Ap 20 - Porciones del Nuevo Testamento en el idioma Letuama

Mil rakakuri wejejẽꞌrãka jãꞌmebaraka Jesúre imarũkia

¹ Iꞌsia beꞌerõꞌõ, maboꞌikakurirõꞌõᵽi, kajuyaiᵽakiaka uᵽaka ĩoikire kiᵽiꞌᵽerũkia ᵽerumijia joꞌbaka rikatirã ángelre ruiraꞌamaka ñiaraᵽe. Suᵽabaatirã koᵽea tiyibeyua kiwierũkiaoka kirikaraᵽe.

^2-3 Ruietatirã kajuyaiᵽakiaka uᵽaka ĩoikire kiñiꞌaraᵽe. Ikiji kime Satanás, bikija ãñaka uᵽaka ĩoiki ᵽoꞌijiritirã ᵽakiroyirekaki. Kire ñiꞌatirã ᵽerumijiaᵽi ángelre kire ᵽiꞌᵽeraᵽe, ñoaka mil rakakuri wejejẽꞌrã rõꞌõjĩrã koᵽea tiyibeyurõꞌõrã kimaokoroꞌsi. Suᵽabaatirã sarã kire kitãteraᵽe ñoaka ᵽoꞌimajare ᵽakibekaja kimaokoroꞌsi. Iꞌsia beꞌrõ ᵽuri matikuriji kimaerã kire kijaꞌataerã baaraᵽe.

⁴ Toᵽi mae jãꞌmebaraka naruᵽarõꞌõrã ruᵽajiyeraᵽarãre ñiaraᵽe. Mia, Jesúre yeꞌkaririberiwaꞌri, kimajaroka jaꞌatabeyurã, werikaᵽakiakire kijẽrãkaoka jiyiᵽuᵽayeeberiwaꞌri kiwãmea nakũꞌarã, naᵽitakarã oꞌojĩꞌaberika nimaraᵽe. Nawãmua toataꞌruikarã imakoꞌomakaja, õñia jariᵽeꞌritirã mil rakakuri wejejẽꞌrãka Cristoka ñamajĩ jãꞌmerimaja nimaraᵽe.

⁵ Aᵽerã reyaekarã ᵽuri mil rakakuri wejejẽꞌrãka kijãꞌmerãka beꞌerõꞌõ õñia jariᵽeꞌrirũkirã imaraᵽarã.

⁶ Suᵽa imarĩ wãmua natataꞌruikarãre mamarĩji õñia Tuᵽarãre jariᵽeꞌrirũjemaka jĩjimaka nimarãñu. Kire ãꞌmitiriᵽẽairã imarĩ, aᵽekurioka nareyabesarãñu. Suᵽa imarĩ Tuᵽarãre yaᵽaika kurarãkare baaika uᵽaka baarimaja nimarãñu. Iꞌsuᵽakajaoka nabaarãñu Cristoroꞌsi. Suᵽa imarĩ, mil rakakuri wejejẽꞌrãka kika najãꞌmerãñu.

Ᵽiyia Satanáre nakutekoᵽeka

⁷ Mil rakakuri wejejẽꞌrãka oꞌrirãka beꞌerõꞌõ jaꞌatarũkika kime Satanás.

^8-9 Toᵽi ᵽoritirã Gog wãmeirãre, suᵽabaatirã Magog wãmeirãre ᵽakibaraka kiyaᵽaika uᵽakaja baarũjebaraka kimarãñu ate. Gog, suᵽabaatirã Magog koᵽakaja ritatojo wejeareka Tuᵽarãre yaᵽabeyutatarã nimarãñu. Iꞌsuᵽaka nare kibaarãka imarĩ ritaja kaꞌiaᵽi narẽrĩrãñu, Tuᵽarãka ᵽitãꞌmua koꞌaᵽiꞌyaokoroꞌsi. Rĩkimarã tẽrĩrika nimarãñu ritaja tatarã ᵽoꞌimaja. Suᵽa imarĩ, Tuᵽarãre wãtaka õñurã imaweje namomaka ĩmiᵽi jũꞌrẽika Tuᵽarãre ñaꞌatarãñu kimajamarãre, nimauᵽatiji noriyaokoroꞌsi.

¹⁰ Suᵽabaatirã Satanás, ᵽoꞌimajare ᵽakirimajire, kitaarãñu ᵽeka azufreᵽi jũꞌrẽiritarã. Iꞌsia ruᵽubaji sarãjaoka werikaᵽakiakire, suᵽabaatirã, “Tuᵽarãre bojaĩjirimaji ñime”, ãrĩᵽakiroyikakire kitaaeka. Iꞌsuᵽaka nare kibaamaka ĩmiareka, ñamiareka baꞌiaja jũarĩji torã nimarãñu.

Ᵽoꞌimajare imaeka mirãka uᵽakaja ĩatirã ᵽiyitaka sawaᵽa Tuᵽarãre nare jẽñerũkia

¹¹ Suᵽa simaraᵽaka beꞌrõ tẽrĩriki ruᵽarikũmua joꞌbaka boitaka imaraᵽakarã ĩꞌrĩkare ruᵽamaka ñiaraᵽe. Ritaja ima boꞌibajirã tẽrĩrikiji kimamaka, kĩaraᵽaka wãjitãji ritatojo wejea riraᵽaka. Aᵽekurioka maiberijĩka sajaraᵽe.

^12-13 Reyaeka mirãrã õñia jariᵽeꞌritirã, torã ruᵽaraᵽaki wãjitãji rĩkajiyemaka ñiaraᵽe. Imatiyarimaja, imatiyabeyurãoka nimaraᵽe. Torã narĩkamekãꞌãja ᵽaᵽera ᵽũñu Tuᵽarãre wieraᵽe. Iꞌsiᵽũñurã simaraᵽe ritaja ᵽoꞌimajare baaeka mirãka oꞌoeka. Sareka ĩatirã, “Ikuᵽaka baaeka mirãrã mija ime”, torã ruᵽaraᵽakire nare ãrãᵽe. Suᵽabaatirã, “Ikarakamarã nime yika imarũkirã”, ãrĩwaꞌri kioꞌoeka ᵽũñu aᵽea kiwieraᵽe. Riaᵽakiakarã, kaꞌiarã reyaekarã nimaekarõꞌõᵽi ᵽoritirã õñia jariᵽeꞌriwaꞌri kiruᵽarikumua wãjitãji narĩkatawaꞌraᵽe. Ĩꞌrĩka uᵽakaja nabaaeka mirãka oꞌojĩꞌaeka uᵽakaja nare kibaaraᵽe.

^14-15 Iꞌsia beꞌrõ ᵽuri reyarika, reyaeka mirãrãre imaeka mirãrõꞌõ eꞌetirã, azufreᵽi jũꞌrẽiritarã Tuᵽarãre sataaraᵽe. Azufreᵽi jũꞌrẽirita sime reyaᵽeꞌarika wãmeika. Suᵽabaatirã ᵽaᵽera, “Ikarakamarã nime yika imajiᵽarũkirã”, ãñu ᵽũñurã nawãmea oꞌojĩꞌaberikarãre ᵽuri nare ĩatirã azufreᵽi jũꞌrẽiritarã kitaaraᵽe.