Ap 21 - Porciones del Nuevo Testamento en el idioma Letuama

Wejea mamaka, wejeᵽema mamaka imarũkia

¹ Ritatajo kaꞌia, riaᵽakiaka, wejeᵽema riraᵽaka beꞌerõꞌõ, mamaka kaꞌia, suᵽabaatirã wejeᵽema Tuᵽarãre ᵽoꞌijiamaka ñiaraᵽe.

² Suᵽa imarĩ mamaka Jerusalén jía ᵽuᵽajoarika imarõꞌõ Tuᵽarã ᵽõꞌiᵽi ruiraꞌatirã ñaꞌrĩᵽañamaka ñiaraᵽe. Rõmo ᵽitañiꞌabuꞌaerã baaeka kotĩmire kore ĩajiyuokoroꞌsi saya jía jiyurika jããweitirã koima uᵽaka jiyurika imarõꞌõ simaraᵽe.

³ Suᵽa simaraᵽaka beꞌrõ, Tuᵽarã ruᵽarikũmua imarõꞌõᵽi ikuᵽaka jãjirokaᵽi sãrĩkoraᵽe: —Mija ĩabe. ¡Ᵽoꞌimajaka Tuᵽarãre ime mae! Nawatoᵽekarãja kimarãñu. Ĩꞌrãoka kirĩrã nimarãñu, suᵽabaatirã nakaja imajiᵽarãki imarĩ niᵽamaki kimarãñu.

⁴ Tuᵽarãka imarã nimamaka reyarika, baꞌiaja ᵽuᵽaririka, oririka, ãꞌmika najũarika imabesarãka mae. Suᵽabaatirã nare kijiyiᵽuᵽayeerãñu ate norikoreka. Bikija baꞌiaja jũarika imakoᵽeka imabesarãka mae,==sãrĩkoraᵽe maboꞌikakuriᵽi.

⁵ Torãjĩrã mae kiruᵽarikũmuarã ruᵽatiirã ikuᵽaka Tuᵽarãre yire ãrĩkoraᵽe: —Miabe, ritaja bikijaka imakoᵽeika, mamaka oyiaja sõꞌtoarã yoꞌayu mae,==—Ika mire yibojaika uᵽakaja mioꞌobe. Rita sime. Mire yibojaika uᵽakaja ñamajĩ simarãñu,==ãrĩtirã ikuᵽaka yire kibojaraᵽe ate:

⁶ —Koᵽakaja ritaja yijieyu mae. Suᵽa imarĩ Alfa, Omega uᵽaka ñime. Alfa ñime ñañu ritaja ᵽoꞌijiaekaki imarĩ. Omega ñañu, “Ñamajĩ wejea tiyirũjerũkika ñime”, ãrĩrika. Okoa ukurika mare jitotiyaika uᵽaka yire ᵽuᵽajoatirã, yire jẽñeirãre baꞌiaja najũaeka beꞌerõꞌõ yiᵽõꞌirã netarãka ᵽoto waᵽamarĩaja õñio okoa nare yisĩarãñu nimajiᵽaokoroꞌsi.

⁷ Iꞌsuᵽakajaoka yibaarãñu yire ãꞌmitiriᵽẽarijaꞌatabesarãñurãre. Yire takaja jiyiᵽuᵽaka õrĩrãñurã ᵽuri, yimakarã uᵽakaja yikaja imarãñurã.

⁸ Yirirãmarĩrã ᵽuri: “Ᵽoꞌimajare mare ãꞌmijĩaꞌsi”, ãrĩwaꞌri yire ãꞌmitiriᵽẽabeyurã, yiyaᵽabeyua nabaayu, ᵽoꞌimaja jããrimaja nime, nayaᵽaika uᵽakaja rõmitikaka wãꞌimarĩrijayurã, suᵽabaatirã ᵽoꞌimajare bitarijayurã, waᵽuju ima jẽrãka jiyiᵽuᵽayeeirã, suᵽabaatirã ᵽakirimajareoka azufreᵽi jũꞌrẽiritarã yitaarãñu aᵽekurioka nare ĩaokoroꞌsimarĩa. Iꞌsia sime reyaᵽeꞌarika wãmeika,==yire kẽrĩkoraᵽaka beꞌrõ ángelre yiᵽõꞌirã etaraᵽe.

