Ap 17 - Porciones del Nuevo Testamento en el idioma Letuama

Werikaᵽakiakire, rõmoka imaeka

¹ Suᵽabaatirã ĩꞌᵽotẽñarirakamarã ángelrãka seroa rikaraᵽarãkaki ĩꞌrĩkare yiᵽõꞌirã etaraᵽe. Toᵽi ikuᵽaka yire kẽrãᵽe mae: —Õꞌõrã miꞌtabe, rĩkimakaja riamaka imarõꞌõrã baꞌiaja baariwejea ima, sakaka mire yibojaerã baayu. Mia: Ritaja ĩmirĩjaka wãꞌimarĩtiyaiko uᵽaka sareka imarãre imamaka, Tuᵽarãre baꞌiaja nare jũarũjerãñu.

² Iꞌsia wejeareka imarãre baꞌiaja baaruᵽutamaka, ritatojo wejeareka imarã ĩᵽarimarãre baꞌiaja naka baaraᵽe. Ĩmirĩjaka wãꞌimarĩrirõmore baꞌiaja nare baaruᵽutaeka imarĩ, ikuᵽaka nimaraᵽe iꞌsia wejeakarã: Waᵽuju ima jiyiᵽuᵽaka õñurã imarĩ, ritatojo wejeareka imarãre jiyiᵽuᵽaka sanoñaokoroꞌsi maerumajaka uᵽaka nare nimarũjeraᵽe,==ángelre yire ãrãᵽe.

³ Iꞌsuᵽaka yire kẽrãᵽaka ᵽoto Esᵽíritu Santore jeyobaaikaᵽi ikuᵽaka yire sabaaraᵽe: Ĩꞌrĩka ángel ᵽoꞌimajamatorã yire eꞌewaꞌraᵽaki. Torã eyatirã werikaᵽakiaki jũꞌaka imaraᵽaki ᵽemarã rõmore tuyumaka ñiaraᵽe. Tuᵽarãre jaiyuyerikakaka wãmea oꞌoeka kireka jĩꞌĩjiyeraᵽaka. Suᵽabaatirã ĩꞌᵽotẽñarirakao kiruᵽukoꞌa, ĩꞌᵽaᵽitarakabi wakaiki kimaraᵽe.

⁴ Iyayaᵽea uᵽaka ĩoika, suᵽabaatirã jũꞌaka simaraᵽe kosaya. Suᵽabaatirã orokaka, ãta waᵽajãꞌrĩakaka, ᵽerlas wameikakaka baaeka kojiioka rĩkamakaja koᵽoꞌiareka imaraᵽaka. Suᵽabaatirã noñu uᵽakaja ᵽuᵽajoatirã nabaaeka waᵽuju ima kojiyiᵽuᵽayeerijayua, baꞌitakaja kowãꞌimayua seroa orokaka baaeka pururika korikaraᵽe.

⁵ Majẽrãkoꞌabeyua wãmea kokũꞌarã oꞌojĩꞌaeka imaraᵽaka. “Babiloniawejea”, ãrĩrikoᵽakaja simaraᵽe iꞌsia wãmea. “Ritaja baꞌiaja baawãꞌimarĩrimajare wãrõrirõmo imarĩ, naᵽako uᵽaka koime. Suᵽabaatirã ritaja baꞌia Tuᵽarãre yaᵽabeyuakaka ᵽoꞌimajare wãrõrimaja Babiloniawejeakarãre ime”, ãrĩrika simaraᵽe kokũꞌarã oꞌojĩꞌaeka.

⁶ Kore ñiawãrũmaka ᵽuri, ikuᵽaka koimaraᵽe: Iyaokoa ukutirã wejabiyuko uᵽaka Tuᵽarãrirã, suᵽabaatirã kirika bojariroka yiꞌriwaꞌri bojarimajare najããraᵽaka riwea koᵽakaja simaraᵽe iyaokoa. Suᵽa koimamaka marãkãꞌã ãrĩberijĩka yijaraᵽe.

⁷ Toᵽiji ikuᵽaka ángelre yire bojaraᵽe: —¿Dako baaerã miyaꞌyatayu? Rõmo miakoꞌoko, “Ikuᵽakaroꞌsi simekãꞌã”, merĩwãrũokoroꞌsi mire sayibojawaᵽuꞌataerã baayu. Suᵽabaatirã werikaᵽakiaki ĩꞌᵽotẽñarirakao ruᵽukoꞌaiki, ĩꞌᵽaᵽitarakabi wakaiki kore eꞌewaꞌᵽakãꞌã miakoꞌoki, “Ikuᵽakaroꞌsi simekãꞌã”, jia merĩwãrũerã ĩꞌᵽabaꞌiwãꞌtaja mire sayibojawaᵽuꞌataerã baayu.

⁸ Werikaᵽakiaki miakoꞌoka õñia kimaraᵽe ruᵽu bikija. Imakoꞌomakaja maekaka ᵽuri kimabeyu. Suᵽa imarĩ kime morĩbeyu ᵽoto koᵽea tiyibeyurõꞌõᵽi ᵽoriraꞌatirã õꞌõrã kimarãñu ate. Suᵽa kibaamaka ritatojo wejeareka imarãre jimarĩ ᵽuᵽatarãñu. Imakoꞌomakaja sabeꞌrõ ᵽuri Tuᵽarãre kire riatarũkirõꞌõrã keꞌrirãñu. Kiᵽaᵽera ᵽũñurã Tuᵽarãre nawãmea oꞌoberikarã nime werikaᵽakiaki uᵽaka imakire ĩatirã ᵽuᵽatarũkirã. Ika wejea kiᵽoꞌijiaerã baaeka ruᵽubajirã kiᵽaᵽera ᵽũñurã, “Ikarakamarã nime õñia imajiᵽarũkirã”, ãrĩwaꞌri Tuᵽarãre oꞌoeka.

