Ap 2 - Porciones del Nuevo Testamento en el idioma Letuama

Éfeso wãmeika wejeareka imaekarãroꞌsi ᵽaᵽera oꞌotirã Juanre ᵽũataeka

¹ Iꞌtojĩrã mae, yire ᵽemakotowiraᵽakire ikuᵽaka yire ãrãᵽe ate: —Éfesoreka imaki yire ãꞌmitiriᵽẽarimajare imaruᵽutarimajiroꞌsi ikuᵽaka mioꞌobe: “Ĩꞌᵽotẽñarirakamarã tãꞌᵽia rikaiki, iꞌsirakatẽrĩoka ᵽeritẽrĩ watoᵽekarã turitaᵽaki imarĩ ikuᵽaka yibojayu:

² Ritaja mija baaika õñuka ñime. Suᵽa simamaka, ᵽoꞌimajare yire yiꞌririka yaᵽawaꞌri mija kaꞌwisijũayu. Iꞌsuᵽakajaoka aᵽerãre baꞌiaja mijare baakoꞌomakaja yire mija yiꞌririjaꞌatabeyua jia ñoñua sime. Iꞌsuᵽakajaoka ‘Cristorika bojariroka bojarimaja yija ime’, ĩꞌrãrimarãre ãrĩkoꞌomakaja, ‘¿Yaje rita nañu?’, ãñurã mija ime. Suᵽa imarĩ nabaarijayua jia ĩawãrũtirã, nawãrõika ãꞌmitiritirã, ‘Waᵽuju ᵽakibaraka baꞌiaja baairã nime’, mija ãñua ñorĩᵽataika.

³ Aᵽerãre baꞌiaja mijare baakoꞌomakaja yire ãꞌmitiriᵽẽarijaꞌatabeyurã mija. Kaꞌwisika imaoka wayuᵽiꞌᵽekaja sarakajeᵽããrijayurã imarĩ, yire mija yiꞌyua jaꞌatabeyurã mija ime.

⁴ Imakoꞌomakaja mamarĩtaka yire yiꞌriũꞌmubaraka jĩjimaka, jiyurika yika mija imaraᵽaka uᵽakamarĩa imarã mija jayu mae. Suᵽabaatirã mija tiyiaja oka mija wayuĩabuꞌabeyu. Iꞌsuᵽaka simamaka mijaka jĩjimaka ñimabeyukaji ruᵽu.

⁵ Suᵽa imarĩ, yire ãꞌmitiriᵽẽawaꞌri jia yire mija yiꞌriũꞌmuraᵽaka ᵽuᵽajoatirã, ‘Jia mika yija imaraᵽaka uᵽakamarĩa yija baayu baꞌitaka sime’, ãñurã mija jaᵽe. Suᵽa imarĩ mamarĩ yika jia imatiyawaꞌri jia mija baaraᵽaka uᵽakaja mija baabe ate. Iꞌsuᵽaka mija baabesarãka noꞌojĩrãmarĩaja mija ᵽeritẽrĩa yaaboabaraka imakoᵽeika mijareka ẽꞌmarĩ yetarãñu. Iꞌsuᵽaka yibaarãkareka yire jiyiᵽuᵽayeerimajare rẽrĩbesarãñu ate torã.

⁶ Mae mijare ñañu, jia yika mija imaraᵽaka uᵽakamarĩa jayurã imakoꞌomakaja ĩꞌrãbaꞌi jia mija baayu ñiamaka. Nicolaítas tatarãre baꞌiaja baaika mija ĩariᵽeꞌyoika jia sime. Iꞌsuᵽakajaoka sime yiroꞌsi.

⁷ Mija ãꞌmitiᵽe ritaja wejeareka yire yiꞌᵽaraka imarã. Jia samija õrĩᵽũariyaᵽayeꞌe, Esᵽíritu Santore yire jeyobaaikaᵽi yibojaika jia mija ãꞌmitiᵽe. Baꞌiaja nabaakoᵽeka najaꞌatayu Satanáre ĩꞌrãᵽẽꞌrõtorãja baairã. Iꞌsuᵽaka baarãñurãre Tuᵽarã rioarã ima õñioyaᵽurika yijiꞌarãñu”, ãrĩwaꞌri mioꞌobe,==yire kẽrãᵽe makãrãrũñuroka uᵽakaᵽi yire ᵽemakotowiraᵽaki.

