Ap 22 - Porciones del Nuevo Testamento en el idioma Letuama

¹ Iꞌsia yire kibearaᵽaka beꞌerõꞌõ, jia waria riaka õñio okoraka imajiᵽarũkiria ángelre yire bearaᵽe. Tuᵽarã ruᵽarikũmuarã, suᵽabaatirã Oveja weiwaꞌyua uᵽaka imaki ruᵽarikũmuarã simaraᵽe iꞌsiria ruᵽaka.

² Wejeñeꞌmetãji imaraᵽaka maꞌa ñeꞌmetãjite juruteᵽaria simaraᵽe. Suᵽabaatirã iꞌsiriarijerã ĩꞌᵽaᵽẽꞌrõto wãꞌtaja õñio yaᵽua rĩkajiyeraᵽaka. Ĩꞌrĩka aiya oꞌatarimarĩa ruirijayua simamaka, ĩꞌrãkuri wejejẽꞌrãkareka ĩꞌᵽoũꞌᵽuarãeꞌearirakakuri ruika simaraᵽe. Ritatojo wejeareka imarãre jãjiokoroꞌsi õñioka simaraᵽe saᵽũñua.

³ Tuᵽarãre ĩariᵽeꞌyoika imabeyurõꞌõ simamaka, “Baꞌiaja simarũ”, kẽrĩrũkimato simarãñu. Tuᵽarãrika, suᵽabaatirã Oveja weiwaꞌyua uᵽaka imaki ruᵽarikũmua imarãka torã. Suᵽa simamaka ritaja torã imarãñurã Tuᵽarãre yaᵽaika uᵽaka oyiaja baabaraka, kire najiyiᵽuᵽayeerijarirãñu.

⁴ Maekaka maki Tuᵽarãre ĩabeyua imakoꞌomakaja, wejea mamaka kiᵽoꞌijiarãñurõꞌõrã ᵽuri kire maĩarãñu. Suᵽabaatirã kiwãmea kioꞌojĩꞌarãñu ᵽoꞌimaja kũꞌarã.

⁵ Maĩᵽamaki Tuᵽarãre yaaboarãñurõꞌõ imarĩ, aiyaka yaaika yaᵽabeyurõꞌõ simarãñu. Ñamiaoka imabesarãka torã. Ĩꞌᵽarãwaꞌtaja jãꞌmebaraka torã nimarãñu.

Jesucristore etarũkia koyiaja jariwaꞌyua

⁶ Ikuᵽaka yire kẽrãᵽe ate ángel: —Makãrãrũñuroka uᵽakaᵽi ritaja Tuᵽarãre mire ĩarũjeika, mire kiãꞌmitirirũjeikaoka rita sime. Ritaja mire yibojaika uᵽakajaoka simarãñu. Maĩᵽamaki Tuᵽarã kime kiroꞌsi bojaĩjirimajare jia jaiwãrũerã nare jeyobaarijayuka. Ikijioka kime ika ritaja mire yibojaerã yire ᵽũataekaki,==yire kẽrãᵽe.

⁷ Ikuᵽaka aᵽea yire kẽrãᵽe: —Ikuᵽaka Jesúre ãñu: “Mija ãꞌmitiᵽe. Ñojimarĩji mija ᵽõꞌirã yaꞌrirãñu ate. Ika majaroka ‘Ikuᵽaka simarãñu’, ãrĩwaꞌri Tuᵽarãre bojaekakaka oꞌoeka ᵽũñurã ima yiꞌyurã jĩjimakaᵽi imarãñurã”, kẽñu,==ángelre yire ãrãᵽe.

⁸ Juan ñime ritaja ĩatirã, sãꞌmitiritirã ika oꞌoiki. Ángelre yire sabearaᵽaka ᵽoto jiyiᵽuᵽaka kire õrĩwaꞌri kiwãjitãji yimoꞌiᵽãñaraᵽe.

⁹ Ikuᵽaka ᵽuri yire kẽrãᵽe: —Mimoꞌiᵽãñaꞌsi. Miuᵽakaoka Tuᵽarãre yaᵽaika baaiki ñime yiꞌioka. Tuᵽarãroꞌsi bojaĩjirimaja, suᵽabaatirã ika ᵽaᵽera ᵽũñu oꞌoeka yiꞌyurã uᵽakaja ñime. Suᵽa simamaka, Tuᵽarãre takaja mijiyiᵽuᵽayeebe,==yire ãrĩtirã,

¹⁰ ikuᵽaka yire kẽrãᵽe ate: —Ika majaroka mioꞌoika, ᵽoꞌimajare miõrĩrũjebe, samioꞌoika uᵽakaja simarãrĩmi koyiaja jariwaꞌyua simamaka.

