Ap 19 - Porciones del Nuevo Testamento en el idioma Letuama

¹ Iꞌsuᵽaka simaraᵽaka beꞌerõꞌõ maboꞌikakuriᵽi rĩkimarã jaimaka ñaꞌmitiraᵽe. Jãjirokaᵽi ikuᵽaka narĩkoraᵽe: —“Aleluya. Tẽrĩrikaja jiika maĩᵽamaki Tuᵽarãre ime”, kireka marĩrijariyeꞌe. Iꞌki Tuᵽarãja kime baꞌiaja imarika tiyibeyurõꞌõrã maꞌrirũkia imakoᵽekareka mare tããekaki. Ritaja ima boꞌibajirã imaki kime, suᵽabaatirã ritaja ima ᵽemawaꞌribaji jiitakiji kime.

² “Baꞌiaja ritajaka wãꞌimarĩtiyaikore yiwẽkomabaarãñu”, rita ãñuka imarĩ, waᵽujumarĩa baꞌiaja kore kibaayu. Baꞌiaja kobaaekaᵽi ritatojo wejeareka imaekarãre baꞌiaja koimaruᵽutaeka. Suᵽa simamaka Tuᵽarãre yaᵽaika baaroyiraᵽarãre jããekakore, kobaaroyiraᵽaka ĩaraᵽaki imarĩ, kore kiriataraᵽe,==narĩriokabayuraᵽe maboꞌikakuriᵽi. Baꞌiaja ritajaka wãꞌimarĩtiyaiko uᵽaka Babiloniawejeakarã ᵽoꞌimaja baꞌiaja imaruᵽutairã nimamaka iꞌsuᵽaka narãᵽe.

³ Suᵽabaatirã ikuᵽaka aᵽea narĩriokabayuraᵽe ĩꞌrãjaoka: —“Tẽrĩrikaja jiika maĩᵽamaki Tuᵽarãre ime”, kireka marĩrijariyeꞌe, Babiloniawejea ooeka ũmakaka ũmakaᵽuritiyirũkimarĩa simamaka,==narĩkoraᵽe.

⁴ Iꞌsuᵽaka narĩkoraᵽaka ᵽoto, Tuᵽarã ruᵽarikũmu wãjitãji veinticuatro rakamarã ᵽakiarimarã, suᵽabaatirã botarakamarã maikoribeyu uᵽaka imaraᵽarãre moꞌiᵽãñawaꞌraᵽe. Toᵽi imatirã ikuᵽaka narãᵽe: —Nañua rita sime. Tẽrĩrikaja jiika maĩᵽamaki Tuᵽarãre ime,==kire jiyiᵽuᵽayeewaꞌri narãᵽaka beꞌrõ Tuᵽarã ruᵽarikũmua imarõꞌõᵽi ikuᵽaka sajaikoraᵽe:

⁵ —“Tẽrĩrikaja jiika mime”, ãrĩwaꞌri jĩjimaka Tuᵽarãka maimayeꞌe. Ᵽoꞌimajare ĩaika wãjitãji imatiyarimaja, imatiyabeyurã uᵽaka imakoᵽeirã, ritaja kiyaᵽaika uᵽakaja kiroꞌsi baarijayurã kire jiyiᵽuᵽayeebaraka jĩjimaka maimarijariyeꞌe,==sãrĩkoraᵽe.

Jesús, Oveja weiwaꞌyua uᵽaka imakiroꞌsi nabayakoyaeka

⁶ Iꞌsuᵽaka simaraᵽaka beꞌrõ, rĩkimarãja jairiokabayurã uᵽaka baatirã ãtaᵽi okoa weꞌrirĩkaika uᵽaka, wĩᵽoa jaika uᵽaka baatirã ikuᵽaka narĩkoraᵽe: —Aleluya. Tẽrĩriki imarĩ, ritajare kijãꞌmerijayu. Suᵽa imarĩ, “Ritaja imaboꞌibajirã tẽrĩriki kime”, kire majiyiᵽuᵽayeerijariyeꞌe.