⁹ Ãꞌmitiriwãrũikiroꞌsi ᵽuri õrĩrũkia sime. Ĩꞌᵽotẽñarirakao ruᵽukoꞌa miakoꞌa ĩꞌᵽotẽñarirakabi ᵽusi uᵽaka sime. Rõmo saᵽemarã ruᵽakoꞌoko, ᵽusiᵽemarã Babilonia wejea ima uᵽaka koime. Suᵽabaatirã ĩꞌᵽotẽñarirakamarã ĩᵽarimarã uᵽaka sime kiruᵽukoꞌa.

¹⁰ Suᵽa imarĩ ĩꞌrãᵽitarakamarã nimaeka ĩᵽarimarã bikija reyaekarã. Nabeꞌrõ tuikaki kime maekaka ᵽoꞌimajare jãꞌmerijayuka. Kibeꞌerõꞌõjĩ imarũkika ᵽuri õibeyukajika ruᵽu. Ñamajĩ ᵽuri matikurijĩkaja ᵽoꞌimajare kijãꞌmekoᵽerãñu. Imakoꞌomakaja Tuᵽarãre ãrĩrãka uᵽakaja kiroꞌsi simarãñu.

¹¹ Werikaᵽakiaki imaekaki, maekaka ᵽuri õñia imaberikoꞌomakaja ñamajĩ ᵽuri ĩᵽoteñarirakamarã beꞌerõꞌõ ᵽiyia jãꞌmerimaji kimarãñu. Ĩꞌᵽotẽñarirakamarãre jãꞌmeka uᵽakaja jãꞌmerimaji kimarãñu. Iꞌsuᵽaka baꞌiaja kibaarãka beꞌerõꞌõᵽi Tuᵽarãre riatarũkikaroꞌsiji kime.

¹² Ĩꞌᵽaᵽitarakabi waka miakoꞌa, ĩꞌᵽaᵽitarakamaki ĩᵽarimarã uᵽaka sime. Ᵽoꞌimajare jãꞌmeũꞌmubeyukajirã nime ruᵽu. Ñamajĩ werikaᵽakiakika jãꞌmerũkirãroꞌsi imakoꞌomakaja ñoaka jãꞌmebaraka nimabesarãñu.

¹³ Ĩꞌᵽaᵽitarakamarã imakoꞌomakaja ĩꞌrĩka taꞌiarãja ᵽuᵽajoairã nimarãñu. Suᵽa imarĩ, “Miyaᵽaika uᵽakaja mibaarika yaᵽawaꞌri mikaja mire jeyobaabaraka yija imarãñu”, werikaᵽakiakire narĩrãñu.

¹⁴ Suᵽa imawaꞌri Oveja weiwaꞌyua uᵽaka imakika najĩrĩrãñu. Imakoꞌomakaja nare kitẽrĩrãñu. Aᵽerã imatiyarimaja tẽrĩwaꞌribaji imaki imarĩ suᵽa kibaarãñu. Suᵽabaatirã ĩᵽarimarãtarã ĩᵽamaki kime. Oveja weiwaꞌyua uᵽaka imakika imarã Tuᵽarãre wãꞌmaekarã imarĩ, kire yeꞌkariribekaja kiyaᵽaika uᵽakaja baarijayurã nime,==ángelre yire ãrãᵽe.

¹⁵ Ikuᵽaka aᵽea yire kibojaraᵽe: —Rõmore ruᵽairõꞌõrã, rĩkimakaja riamaka miakoꞌa, ᵽoꞌimaja koᵽakaja sime. Suᵽa imarĩ ĩꞌrã wejekarã jariwaꞌrimarĩa, ĩꞌrãtata ᵽoꞌimaja ᵽããwaꞌrimarĩa, nakaꞌiareka imabayurã uᵽatataja sime miakoꞌa.

¹⁶ Ĩꞌᵽaᵽitarakamaki ĩᵽarimarã werikaᵽakiaki uᵽaka imakika miakoꞌorã, rõmore ĩariᵽeꞌyoirã nime. Suᵽa imarĩ baꞌiaja kore baawaꞌri, ritaja kobaꞌirĩjia ẽꞌmatirã jariromarĩko kojarirãñu. Suᵽa imarĩ, koriꞌia baꞌaᵽatatirã, koũꞌa ᵽuri ᵽekarã najoeriatarãka.

¹⁷ Iꞌsuᵽaka nabaarãñu kiᵽuᵽajoaika uᵽakaja Tuᵽarãre nare baarũjemaka. Suᵽabaatirã ĩꞌrĩka taꞌiarãja ᵽuᵽajoawaꞌri werikaᵽakiakire niᵽamaki imarũjetirã, kiyaᵽaika uᵽakaja kire najeyobaarãñu, “Koᵽakaja yijẽꞌrãᵽaaekarã seyayu mae”, torãjite Tuᵽarãre ãrĩrãñu.

¹⁸ Iꞌko rõmo miakoꞌoko imatiyaweje koᵽakaja koime. Tokarã ĩᵽarimarã aᵽea wejeakarã ĩᵽarimarãre tẽrĩwaꞌribaji jãꞌmerimaja nime,==yire kẽrãᵽe ángel.