Ap 16 - Porciones del Nuevo Testamento en el idioma Letuama

Tuᵽarãre boebayuakaka õñijĩĩrika ᵽururika seroareka ima

¹ Sabeꞌerõꞌõ Tuᵽarãre jiyiᵽuᵽaka õrĩriwiꞌiaᵽi ĩꞌᵽotẽñarirakamarã ángelrãkare jãjirokaᵽi ikuᵽaka sãrĩkoᵽakãꞌã ñaꞌmitiraᵽe ate: —Tuᵽarãre ĩariᵽeꞌyoirã ᵽoꞌimajare baꞌiaja jũaerã, seroareka mija rikaika õñijĩĩrika kaꞌiarã mija weꞌañaꞌtabe. Tuᵽarãre boebayuakaka sarã ima simamaka, suᵽa mija baabe.==

² Toᵽi mae mamarĩkaki ángelre seroareka kirikaraᵽaka kaꞌiarã weꞌañaꞌtaraᵽe. Iꞌsuᵽaka kibaaraᵽaka ᵽoto werikaᵽakiaki jẽrãka baaeka jiyiᵽuᵽayeeirãre, kiwãmea oꞌojĩꞌaekarãre dajaka kãmia ãꞌmika naᵽoꞌiarã ᵽoꞌijiraᵽaka.

³ Kibeꞌrõji imaraᵽaki ángel seroareka kirikaraᵽaka riaᵽakiakarã weꞌañaꞌtaraᵽe. Sakiweꞌañaꞌtaraᵽaka ᵽoto, reyaekarã riweuᵽakaja sajaraᵽe okoa mae. Iꞌsuᵽaka sabaamaka, riaᵽakiakareka ima, baꞌirĩjia ritaja jĩrĩᵽataraᵽaka.

⁴ Ĩꞌᵽarã beꞌrõji imaraᵽaki ángel seroaᵽi kirikaraᵽaka riakarã, suᵽabaatirã okoa koᵽeaᵽi ᵽoyurõꞌõrã sakiweꞌañaꞌtaraᵽe. Iꞌsuᵽaka kibaaraᵽaka ᵽoto riwearoꞌsi oka sajaraᵽe iꞌsia.

⁵ Ángel okoa ĩarĩrĩrimaji ikuᵽaka ãrĩkoraᵽaki: —Tuᵽarã, jia wãjirokaᵽi meñu uᵽakaja jia oyiaja baaiki mime. Bikija imaraꞌaekaki, maekakaoka imarijayuka mime. Suᵽa simamaka ᵽoꞌimajare baꞌiaja baaika ĩakoᵽeka boebariwaꞌri, ikuᵽaka nare mibaayu:

⁶ Mire yiꞌyurãre najããmaka, jimarĩ nariwea jururaᵽaka. Suᵽabaatirã miroꞌsi bojaĩjirimajare oka iꞌsuᵽakaja nabaaraᵽe. Suᵽa imarĩ okoa naroꞌsi imabeᵽakãꞌã, “Riwearoꞌsi jayuaja nukurũ”, meñua jia sime,==kẽrĩkoraᵽe ángel okoa ĩarĩrĩrimaji.

⁷ Iꞌsuᵽaka kẽrĩkoraᵽaka ᵽoto joeĩjiritẽrĩa imarõꞌõᵽi ikuᵽaka kire sayiꞌrikoraᵽe: —Rita sime Tuᵽarã, iꞌsuᵽakatakaoka sime. Yija ĩᵽamaki, ritaja ima tẽrĩwaꞌribaji imatiyaiki. Ritaja ĩawãrũiki imarĩ, ᵽoꞌimajare baꞌiaja baaeka rõꞌõjĩrãja jiirokaᵽi nare sawaᵽa jẽñeiki mime,==sãrĩkoraᵽe.

⁸ Maekarakamarã beꞌrõ imaraᵽaki ángel seroaᵽi kirikaraᵽaka aiyakarã sakiweꞌataraᵽe. Iꞌsuᵽaka kibaaraᵽaka ᵽoto aiyaᵽeka jãjia ᵽoꞌimajare joeraᵽaka.

⁹ Suᵽa kibaaraᵽakaᵽi baꞌitakaja ᵽoꞌimajare jũaraᵽe. Ookoꞌomakaja, baꞌiaja nabaaika jaꞌatabekaja nimaraᵽe. Suᵽabaatirã kijãꞌmeraᵽakaᵽi baꞌiaja jũawaꞌri Tuᵽarãre jiyiᵽuᵽayeerika nayaᵽaberaᵽe ᵽoꞌimaja. Kire jiyiᵽuᵽayeerikoᵽakaja baꞌiaja Tuᵽarãreka jaibaraka nimaraᵽe.

^10-11 Botarakamarã beꞌrõji imaraᵽaki ángel, ikuᵽaka baaraᵽaki: Seroareka kirikaraᵽaka werikaᵽakiaki jãꞌmeruᵽarũkikũmu ᵽemarã sakiweꞌañaꞌtaraᵽe. Iꞌsuᵽaka kibaaraᵽaka ᵽoto jãꞌmebaraka kimarõꞌõ neiñamitaꞌraᵽaka. Suᵽa imarĩ ritaja nare sayiꞌamaka marãkãꞌã baaberiwaꞌri narẽrõkaka ᵽariji nakukurijaraᵽe. Imakoꞌomakaja baꞌiaja nabaaika jaꞌatabekaja, Tuᵽarã, maboꞌikakurirõꞌõrã jãꞌmerimajireka baꞌiaja jaibaraka nimaraᵽe.