Esmirna wãmeika wejeareka imaekarãroꞌsi ᵽaᵽera oꞌotirã Juanre ᵽũataeka

⁸ Saᵽemajĩrã ikuᵽaka yire kẽrãᵽe ate: —Esmirna wejearã yire ãꞌmitiriᵽẽarimajare imaruᵽutarimajiroꞌsi ikuᵽaka mioꞌobe: “Ritaja ᵽoꞌijiaekaki imarĩ, ñamajĩ wejea tiyirũjerũkika ñime. Yiꞌijioka imaki reyakoꞌomakaja õñia jariᵽeꞌrikaki. Suᵽa imarĩ ikuᵽaka mire ñañu:

⁹ Mia. Baꞌiaja mijare nabaamaka, jiamarĩa mija jũarijayua ñoñu. Suᵽabaatirã wayuoka baairã mija imaoka ñorĩᵽataika sime. Iꞌsuᵽaka mija imakoꞌomakaja Tuᵽarãre mijare sajaꞌataekaᵽi ãrĩwaꞌri, imatiyaika rikairã mija ime. Iꞌsuᵽakajaoka ‘Judíorãka imarĩ, Tuᵽarãrirãtakaja yija ime’, ãrĩwaꞌri, ‘Baꞌiaja baarimaja nime’, ãrĩwaꞌri mijareka kẽꞌrãjairimajareoka ñoñu. Iꞌsuᵽaka nabaayu Tuᵽarãre yiꞌriberiwaꞌri Satanáre yaᵽaika uᵽaka baarijayurã imarĩ.

¹⁰ Wẽkomaka imariwiꞌiarã baꞌiaja mija jũarijarirãka kĩkibekaja mija imabe. Iꞌsuᵽaka Satanáre nare ᵽuᵽajoarũjemaka ĩꞌrãrimarãre torã nataarãñu. Yire mija ãꞌmitiriᵽẽaika mija jaꞌatarika yaᵽawaꞌri ĩꞌᵽaᵽitarakarĩmirõꞌõjĩrã iꞌsuᵽaka mijare kibaataꞌarãñu. Iꞌsuᵽaka jũakoꞌomakaja yire mija ãꞌmitiriᵽẽarijaꞌataꞌsi mijare najããrãkarõꞌõjĩrã. Samija rakajeᵽããrãkareka, ‘Õñia imajiᵽarũkirã nimarũ’, mijareka ñarĩrãñu.

¹¹ Mija ãꞌmitiᵽe ritaja wejeareka yire yiꞌᵽaraka imarijayurã. Jia samija õrĩᵽũariyaᵽayeꞌe, Esᵽíritu Santore yire jeyobaaikaᵽi yibojaika jia mija ãꞌmitiᵽe. Baꞌiaja jũakoꞌomakaja yire ãꞌmitiriᵽẽabaraka imarijayurã ᵽuri, baꞌiaja jũarika tiyibeyurõꞌõrã yiᵽũatarãñurãka aꞌrirũkimarĩrã nime”, ãrĩwaꞌri mioꞌobe,==yire ᵽemakotowiraᵽakire mijare bojayu.

Ᵽérgamo wãmeika wejeareka imaekarãroꞌsi ᵽaᵽera oꞌotirã Juanre ᵽũataeka

¹² Torãjĩrã ate yire ᵽemakotowiraᵽakire ikuᵽaka yire ãrãᵽe: —Ᵽérgamo wejearã yire ãꞌmitiriᵽẽarimajare imaruᵽutarimajiroꞌsi ikuᵽaka mioꞌobe: “Ikuᵽaka ñañu ĩꞌᵽaᵽẽꞌrõto oᵽika sara rikaiki imarĩ.

¹³ Ritaja mija imarijayua ñiaika simamaka, Satanáre jãꞌmeirõꞌõrã mija imaoka ñorĩᵽatayu. Torã imakoꞌomakaja yire yiꞌriwaꞌri Satanáre ãꞌmitiriᵽẽabeyurã mija ime. Mia, torã jia yire yiꞌriwaꞌri Antiᵽas wãmeikire yirika bojariroka bojajaꞌatabeyuka kimamaka, kire najããeka. Iꞌsuᵽaka tokarãre kire baakoꞌomakaja yire mija yiꞌyua jaꞌatabeyurã mija.

