Ap 14 - Porciones del Nuevo Testamento en el idioma Letuama

Oveja weiwaꞌyua uᵽaka imaki, kirirã ciento cuarenta y cuatro mil rakamarãᵽitiyika imaraᵽaki

¹ Iꞌsuᵽaka simaraᵽaka beꞌerõꞌõ Sión wãmeika ᵽusiruᵽutuꞌtuarã Oveja weiwaꞌyua uᵽaka imakire rĩkamaᵽakãꞌã ñiaraᵽe. 144,000 rakamarã ᵽoꞌimajare kika imaraᵽe. Nakũꞌarã kiwãmea, Kiᵽaki wãmea oꞌojĩꞌamoꞌmekarã.

² Sabeꞌrõjite maboꞌikakurirõꞌõᵽi ikuᵽaka sokaarikoraᵽe ate. Ãta jãjia okaayu uᵽaka, wĩᵽoa jãjia ᵽaaika uᵽaka, suᵽabaatirã rĩkimakaja arᵽa nabireirõꞌõ uᵽaka sokarĩkamarãᵽe.

³ Botarakamarã maikoribeyu uᵽarã, suᵽabaatirã veinticuatro rakamarã ᵽakiarimarã ĩᵽire ruᵽaraᵽaka wãjitãji imaraᵽarã. Nawãjitãji 144,000 rakamarã mamaka baya koyabaraka imaraᵽarã. Aᵽerãoka nabayakoyaraᵽaka wãrũberijĩka simaraᵽe. Ritatojo wejeareka imarãre Satanáre jãꞌmerũkiareka waᵽuꞌrikarã nimaraᵽe.

⁴ Jia baarijayurã nime, rõmitika baawãꞌimarĩbeyurã. Iꞌsiroka yiꞌyurã imarĩ, Oveja weiwaꞌyua uᵽaka imakire aꞌyu uᵽakaja, kika aꞌririjayurã. Ritatojo wejeareka imaraᵽarãre ĩatirã kirirã, Tuᵽarãrirã nimaerã mamarĩ baꞌirokareka kitããekarã nimaraᵽe.

⁵ Suᵽa imarĩ ĩꞌrĩkaoka ᵽakirimaji naka imaberaᵽaki, Tuᵽarãre ĩaika wãjitãji ᵽaremarirã nimaraᵽe.

Maekarakamarã ángelrãka Tuᵽarãre bojawaᵽuꞌataĩjirimaja

⁶ Sabeꞌrõ ĩꞌrĩka ángelre maboꞌikakurirã wiᵽakãꞌã ñiaraᵽe. Iki kimaraᵽe, “Kimakiᵽi ãrĩwaꞌri õñia ᵽoꞌimajare imajiᵽarũkia Tuᵽarãre kire jaꞌataikaki”, majaroka oꞌaribaꞌimarĩa ãñua bojarimaji. Ritaja kaꞌiareka dakoa jariwaꞌririmarĩa, ᵽoꞌimajatata jariwaꞌririmarĩa, noka imabayu uᵽakaja jairãre, suᵽabaatirã ritaja wejeareka imarãre sabojarimaji kimaraᵽe.

⁷ Suᵽa imarĩ ikuᵽaka jãjirokaᵽi kijaikoraᵽe: —Ritaja ima tẽrĩwaꞌribaji imaki Tuᵽarãre imamaka, kire mija jiyiᵽuᵽayeebe. Iꞌsuᵽaka ñañu ᵽoꞌimajare baꞌiaja baaika waᵽa jairũkirĩmi seyaika simamaka. Tuᵽarã kime wejeᵽema, kaꞌia, riaka, okokoᵽea baaekaki. Iꞌsia baaekaki kimamaka jiyiᵽuᵽaka kire õrĩrũkirã mija ime,==ángelre ãrĩkoraᵽe.

⁸ Sabeꞌrõ aᵽika ángelre wiraᵽaka ñiaraᵽe. Ikuᵽaka kijaikoraᵽe: —Babiloniawejea, Tuᵽarãre riataraᵽe. Ritatojo wejeareka imarã Tuᵽarãre najaꞌataokaroꞌsi baꞌiaja baataꞌairã nimaraᵽe Babiloniakarã,==ángelre ãrĩkoraᵽe.

^9-10 Iꞌsia beꞌrõ aᵽika ángelre ñiaraᵽe ate. Iꞌkioka jãjirokaᵽi ikuᵽaka jaikoraᵽaki: —Werikaᵽakiakire jiyiᵽuᵽayeeirã, suᵽabaatirã kijẽrãka nabaaᵽoꞌijiaraᵽaka jiyiᵽuᵽayeeirã, kiwãmea naᵽitakarã, nakũꞌarã oꞌojĩꞌarũjekarãre boebariwaꞌri baꞌiaja Tuᵽarãre nare jũarũjerãñu. Mia, suᵽa imarĩ sawaᵽa azufre ᵽeka jũꞌrẽirõꞌõrã baꞌiaja jũarĩ naꞌrirãñu. Tuᵽarãrirã ángelrãkare ĩarãka wãjitãji, suᵽabaatirã Oveja weiwaꞌyua uᵽaka imakire ĩarãka wãjitãji, baꞌiaja najũarãñu.