¹¹ Koyiaja sajariwaꞌᵽakãꞌã, baꞌiaja baarimaja ᵽuri nima uᵽakaja nimariyaᵽayeꞌe iꞌsuᵽakaja nimaᵽarũ. Baꞌiaja ᵽuᵽajoairã naᵽuᵽaka nare ãñu uᵽakaja naᵽuᵽajoarũ. Suᵽabaatirã, “Jia baairã nime”, Tuᵽarãre nareka ãñurã ᵽuri jĩjimaka kiyaᵽaika baabaraka nimarũ. Suᵽabaatirã Tuᵽarãre jiyiᵽuᵽaka õrĩwaꞌri baꞌiaja baarika jaꞌatarika yaᵽairãja sanajaꞌatarũ,==ángelre yire ãrãᵽe.

¹² Jesús ᵽuri ikuᵽaka ãrãᵽaki: —Mija ĩabe. Ñojimarĩji mija ᵽõꞌirã yaꞌrirãñu ate. Mija ᵽõꞌirã eyatirã ᵽoꞌimajare baaeka uᵽakaja sawaᵽa nare yibaarãñu. Jia baaekarãre, baꞌiaja baaekarãre oka.

¹³ Alfa, suᵽabaatirã Omega uᵽaka imaki imarĩ iꞌsuᵽaka yibaarãñu. Yiꞌiᵽi ãrĩwaꞌriji ritaja simaũꞌmueka. Yiꞌiᵽi ãrĩwaꞌrijioka ritaja ima tiyirãka.

¹⁴ Baꞌiaja nabaaika jũjerũjekarã ᵽuri saya uᵽaka ima jariroaka kaꞌimarĩa jããirã uᵽaka imarã. Ĩꞌrãtarãja nime wejea mamaka Tuᵽarãre ᵽoꞌijiarãñurõꞌõrã kãkarũkirã. Suᵽabaatirãoka torã eyatirã õñio yaᵽurika baꞌarũkirã nime. Suᵽa imarĩ, jĩjimaka torã nimarijarirãñu.

¹⁵ Aᵽerãre bitarijayurã, nayaᵽaika uᵽakaja aᵽerãka wãꞌimarĩrijayurã, ᵽoꞌimajare jããrijayurã, waᵽuju ima jẽrãka jiyiᵽuᵽayeeirã, ᵽakirikaᵽiji imarijayurã, Tuᵽarãre yaᵽabeyua baairã, Tuᵽarã ᵽõꞌirã aᵽekurioka eyabesarãñurã.

¹⁶ Suᵽa simamaka yiꞌi, Jesús, iꞌsia majaroka mijare kibojaerã ángelre yiᵽũataeka, yire yiꞌriwaꞌri rẽrĩrijaᵽaraka jĩjimakaᵽi sõrĩwãrũrijayurã mija imamaka. David wãsa riᵽarãmi yiꞌi. Yire ᵽuᵽajoaweitirã, “Wãrĩrika ruꞌaraꞌaerã baaika ruᵽu wararaꞌaiki tãꞌᵽia joꞌbaka uᵽaka kimarãñu Tuᵽarãre ᵽũatarãki”, ãrĩwaꞌri Moisés imaekakire oꞌoeka,==Jesúre ãrãᵽe.

¹⁷ Esᵽíritu Santo, suᵽabaatirã Oveja weiwaꞌyua uᵽaka imaki jeyomakoka ĩꞌrĩka uᵽakaja najaiyu. —Mija iꞌtabe, Cristore yiꞌyurã mija jayaokoroꞌsi,==ᵽoꞌimajare nañu. Iꞌsuᵽakajaoka aᵽerãre narĩrũ sãꞌmitiyurã. —Õñio okoa ukurika mijare jitorãka, waᵽamarĩaja sukurĩ mija iꞌtabe,==nañu.

¹⁸ —Ika ᵽaᵽera jaiika ãꞌmitiririjarirãñurãre, yiꞌi, Jesús ikuᵽaka yibojarijayu: Soꞌoeka ᵽemawaꞌribaji noñu uᵽakaja ᵽuᵽajoatirã oꞌorãñurã ᵽuri, baꞌiaja Tuᵽarãre nare baarãñu. Mia, ika ᵽaᵽera oꞌoeka uᵽakaja baꞌiaja najũarãñu.

¹⁹ Suᵽabaatirã ika ñañua ᵽakibaraka ĩꞌrãribaꞌi eꞌetairã, õñio yaᵽurika baꞌarũkimarĩrã nimarãñu. Suᵽabaatirã, wejea mamaka Tuᵽarãre ᵽoꞌijiarãñurõꞌõrã eyarũkimarĩrã nime. Iᵽũñurã ñañu uᵽakaja sime õñio yaᵽurika kaka, suᵽabaatirã Tuᵽarã wejea mamaka kaka.

²⁰ “Iᵽũñurã rita sãñu”, ñañua imarĩ, “Ñojimarĩji mija ᵽõꞌirã yaꞌrirãñu ate”,==Jesúre ãñu. —Meñu uᵽakaja simarũ. Miꞌtabe Ñiᵽamaki Jesús,==mire ñañu.

²¹ Maĩᵽamaki Jesús ritaja jia oyiaja Tuᵽarãrirãre kibaarũ. Iꞌsuᵽaka oyiaja simarijarirũ. Iꞌtojĩrãja sime ruᵽu.