⁷ Oveja weiwaꞌyua uᵽaka imakika kirĩrãre ᵽitañiꞌabuꞌaika uᵽaka baairĩmi seyayu mae. Suᵽa simamaka Tuᵽarãre jĩjimakaᵽi jiyiᵽuᵽayeebaraka maimayeꞌe, kikaja kirĩrã imajiᵽarũkirã imarĩ. Oveja weiwaꞌyua uᵽaka imaki jeyomako ketarũkia jĩjimakaᵽi taꞌatikaja koima uᵽaka maimayeꞌe.

⁸ Jíakaka jariroaka boia kaꞌimarĩa kojããrũkia Tuᵽarãre kore ĩjiraᵽe,==sãrĩkoraᵽe. Kojããika kaꞌimarĩa ima, “Baꞌiaja baabekaja Tuᵽarãre yiꞌyurã”, ãrĩrikoᵽakaja simaraᵽe.

⁹ Sarokajĩte ikuᵽaka ángelre yire ãrãᵽe ate: —Mae mire ñarĩrã baaika mioꞌobe: “Oveja weiwaꞌyua uᵽaka imakire ᵽitañiꞌabuꞌaika uᵽaka baarãka baya niaerã kioyibojaekarã jĩjimaka jarirãñurã jiitaka Tuᵽarãre nare baamaka”, ãñua mioꞌobe,==kẽrãᵽe. Suᵽabaatirã, —Rita sime ika mire yibojaika, Tuᵽarãrika bojariroka imatiyaika sime,==yire kẽrãᵽe.

¹⁰ Suᵽa kẽᵽakãꞌã, jiyiᵽuᵽaka kire õrĩwaꞌri kiwãjitãji yimoꞌiᵽãñaraᵽe. —Mimoꞌiᵽãñaꞌsi yiwãjitãji. Mima uᵽakaja, mijeyomarã Jesúre yiꞌyurã uᵽakajaoka Tuᵽarãre yaᵽaika uᵽakaja baaiki ñime. Suᵽabaatirã, “Ikuᵽaka kime Tuᵽarã”, ãrĩwaꞌri Jesúre wãrõekakaka bojarijayurã maa. Ĩꞌrãtiji bojarijayurã maimamaka, Tuᵽarãre takaja mijiyiᵽuᵽayeetiyabe,==ángelre yire ãrãᵽe.

Kawaru boika ᵽemarã tuyuki tẽrĩritakaja imarimaji

¹¹ Sabeꞌerõꞌõ, maboꞌikakurirã koᵽereka uᵽaka wiritamaka ñiaraᵽe. Suᵽa imarĩ, kawaru boika torã rĩkamaraᵽaki kiᵽemarã, ĩꞌrĩka ᵽoꞌimajire tuyuraᵽe. “Kẽrĩrijayu uᵽakaja baaiki, wãjimiji bojarimaji”, wãmeiki kimaraᵽe. Wãjia ᵽoꞌimajare jãꞌmeiki, kimajamarãre baꞌiaja baaeka ᵽiꞌiwaꞌri ᵽitãꞌmua ᵽoꞌijiaiki kimaraᵽe.

¹² Kiñakoa ᵽeka jũrẽika uᵽaka yaaboaraᵽaka. Kiruᵽukoꞌareka rĩkimakaja niᵽarimarã mirãrã buꞌya tuaekaki kimaraᵽe. Iꞌki ĩꞌrĩkaja kiõñua simaraᵽe wãmea kiᵽoꞌiarã oꞌojĩꞌaeka.

¹³ Riwearã ñuꞌaeka saya uᵽaka jariroaka jããiki. “Tuᵽarãre nare ãñu uᵽakaja ᵽoꞌimajare baabeaiki ñime”, ãñua wãmeiki kimaraᵽe.

¹⁴ Kisurararãka maboꞌikakurirã jariro boia kaꞌimarĩa jããekarã imaraᵽarã. Suᵽabaatirã kawaru boirã ᵽemarã tuyutirã kibeꞌerõꞌõ naꞌririjaraᵽe.