¹¹ Baꞌiaja nabaaeka ᵽareaja ũmakaka nare joerãka ᵽuri tiyirũkimarĩa imarãka. Werikaᵽakiaki uᵽaka imaraᵽakire jiyiᵽuᵽaka õñurã, suᵽabaatirã kijẽrãka baaeka jiyiᵽuᵽayeewaꞌri kiwãmea oꞌojĩꞌaekarã baꞌiaja jũajiᵽarãñurã,==kẽrĩkoraᵽe.

¹² Iꞌsuᵽaka simamaka, Tuᵽarãrirã, kijãꞌmeika yiꞌᵽaraka Jesúreoka yiꞌririjayurã imarĩ, kire yiꞌririjaꞌatarimarĩa sime naroꞌsi.

¹³ Iꞌsia beꞌrõ maboꞌikakuriᵽi ikuᵽaka yire sãrĩkoraᵽe: —Mire yibojaika mioꞌobe. Maĩᵽamaki Jesúre yiꞌririjaꞌatabekaja reyaekarã, jĩjimaka mija imabe,==Iꞌsuᵽaka yire sãrĩkoᵽakãꞌã, ikuᵽaka Esᵽíritu Santore ãrĩkoraᵽe: —Rita sime, iꞌsuᵽakatakaoka simarũ. Kaꞌwisika jũabaraka nabaꞌirabeika jaꞌatatirã, najẽrĩtarãñu. Maboꞌikakurirã neyarãka ᵽoto, baꞌiaja jũaekarã imakoꞌomakaja kiyaᵽaika uᵽakaja jia nabaaeka õñuka imarĩ, jia sawaᵽa Tuᵽarãre nare baarãñu,==kẽrĩkoraᵽe Esᵽíritu Santo.

“Ritatojo wejeareka imarãre baꞌiaja baaeka ĩatirã, wẽkomaka nare mibaabe”, ángelre ãrĩkoraᵽe

¹⁴ Iꞌtojĩrã mae oko ũmakaka boia ima ᵽemarã ᵽoꞌimaji uᵽaka imakire ruᵽamaka ñiaraᵽe. Orokaka baaeka buꞌya tuaekaki sara oᵽika rikatirã kimaraᵽe.

¹⁵ Toᵽiji, aᵽika ángel Tuᵽarãre jiyiᵽuᵽaka õrĩriwiꞌiaᵽi kiᵽoᵽakãꞌã ñiaraᵽe. Oko ũmakaᵽemarã ruᵽaraᵽakire jãjirokaᵽi ikuᵽaka kẽrãᵽe: —Koᵽakaja kaꞌiareka ima õterikia rabaerã baaika mae, sataꞌtetirã sameꞌeᵽatawaꞌᵽe,==kẽrĩkoraᵽe.

¹⁶ Iꞌsuᵽaka kẽᵽakãꞌã, oko ũmaka ᵽemarã imaraᵽaki õterikia taꞌtetirã sakeꞌeᵽatawaꞌraᵽe.

¹⁷ Iꞌsia beꞌrõ, ĩmirã Tuᵽarãre jiyiᵽuᵽaka õrĩriwiꞌiaᵽi aᵽika ángelre ᵽoraᵽe ate. Iꞌkioka sara oᵽika rikaraᵽaki.

¹⁸ Toᵽi mae, aᵽika ángel, joeĩjiritẽrĩa ĩarĩrĩrimaji, joeĩjiritẽrĩa imarõꞌõᵽi iꞌtatirã sara oᵽika rikaraᵽakire jãjirokaᵽi ikuᵽaka kẽrĩkoraᵽe: —Kaꞌiareka ima iyaka rẽñua mae. Suᵽa imarĩ oᵽika misaraᵽi sataꞌtetirã sameꞌebe,==kire kẽrĩkoᵽakãꞌã ñaꞌmitiraᵽe. (Kire naꞌmitiriᵽẽaberika waᵽa kaꞌiareka imarãre Tuᵽarãre jẽñerãñu ãrĩrika uᵽaka simaraᵽe iꞌsuᵽaka baarika.)

¹⁹ Iꞌsuᵽaka kẽᵽakãꞌã ãꞌmitiritirã, kaꞌiareka imaraᵽaka õterikia taꞌtetirã keꞌeraᵽe. Seꞌetirã, sokoa bikerũkirõꞌõrã sakitaaraᵽe. “Ᵽoꞌimajare baꞌiaja baaika ĩatirã jimarĩ baꞌiaja Tuᵽarãre nare jũarũjerãñu”, ãrĩrika uᵽaka sime.

²⁰ Suᵽa imarĩ weje aꞌriwaꞌrirã iyaka narĩꞌkaᵽaꞌseraᵽe. Sanarĩꞌkaᵽaꞌsemaka riaka uᵽaka sajururaᵽe riwea. Suᵽabaatirã trescientos kilómetro rõꞌõjĩrã yoerã sajuruwaꞌraᵽe. Iꞌsuᵽaka baawaꞌri kawaru wãmujãꞌãrõꞌõjĩrã ĩki sajaraᵽe riaka.