Mamaka Jerusalén wãmeika

^9-10 Ĩꞌᵽotẽñarirakamarãkaki baꞌiaja ᵽoꞌimajare jũarũkia seroarã rikaeka mirãki. Iki mae, ikuᵽaka yire ãrãᵽaki: —Dajoa, Oveja weiwaꞌyua uᵽaka imaki rũmuroꞌsi imarũkikore mire yibeaerã,==kẽrãᵽaka beꞌrõ, Esᵽíritu Santore yire jeyobaamaka ikuᵽaka yire kibearaᵽe: Ᵽusia joꞌbaka ñoaka ruᵽututuarã yire keꞌewaꞌraᵽe. Torã kika yeyaraᵽaka ᵽoto baꞌiaja baarũkimato, mamaka Jerusalénwejea Tuᵽarã ᵽõꞌiᵽi ruiraꞌatirã ñaꞌrĩᵽañaraᵽaka yire kibearaᵽe.

¹¹ Iꞌsiweje ᵽuri Tuᵽarãre yaaboaikaᵽitakaja yaaboaiweje. Ãta jasᵽe wãmeika jia waria mayoiwaᵽuꞌataika uᵽaka ĩorõꞌõ simaraᵽe.

^12-13 Iꞌsia wejetaꞌirõꞌõ ᵽuri jia ĩmirã jaarãkueka imaraᵽaka. Suᵽabaatirã ĩꞌᵽoũꞌᵽuarãeꞌeariraka koᵽereka simaraᵽe sareka. Jãꞌãtiᵽẽꞌrõtoᵽi maekaraka koᵽereka, wayeruᵽitiᵽẽꞌrõtoᵽi iꞌsiraka koᵽerekaoka. Suᵽabaatirã wejerĩrĩka ᵽẽꞌrõtoᵽioka iꞌsiraka koᵽereka, maꞌkaroka ᵽẽꞌrõtoᵽi iꞌtojĩrãjaoka koᵽerekaika simaraᵽe. Israelkarã ĩꞌᵽoũꞌᵽuarãeꞌearirakatatarã wãmea ĩꞌrãbaꞌiji koᵽereka rakakaja oꞌojĩꞌaeka imaraᵽaka. Ángelrãkaoka koᵽereka rakakaja ĩꞌrãrimaki rĩkataraᵽarã.

¹⁴ Ãta ᵽããtateka õrĩaꞌsi ãrĩwaꞌri ĩꞌᵽoũꞌᵽuarãeꞌearirakao ãta joꞌbariꞌokaᵽi sajãꞌãrã turiruᵽamoꞌmeka simaraᵽe. Ĩꞌᵽawãjoũꞌᵽuarãeꞌearirakamaki Oveja weiwaꞌyua uᵽaka imakire ᵽũataekarã, aᵽóstolrãka wãmea jĩꞌĩtaraᵽaka, ãtareka nimaraᵽakarakao simaraᵽaka imarĩ.

¹⁵ Ángel yika jairaᵽaki orokaka baaeka jẽrãbaarũkia rikaraᵽaki wejea, koᵽereka, suᵽabaatirã ãta ᵽããtateka jẽrãbaarũkia.

¹⁶ Dos mil dosciento kilómetro rõꞌõjĩrã oyiaja sajẽrãka imaraᵽe sakijẽrãbaamaka, sajoꞌbaka, sañoakaoka.

¹⁷ Ãta ᵽããtateka yija jẽrãbaarũkiaᵽi sakijẽrãbaamaka, sesenta y cinco metros rõꞌõjĩrã moꞌrĩa simaraᵽe.

¹⁸ Ãta jasᵽe wãmeikakakaᵽi ᵽããtateka simaraᵽe wejea. Suᵽabaatirã aᵽeaᵽi rukebekaja orotakakaka baaekaweje simaraᵽe.

