmejeyobaarimaji ñima uᵽakaja nimarãñu naroꞌsi.

²² Mija ãꞌmitiᵽe ritaja wejeareka yire yiꞌᵽaraka imarijayurã. Jia samija õrĩᵽũariyaᵽayeꞌe, Esᵽíritu Santore yire jeyobaaikaᵽi yibojaika jia mija ãꞌmitiᵽe”, ãrĩwaꞌri mioꞌobe,==yire kibojaraᵽe.