¹⁵ Naruᵽurõꞌõ aꞌririjaraᵽaki rijokoᵽeareka imaraᵽaka sara oᵽika. Sara koᵽakaja simarãñu kioka, kiokaᵽi kimajamarãre ĩꞌrãᵽẽꞌrõtorãja kibaarãka simamaka. Ritaja jãꞌmewãrũiki imarĩ, baꞌiaja baarimajare baaika ĩariᵽeꞌyowaꞌri nare kiwẽkomabaarãñu. Tuᵽarã, ritaja ima tẽrĩwaꞌribaji imakire nare boebaᵽakãꞌã baꞌitakaja nare baarimaji kimarãñu.

¹⁶ Kijariroakarã suᵽabaatirã kirijoarã oꞌoeka ikuᵽaka ãñua jĩꞌĩtaraᵽaka: “Ĩꞌĩ kime ritaja ĩᵽarimarã ĩᵽamaki, suᵽabaatirã ritaja imatiyarimajare oka jãꞌmerimaji”, ãñua simaraᵽe.

^17-18 Iꞌsuᵽaka simaraᵽaka beꞌrõ ĩꞌrĩka ángelre aiyakareka rĩkamaᵽakãꞌã ñiaraᵽe. Wejeᵽemareka wiyua wayurika rabarika baꞌaika simamaka jãjirokaᵽi ikuᵽaka sakẽrãᵽe: —Tuᵽarãre mijaroꞌsi baaweirãka mija ĩaraꞌabe. Kawaru boiakareka tuyukare jããᵽaterãkakaka ᵽoꞌimaja rabarika rẽrĩtirã mija baꞌaraᵽe. Ĩᵽarimarã riꞌia, jãjirã riꞌia, kawarurãka riꞌia, naᵽemaᵽi aꞌririjayurã riꞌia, surararãka ĩᵽarimarã riꞌia, naᵽuᵽayariji imarijayurã riꞌia, aᵽerãre baꞌirabeĩjirimaja riꞌia, aᵽerãroꞌsi baꞌirabeĩjibeyurã riꞌia, imatiyarimaja riꞌia, imatiyarimajamarĩrã riꞌia ritaja ika ᵽitãꞌmuareka jĩñurã riꞌia mija baꞌaraᵽe,==sakẽrãᵽe ángel.

^19-20 Ika beꞌrõ werikaᵽakiaki uᵽaka imaraᵽaki ritaja ĩᵽarimarãre nasurararãkaᵽitiyika kirẽamaka ñiaraᵽe. Suᵽabaatirã torã imaraᵽaki kijeyomaki, “Yiꞌi imaki Tuᵽarãroꞌsi bojaĩjirimaji”, ãrĩkoᵽebaraka werikaᵽakiakire ĩaika wãjitãji maikoribeyua baabeawaꞌri, werikaᵽakiaki jẽrãka jiyiᵽuᵽaka õrãᵽarãre, suᵽabaatirã kiwãmea oꞌojĩꞌaraᵽarãre kiᵽakiraᵽe. Ritaja narẽrãᵽe, kawaru ᵽemarã tuyuraᵽakika, suᵽabaatirã kisurararãkaka ᵽitãꞌmua koꞌaᵽiꞌyaokoroꞌsi. Kawaru boika ᵽemarã tuyuraᵽaki naka jĩᵽaraka ĩꞌᵽarã baꞌiaja baarimajare kiñiꞌaraᵽe, werikaᵽakiakire, suᵽabaatirã, “Tuᵽarãroꞌsi bojaĩjirimaji ñime”, ãrĩroyiraᵽakireoka. Suᵽa imarĩ õñirãja azufreᵽi jũꞌrẽiritarã nare kitaaraᵽe.

²¹ Suᵽabaatirã ĩᵽarimarã, nasurararãkaᵽitiyika tẽrãᵽarãre ᵽuri baꞌiuᵽakaja kibaaraᵽe kawaru boika ᵽemarã tuyuraᵽaki; kirijokoᵽearã imaraᵽaka saraᵽi nare kijããᵽateraᵽe. Suᵽa imarĩ dajaka ima baꞌaika wayurika koᵽakaja ñaꞌᵽiraᵽaka kijããᵽateraᵽarã riꞌia baꞌatirã.