¹⁹ Ãta ᵽããtateka rokarã ĩꞌᵽoũꞌᵽuarãeꞌearirakao ãta, jía jiyurika waᵽajãꞌrĩakaka imaraᵽaka. Mamarĩkao, jasᵽe, jia waria yaꞌtarikakaka. Rokajĩkao zafiro wejeᵽema jĩꞌmia uᵽaka. Ĩꞌᵽorokajĩkao ágata ᵽũñua uᵽaka jĩꞌmio. Maekarakaorokajĩkao esmeralda.

²⁰ Botarakaorokajĩrã imaraᵽao ónice jũꞌaka boiaᵽitiyika yariraka. Ĩꞌrãᵽitarakaorokaji imaraᵽao cornalina, jia jũꞌaka. Ĩꞌrõtẽñarirakaorokaji imaraᵽao crisólito jũꞌsiᵽoao. Ĩꞌᵽotẽñarirakaorokaji berilo jĩꞌmio. Maekarakaotẽñarirokajĩkao toᵽacio jũꞌsiᵽoa. Botarakaotẽñarirokajĩkao crisoᵽrasa jĩꞌmiojoka. Ĩꞌᵽaᵽitaraorokajĩkao jacinto wejeᵽema uᵽaka jĩꞌmia. Ᵽiyio imaraᵽaka amatista arebosio.

²¹ Ĩꞌᵽoũꞌᵽuarãeꞌearirakato koᵽereka. Ᵽerlakaka oyiaja baaeka simaraᵽe. Ĩꞌrãto koᵽereka ĩꞌrõ ᵽerla joꞌbaoᵽi baaeka aᵽeto koᵽereka iꞌsuᵽakajaoka simamoꞌmeraᵽe. Suᵽabaatirãoka wejeñeꞌmetãji imaraᵽaka maꞌa aᵽeaᵽitiyika rukebekaja orotakakaka baaeka.

²² Iꞌsi wejeareka ĩatõᵽoberaᵽaki yiꞌi Tuᵽarãre jiyiᵽuᵽaka õrĩriwiꞌia. Maĩᵽamaki Tuᵽarã ritaja ima boꞌibajirã tẽrĩrikaja imaki, suᵽabaatirã Oveja weiwaꞌyua uᵽaka imaki naᵽõꞌirãja nimamaka nayaᵽairõꞌõrãja ᵽoꞌimajare nare jiyiᵽuᵽayeeraᵽe. Suᵽa imarĩ imaberaᵽaka nare jiyiᵽuᵽayeeriwiꞌia.

²³ Ritaja ima ᵽemawaꞌribaji imaki, Tuᵽarãre imaraᵽarõꞌõ simamaka, ikiji torã yaaboaraᵽaki. Suᵽabaatirã Oveja weiwaꞌyua uᵽaka imakioka yaaboaraᵽaki. Suᵽa imarĩ aiyare yaaika, aiya ñamikakire yaaboaikaoka yaᵽabeyurõꞌõ simaraᵽe.

²⁴ Iꞌsia wejea yaaboaikaᵽi ritatojo wejeareka imarãre jia imarijarirãñu. Narikarijayua waᵽajãꞌrĩa imatiyaikakaka eꞌeraꞌatirã Tuᵽarãre nijirãñu niᵽarimarã kire jiyiᵽuᵽaka õrĩwaꞌri.

²⁵ Suᵽa nabaarũkirõꞌõ imarĩ, wiekaja koᵽereka imajiᵽarũkirõꞌõ simarãñu, ñamia imabesarãrõꞌõ imarĩ.

²⁶ Torã mae, ritatojo wejeareka imarã narikaika ritaja waᵽajãꞌrĩa imatiyaikakaka eꞌeraꞌatirã Tuᵽarãre nijirãñu kire jiyiᵽuᵽayeewaꞌri.

²⁷ Tuᵽarãre yaᵽabeyua imarũkimato simamaka baꞌiaja baarimaja, ᵽakirimaja torã kãkabesarãñurã. Oveja weiwaꞌyua uᵽaka imaki ᵽaᵽera ᵽũñurã, “Ikarakamarã nime yika imarũkirã”, ãrĩwaꞌri nawãmea oꞌojĩꞌaekarã takaja kãkarũkirõꞌõ simarãñu.