Ap 18 - Porciones del Nuevo Testamento en el idioma Letuama

Babiloniareka imaekarãre baꞌiaja jũaeka

¹ Iꞌsuᵽaka simaraᵽaka beꞌerõꞌõ maboꞌikakuriᵽi ángel jãꞌmerimajire ruiraꞌamaka ñiaraᵽe. Jãjia yaꞌtariki imarĩ, ritatojo kaꞌia kiyaaboaraᵽe.

² Iki, jãjirokaᵽi ikuᵽaka ãrĩkoraᵽaki mae: —Babiloniawejea riyua mae. Iꞌsuᵽakajaoka naᵽuyu sareka imakoᵽeirã. Suᵽa baawaꞌri Satanárika ima wejearoꞌsi, ritaja wiribaꞌia dajakakaka wejearoꞌsi sajayu.

³ Mia, baꞌiaja baarirõmo uᵽaka nimaraᵽe Babiloniawejeakarã. Kore ãꞌmitiriᵽẽawaꞌri, ritatojo wejeakarãre dajaka baaraᵽe. Suᵽabaatirã niᵽamarãoka dajaka koka baaraᵽarã. Iꞌsuᵽakajaoka baꞌirĩjia waᵽajãꞌrĩakakatakaja yaᵽatiyawaꞌri, aꞌᵽerõꞌõkarãreka sanawaruaraᵽe. Suᵽa imarĩ ritatojo wejeareka waruamarã rĩkimaka niñerũ tõᵽoirã jaraᵽarã,==ángelre ãrãᵽe.

⁴ Iꞌsuᵽaka kẽrãᵽaka beꞌrõ maboꞌikakuriᵽi ikuᵽaka Tuᵽarãroꞌsi sãrĩkoraᵽe: —Yire ãꞌmitiriᵽẽarijayurã, iꞌsia wejearã mija imaꞌsi. Baꞌiaja nabaaika uᵽaka baabekaja mija imabe, baꞌiaja najũaraᵽaka uᵽaka mija jũakoreka.

⁵ Tokarãre baꞌitakaja baarijaᵽaraka ima koᵽakaja ñiarũñaayu,==kiroꞌsi sãrĩkoraᵽe.

⁶ Suᵽa simamaka boebariwaꞌri baꞌiaja baarimajare riatarũkirãre ikuᵽaka sãrĩkoraᵽe: —Aᵽerãre baꞌiaja nabaaraᵽaka simamaka, saᵽemawaꞌribaji baꞌiaja nare mija baarãñu.

^7-8 Mia, dakoa jariwaꞌririmarĩa rikairã nime. “Imatiyairã maime”, ãrĩᵽuᵽajoairã imarĩ, nayaᵽaika uᵽakaja nabaarijayu. Sakoꞌaᵽitorãja baꞌiaja nare mija jũarũjebe. “Jãꞌmerimaja rõmijã maime. Natĩmiarã nare reyataᵽamaka baꞌiaja ᵽuᵽayurã uᵽakamarĩa”, ãrĩᵽuᵽajoairã nimakoꞌomakaja, ĩꞌrãrĩmi tokarãre baꞌiaja jũarãñu. Suᵽa imarĩ reyairã, kẽsia jũarũkirã, suᵽabaatirã aᵽerã baꞌiaja ᵽuᵽaririkarekaja imarãñurã riomaka imawaꞌri. Suᵽabaatirã nawejea oorãka. Ika ñañu ritaja iꞌsia wejeareka imarãre yijoeriatarãka simamaka. Iꞌsuᵽaka ñañu ritaja ima tẽrĩwaꞌribaji yirikaᵽi sayibaarãka simamaka,==Tuᵽarãroꞌsi sãrĩkoᵽakãꞌã ñaꞌmitiraᵽe.

⁹ Iꞌsia wejea ooriᵽakãꞌã ĩatirã, jimarĩ aᵽea kaꞌiakarã ĩᵽarimarãre baꞌiaja ᵽuᵽarirãñu, “Nimamaka dako jariwaꞌririmarĩa yija yaᵽaika uᵽakaja naka yija baakoᵽeroyiraᵽe”, ãrĩwaꞌri. Iꞌsuᵽaka ĩᵽarimarãre ãrĩrãñu Babiloniakarãka baꞌiaja baajeyoarika mirãrã imarĩ.

