Ap 15 - Porciones del Nuevo Testamento en el idioma Letuama

Ĩꞌᵽotẽñarirakamarã ángelrãka baꞌiaja ᵽoꞌimajare jũarũkia rikarimaja

¹ Iꞌsia beꞌrõ maboꞌikakurirã aᵽea maikoribeyua imatiyaikakaka ñiaraᵽe. Ĩꞌᵽotẽñarirakamarã ángelrãka narakakaja baꞌiaja ᵽoꞌimajare jũarũkia narikaraᵽe. Jimarĩ ᵽoꞌimajare boebariwaꞌri, ᵽiyia saᵽi baꞌiaja Tuᵽarãre nare jũarũjerãñu, “Baꞌiaja nabaarijayua najaꞌatarũ”, ãrĩwaꞌri.

² Suᵽabaatirã riaᵽakiaka jia waria okoika, ᵽeka jũꞌrẽika uᵽaka imaria ñiaraᵽe. Iꞌsiriarijerã rĩkimakaja ᵽoꞌimajare rĩkajiyeraᵽe. Werikaᵽakiaki uᵽaka imaki jẽrãka ᵽoꞌimajare baaeka, jiyiᵽuᵽayeebeyurã, kinúmero jĩꞌĩtabeyurã imarĩ werikaᵽakiakire tẽrĩkarã nimaraᵽe. Suᵽabaatirãoka arᵽa Tuᵽarãre nare ĩjika ᵽariji narĩkajiyeraᵽe.

³ Tuᵽarãroꞌsi kiᵽoꞌimajare imaruᵽutarimaji imaekaki, Moisére bayakoyaroyireka mirãka koyabaraka nimaraᵽe. Iꞌsuᵽakajaoka Oveja weiwaꞌyua uᵽaka imakire jiyiᵽuᵽayeokoroꞌsi ikuᵽaka nabayakoyaraᵽe: —Tuᵽarã, ritaja ima tẽrĩwaꞌribaji imaki imarĩ, ritaja ima ᵽemawaꞌribaji jiitaka mibaaika ime. Jia wãjiroka meñu uᵽakaja jia oyiaja baaiki mime. Ĩꞌrãkõꞌrĩmato kaꞌia jariwaꞌririmarĩa ᵽoꞌimaja ritaja ĩᵽamaki imajiᵽarijayuka mime.

⁴ Yija ĩᵽamaki, marã mire kĩkibekaja, mire jiyiᵽuᵽayeebekaja imabesarãñurã. Miꞌi ĩꞌrĩkaja ĩꞌrãkurioka baꞌiaja baakoribeyuka mimamaka, suᵽa simarãñu. Ritatojo wejeareka mire yiꞌribeyurãre jiaᵽi miwẽkomabaarãka ᵽoto ritaja ᵽoꞌimaja ima uᵽatataja miᵽõꞌirã rẽrĩrãñurã mire jiyiᵽuᵽayeeokoroꞌsi,==narãᵽe bayakoyabaraka.

⁵ Bayakoyabaraka nimaraᵽaka beꞌrõ maboꞌikakurirõꞌõrã Tuᵽarãre jiyiᵽuᵽaka õrĩriwiꞌiarã kimarõꞌõ kuraraka wiritamaka ñiaraᵽe.

⁶ Tuᵽarãre jiyiᵽuᵽaka õrĩriwiꞌiaᵽi ĩꞌᵽotẽñarirakamarã ángelrãka baꞌiaja ᵽoꞌimajare jũarũkia rikairã ᵽoᵽakãꞌã ñiaraᵽe. Jariroaka jia boia kaꞌimarĩa jããtirã, waꞌeyoka orokaka nakarĩmakiarã najãᵽiaraᵽe.

⁷ Torãjĩrã mae ĩꞌᵽotẽñarirakato seroa orokaka baaeka botarakamarã maikoribeyu uᵽaka imaraᵽarãkaki ĩꞌrĩkare rikaraᵽe. Suᵽa imarĩ ĩꞌᵽotẽñarirakamarã ángelrãkare nimarakamakireje ĩꞌrõriꞌto sakĩjimaka ñiaraᵽe. Rĩkimarãja ᵽoꞌimaja kire yiꞌribeyurãre imamaka, Tuᵽarã, õñia imajiᵽarimajire boebayuakaka õñijĩĩrika ᵽururika imaraᵽaka sareka.

⁸ Seroa nare kĩjiraᵽaka ᵽoto Tuᵽarãre jiyiᵽuᵽaka õrĩriwiꞌiarã ũmakaka ᵽururaᵽaka. Ritaja ima ᵽemawaꞌribajirã jiitakiji Tuᵽarãre ima beawaꞌri iꞌsuᵽaka sabaaraᵽe. Tẽrĩritakiji imakire torã imaraᵽaka simamaka, suᵽa simaraᵽe. Ĩꞌᵽotẽñarirakamarã ángelrãka baꞌiaja ᵽoꞌimajare jũarũkia narikaraᵽaka weꞌataᵽatabeyukaji ũmakaka torã ᵽurumaka, makioka kãkaberijĩrõꞌõ sajaraᵽe.