^14-15 Suᵽa simakoꞌomakaja bikija Balaam, Balacre kiwãrõekamijikaka yiꞌyurãre ãꞌmitiriᵽẽarijayurã nime ĩꞌrãrimarã mija ᵽõꞌirã imarã. Suᵽa imarĩ jĩjimaka mijaka imabeyukajika yiꞌi. Mia, ikuᵽaka sime Balaamre wãrõekamijikaka: ‘Israelkarãre ikuᵽaka mibojabe baꞌiaja nabaaokoroꞌsi: “Jẽrãka jiyeka jiyiᵽuᵽaka õrĩwaꞌri, waꞌiroꞌsi riꞌia yija ᵽããrijayua mija baꞌarãka marã imabeyua. Iꞌsuᵽakajaoka yija tãꞌomaja rõmitikaka mija yaᵽaika uᵽakaja mija wãꞌimarĩkoᵽebe” ’, ãrĩwaꞌri Balaamre kire wãrõeka. Kire kiwãrõeka uᵽakaja Balacre baaeka. Suᵽa imarĩ baꞌiaja Israelkarãre baaeka. Iꞌsuᵽakajaoka ĩꞌrãrimarãre mija watoᵽekarã baꞌiaja baarijayu Nicolaítas tatarãre wãrõika yiꞌriwaꞌri.

¹⁶ Iꞌsuᵽaka simamaka ‘Ᵽakirimajaroka ãꞌmitiriᵽẽawaꞌri baꞌiaja mija baaꞌsi’, nare ãrĩbeyurã mija imarãkareka noꞌojĩrãmarĩaja mija ᵽõꞌirã yeyarãka ᵽoto yirijokoᵽearã ima saraᵽi baꞌiaja nare yibaarãñu sanaꞌmitiriᵽẽarijaꞌatabeᵽakãꞌã.

¹⁷ Mija ãꞌmitiᵽe ritaja wejeareka yire yiꞌᵽaraka imarijayurã. Jia samija õrĩᵽũariyaᵽayeꞌe, Esᵽíritu Santore yire jeyobaaikaᵽi yibojaika jia mija ãꞌmitiᵽe. Baꞌiaja nabaaika jaꞌataekarãre ᵽuri baꞌarika maikoribeyua maná wãmeika yijiꞌarãñu. Suᵽabaatirã ãta boia mamaka wãmea sarã oꞌoeka ima nare ñijirãñu, soꞌoeka marãoka ĩawãrũbeyua simarãñu. Imakoꞌomakaja seꞌetorirãki ĩꞌrĩkaja sĩawãrũrãki”, ãrĩwaꞌri mioꞌobe,==makãrãrũñuroka uᵽakaᵽi yire ᵽemakotowiraᵽakire ãrãᵽe.

Tiatira wãmeika wejeareka imaekarãroꞌsi ᵽaᵽera oꞌotirã Juanre ᵽũataeka

¹⁸ Toᵽi ikuᵽaka makãrãrũñuroka uᵽakaᵽi ᵽemakotowiraᵽakire yire ãrãᵽe ate: —Tiatirarã yire ãꞌmitiriᵽẽarimajare imaruᵽutarimajiroꞌsi ikuᵽaka oꞌotirã miᵽũatabe: “ ‘Ᵽeka jũrẽika uᵽaka yiñakoa yaꞌtaiki ñime. Iꞌsuᵽakajaoka, bronce najoemaka sayaꞌtaika uᵽaka sayaꞌtayu ñuꞌᵽua’, yiꞌi Tuᵽarã Makiji mijare sabojaiki.

¹⁹ Ritaja mija baaika õrĩᵽataiki ñime. Suᵽa imarĩ ‘Ᵽoꞌimajare wayuĩarimaja, suᵽabaatirã yire ãꞌmitiriᵽẽairã nime’, mijareka ñarĩrijayu. Iꞌsuᵽakajaoka ritaja aᵽerãre mija jeyobaaika õrĩᵽataiki ñime. Yire ãꞌmitiriᵽẽairã mija imamaka, baꞌiaja aᵽerãre mijare baarijayu. Iꞌsuᵽaka mijare nabaakoꞌomakaja yire mija ãꞌmitiriᵽẽaika jaꞌatabeyurã mija ime. ‘Mamarĩ yire nayiꞌriũꞌmuraᵽaka ᵽemawaꞌribaji jia baairã nime’, mijareka ñañu.