¹⁰ Imakoꞌomakaja Babiloniakarãka baꞌiaja jũarika yaᵽaberiwaꞌri ñoakurirã natuirãñu. Toᵽi imatirã oᵽaraka ikuᵽaka narĩrãñu: “¡Ayoo jaꞌa! Jimarĩ joꞌbaka wejeᵽakiaka imakoꞌomakaja sooriyu. Ritaja aᵽeriweje boꞌibajirã imatiyairõꞌõ simakoᵽeraᵽe. Imakoꞌomakaja tokarãre baꞌiaja baariᵽareareka ikuᵽarõꞌõᵽiji suᵽa sakibaayu Tuᵽarã”, nawejeareka imabayurã ĩᵽarimarãre ãrĩrãñu.

^11-14 Suᵽabaatirã oro, ᵽlata, ãta waᵽajãꞌrĩa, ᵽerlas, sayaᵽãia jũꞌaka, iꞌyayaᵽea uᵽaka ĩoka, lino jíakaka, seda. Suᵽabaatirã jia jiijĩsia jĩaika yaᵽua waᵽajãꞌrĩakaka, aᵽea yaᵽuakaka, marfilkaka, ᵽeruakaka, broncekaka suᵽabaatirã jía ãta marmolkaka baaeka. Ayabaka, jiijĩsia naᵽoꞌia imaerã iyebaka, naᵽukurũkia mirra wãmeika, canela, baꞌarika rukerũkia, suᵽabaatirã jiijĩsia baarũkia especias, iyaokoa, yoꞌarũkia iyebaka, trigo, trigo oyeka jía, naᵽoyarãre ĩjibaraka, waꞌibikirãwẽkoa, oveja, kawaru, suᵽabaatirã kawaruᵽi tũrũrũki saᵽi naꞌyua, ritaja ika baꞌirĩjia yija bojaeka eꞌetoᵽaraka Babiloniakarãre imakoᵽeroyiraᵽe. Iꞌsuᵽaka simamaka ĩakoᵽeka waruaka nare ĩjirimaja mirãrã oᵽaraka imarãñurã. Suᵽa nabaarãñu ritaja Babiloniakarãre rikakoᵽeika ᵽuᵽajoawaꞌri, “Jíakaka baꞌirĩjia nawãtakoᵽeka, suᵽabaatirã ritaja baꞌirĩjia waᵽajãꞌrĩakaka narikakoᵽeroyiraᵽaka ᵽitiyika nariyu mae, aᵽekurioka sarikaokoroꞌsimarĩa”, narĩrãñu.

¹⁵ Suᵽa imarĩ Babiloniarã baꞌirĩjia ĩjitirã rĩkimakaja niñerũ tõᵽokoᵽeka mirãrã, soorãñurĩmi yoeᵽi oribaraka nimarãñu, “Naka ĩꞌrãtiji torã baꞌiaja yija jũaaꞌsi”, ãrĩwaꞌri.

¹⁶ Toᵽi imatirã ikuᵽaka baꞌiaja ᵽuᵽaribaraka narĩrãñu: “¡Yee jaꞌa! Baꞌitakaja sabaayu Babiloniawejea. Rõmo jiyuriko ima uᵽaka imaweje imakoᵽeroyiraᵽe. Suᵽabaatirã saya iyayaᵽea ĩoika suᵽabaatirã jũꞌaka waᵽajãꞌrĩakaka jããtirã, rĩkimakaja kojiioka koᵽoꞌireka imako, orokaka baaeka, suᵽabaatirã ãta waᵽajãꞌrĩakaka baaeka, ᵽerlas wameikakaka baaeka rikaiko uᵽaka imaweje simakoᵽeroyiraᵽe.

¹⁷ Suᵽabaatirã ritaja tokarãre rikakoᵽeraᵽaka ñojimarĩji ooᵽataika”, narĩrãñu baꞌirĩjia torã ĩjikoᵽekarã. Waᵽuru ĩᵽarimarã, naroꞌsi baꞌiraberimaja, suᵽabaatirã waᵽuruᵽi waruaka eꞌewaꞌritirã ĩjirimaja ñoakuriᵽi sĩañumarãñurã.