¹² Ĩꞌrãᵽitarakamarã beꞌrõꞌjite imaraᵽaki ángel seroaᵽi kirikaraᵽaka riaᵽakiaka Éufrates wãmeiriarã sakiweꞌañaꞌtaraᵽe. Suᵽa imarĩ sarekaja ᵽõᵽoraᵽe. Iꞌsuᵽaka sajaraᵽe jãꞌãti ᵽẽꞌrõtoᵽi iꞌtaraᵽarã ĩᵽarimarã nasurararãkaᵽitiyika nawaataꞌyaokoroꞌsi.

¹³ Suᵽa simaraᵽaka beꞌrõ Satanárika ima maekarakamarã ĩᵽaruka uᵽaka ĩoika ñiaraᵽe. Ĩꞌrĩka imaraᵽaki kajuyaiᵽakiaka uᵽaka ĩoiki rijokoᵽeaᵽi ᵽoraᵽaki. Aᵽika ĩᵽaruka ᵽoraᵽaki werikaᵽakiaki rijokoᵽeaᵽi. Aᵽika ĩᵽaruka ᵽoraᵽaki weriki waᵽuju ᵽakibaraka, “Tuᵽarãroꞌsi bojaĩjirimaji ñime”, ãrãᵽaki rijokoᵽeaᵽi.

¹⁴ Ĩꞌrã maekarakamarã ĩᵽaruka uᵽaka ĩoirã imaraᵽarã Satanárika ima maikoribeyua bearimaja. Suᵽa simamaka ritatojo wejeareka imarã ĩᵽarimarãre, nasurararãkaᵽitiyika ĩꞌrĩka jariwaꞌririmarĩa narẽrĩrũjeraᵽe. Tuᵽarã, ritaja ima tẽrĩwaꞌribaji imaki, ᵽiyia baꞌiaja ᵽoꞌimajare baaika waᵽa kijẽñerãrĩmi seyarãka ᵽoto ᵽitãꞌmua ᵽoꞌijiaokoroꞌsi torã naꞌraᵽe.

¹⁵ “Yire mija ãꞌmitiᵽe”, kẽrĩkoᵽeraᵽe Jesucristo: “ ‘Iꞌtojĩte mawiꞌiarã karebaꞌarimajire etarãñu’, mija ãrĩwãrũbeyu uᵽaka sime yetarũkia. Yetarũkia taꞌabaraka yiyaᵽaika uᵽakaja baabaraka imatikaja imarãñurã ᵽuri jĩjimaka imarãñurã. Suᵽa imarĩ, rakajetikaja najariroaka jããtikaja imarã uᵽaka nimarãñu. Ĩꞌrã ᵽuri jariromarĩa imawaꞌri aᵽerã wãjitãji iꞌyoᵽiꞌribeyurã uᵽaka nimarãñu”, kẽrĩkoraᵽe.

¹⁶ Suᵽa imarĩ Satanárika ima kaꞌiareka imarã ĩᵽarimarãre narẽrĩrũjerãrõꞌõ Harmagedón wãmeika sime boarikarõꞌõ Hebreo okaᵽi.

¹⁷ Ᵽiyika ángel seroaᵽi kirikaraᵽaka waᵽukoꞌtorõꞌõrã kiweꞌañaꞌtaraᵽe. Iꞌsuᵽaka kibaaraᵽaka ᵽoto Tuᵽarãre jiyiᵽuᵽaka õrĩriwiꞌiarã kiruᵽarikũmua imarõꞌõᵽi ikuᵽaka jãjirokaᵽi sajaikoraᵽe: —Koᵽakaja satiyiyu mae,==sãrĩkoraᵽe.

¹⁸ Soka ñakiraᵽaka rõꞌõjite yaatairaꞌkatirã, wĩᵽoa ᵽaaraᵽaka. Suᵽabaatirã werika okaaribaraka jãjia kaꞌia iyiraᵽaka, ᵽoꞌimajare sareka imaeka ᵽoto siyika ᵽemawaꞌribaji.

¹⁹ Siyiraᵽakaka ĩꞌrãtiji Babiloniawejea imakoᵽeraᵽaka maekarakaweje uᵽaka sajarirĩkaraᵽe. Iꞌsuᵽakajaoka ritatojo wejeareka imakoᵽeika wejea ririᵽataraᵽaka. Babiloniakarãre baꞌiaja baaika yeꞌkariribeyuka imarĩ, nare boebariwaꞌri naᵽareareka baꞌitakaja Tuᵽarãre nare jũarũjeraᵽe.

²⁰ Kaꞌia iyimaka jũmurika, ᵽusiaoka ririᵽataraᵽaka.

²¹ Suᵽabaatirã cuarenta y cinco kilos rõꞌõjĩrã rĩkia okojiyia ĩmiᵽi jũjiraᵽaka. Iꞌsia nare ᵽaꞌsemaka jimarĩ baꞌiaja Tuᵽarãreka jaibaraka ᵽoꞌimajare imaraᵽe.