²⁰ Iꞌsuᵽaka simakoꞌomakaja ikuᵽaka mija baarijayu: Ĩꞌrãko rõmo Jezabel wãmeiko baꞌiaja kojaika ᵽoto ‘Koᵽakaja, mijaitiyibe mae’, kore ãᵽekaja wiriwirikãꞌãja kore mija ãꞌmitiyu. Suᵽa imarĩ mijaka jiitakaja jĩjimaka ñimabeyukaji ruᵽu. Mia ikuᵽaka kõrĩrijayu: ‘Tuᵽarãroꞌsi jaiĩjirirõmo ñime’. Suᵽa imako imarĩ ‘Aᵽerãka mija yaᵽaika uᵽakaja mija wãꞌimarĩkoᵽebe. Iꞌsuᵽakajaoka jẽrãka jiyiᵽuᵽayeewaꞌri saᵽõꞌirã waꞌiroꞌsi riꞌia naᵽããika mija baꞌakoᵽejĩka’, ãrĩwaꞌri kobojaᵽakirijayu. Iꞌsuᵽaka kõᵽakãꞌã ãꞌmitiritirã, rukubaka ᵽuᵽajoairã jariwaꞌri, yire yiꞌyurãre baꞌiaja baayu.

²¹ Iꞌsuᵽaka simamaka baꞌiaja kobaaika jaꞌatarika yaᵽawaꞌri, yitaꞌakoᵽeraᵽe ruᵽu. Imakoꞌomakaja, baꞌiaja kowãꞌimarĩrijayua jaꞌatariyaᵽabeyuko koime.

²² Mia, suᵽa koima imarĩ, ‘Jãjia wãmarĩa jaritirã, kokãrĩᵽeyurũkiareka baꞌiaja kojũaᵽeyurãñu’. Suᵽabaatirã koka wãꞌimarĩrijayurã nimauᵽatire iꞌsuᵽakajaoka yibaarãñu baꞌiaja nabaaika jaꞌatabekaja nimarãkareka.

²³ Suᵽabaatirã kowãrõika ãꞌmitiriᵽẽabaraka imarijayurãreoka yiriataᵽatarãñu. Iꞌsia yibaarãka ĩatirã, ‘Ritaja maᵽuᵽajoaika õrĩᵽataiki kime’, yireka narĩwãrũrãñu ika wejeareka yire yiꞌyurã uᵽatiji. Suᵽabaatirãoka ‘Maimarijayu uᵽakaja, tẽrĩrika ima, ᵽemakaᵽañakaja imaoka mare kiwaᵽajaiyu’, mija ãrĩwãrũrãñu.

^24-25 Tiatirareka imarã ĩꞌrãrimarã ᵽuri kowãrõika ãꞌmitiriᵽẽabeyurã. ‘Ikuᵽaka sime imatiyaika bojariroka makioka õrĩbeyua’, ãrĩwaꞌri ᵽakirirõmore wãrõika ãꞌmitiriᵽẽarimajare mijare bojakoꞌomakaja samija ãꞌmitiririᵽeꞌyoyu. Satanárika simakoꞌomakaja, ‘Imatiyaika bojariroka sime’, narĩᵽakiyu. Iꞌsuᵽaka ima ãꞌmitiririᵽeꞌyoirã mija imamaka aᵽea mijare jãꞌmebesarãki yiꞌi. Mae mijare ñarĩrã baaika uᵽakaja mija imarijaᵽe. Mia jeꞌe: Yiᵽeꞌrietarũkia taꞌabaraka jia yire ãꞌmitiriᵽẽarijaꞌatabekaja mija imarijaᵽe.

^26-28 Yire ãꞌmitiriᵽẽarijaꞌatabekaja, õñia nimatiyikuri yiyaᵽaika uᵽaka baarijaꞌatabeyurãre ikuᵽaka ñarĩrãñu: ‘Ritaja wejeakarãre mija jãꞌmebe’, Yiᵽakire yire ãrĩka uᵽakaja, ‘Ritaja wejeakarãre jãꞌmeirã mija imarãñu’, nare ñarĩrãñu. Suᵽa simamaka Tuᵽarãre yiꞌririyaᵽabeyurã ritatojo ika wejeareka imarãre mija riatarãñu. Suᵽabaatirã yire ãꞌmitiriᵽẽarijaꞌatabeyurã mija imamaka, wãrĩrika ruꞌaraꞌaerã baaika ᵽoto tãꞌᵽia õaika mijare yijaꞌatarãñu ‘Baꞌiaja baarika tẽñurã mija ime’, ãrĩwaꞌri.

²⁹ Mija ãꞌmitiᵽe ritaja wejeareka yire yiꞌᵽaraka imarijayurã. Jia samija õrĩᵽũariyaᵽayeꞌe, Esᵽíritu Santore yire jeyobaaikaᵽi yibojaika mija ãꞌmitiᵽe”, ãrĩwaꞌri mioꞌobe,==yire kibojaraᵽe.