¹⁸ Ate, oobaraka Babilonia jimarĩ ũmakaᵽuᵽakãꞌã ĩawaꞌri ᵽañebaabaraka ikuᵽaka nakasererãñu: “Iꞌsiweje imaroyiraᵽarõꞌõjĩrã ima weje imabeyua mae”, narĩrãñu.

¹⁹ Tẽrĩrika baꞌiaja ᵽuᵽaritiyawaꞌri naruᵽukoꞌarã kaꞌiuyua naᵽearãñu. Iꞌsuᵽaka baatirã, ᵽañebaabaraka ikuᵽaka narĩrãñu: “Baꞌitakaja sabaayu Babiloniawejea”, narĩrãñu waᵽuru joꞌbaka rikairã saᵽi waruaka eꞌewaꞌᵽaraka nare ĩjitirã, rĩkimakaja niñerũ tõᵽokoᵽeroyiraᵽarã. “Ñojimarĩji sooᵽatayu mae”, narĩrãñu waᵽurureka imatiirã.

²⁰ Torãjĩrã mae maboꞌikakuriᵽi ikuᵽaka sajaikoᵽakãꞌã ñaꞌmitiraᵽe: “Iꞌsia wejea ooᵽataika ĩatirã, jĩjimaka mija imabe maboꞌikakurirõꞌõrã imarã. Kirika bojariroka mija bojaerã Cristore ᵽũataekarã, Tuᵽarãre ãñua bojaĩjirimaja, suᵽabaatirã Tuᵽarãre yiꞌyurã uᵽatiji jĩjimaka mija jaᵽe. Suᵽa mija imabe iꞌsia wejeareka imaroyiraᵽarãre baꞌiaja mijare baawãꞌimarĩka waᵽa baꞌiaja najũaika simamaka”, sãrĩkoraᵽe.

²¹ Torãjĩrã ate aᵽika ángel jãjikare ñiaraᵽe. Suᵽa imarĩ, joꞌbaka ãta trigo mukerũkia uᵽaka ima eꞌetirã riakarã kiyiataraᵽe. Suᵽabaatirã, ikuᵽaka kẽrãᵽe: —Ãta yiyiataika uᵽaka, Babilonia Tuᵽarãre riataᵽatarãñu. Suᵽa imarĩ aᵽekurioka ᵽoꞌimajare ĩaᵽeꞌarũkimarĩa simarãñu.

²² Iꞌsuᵽaka simamaka torã arᵽa birebaraka nabayakoyarijayua, maꞌsaka naᵽuᵽurijayua, tromᵽeta naᵽuᵽurijayua, aᵽekurioka ãꞌmitirirũkimarĩa sajarirãñu. Suᵽa imarĩ iꞌsia wejeareka jia baꞌirĩjia baarika õñurã aᵽekurioka sarã baꞌirabebaraka imabesarãñurã. Iꞌsuᵽakajaoka simarãñu trigo oyerimajaroꞌsi.

²³ Jia yaaboabaraka torã ima aᵽekurioka yaaboabesarãka. Suᵽabaatirã jĩjimaka ᵽitañiꞌabuꞌabaraka nimarijayua imabesarãka mae. Mija ãꞌmitiᵽe Babiloniawejeakarã. Ritatojo wejeareka imabayurã boꞌibajirã waruamarã nimakoᵽeraᵽe, mijakarã. Mija yeꞌoaᵽi ritatojo wejeareka imarãre mija ᵽakiraᵽe mija waruaka takaja nayaᵽaokoroꞌsi. Suᵽa imarĩ Tuᵽarãre jiyiᵽuᵽayeebeyurã najaraᵽe.

²⁴ Tuᵽarãre nare ãñua bojaĩjirimajare, kire yiꞌyurãre, ritaja ᵽoꞌimajatatarãre jããbaraka mija imaroyiraᵽe. Suᵽa mija baaroyiraᵽaka waᵽa baꞌitakaja mija jũayu mae,==riakarã ãta joꞌbaka yiataraᵽakire ãrãᵽe.